অধ্যায় 67

67.1

ধৃতরাষ্ট্র উবাচ
কথং ত্বং মাধবং বেত্থ সর্বলোকমহেশ্বরম্
কথমেনং ন বেদাহং তন্মমাচক্ষ্ব সংজয়

সংজয় উবাচ
বিদ্যা রাজন্ন তে বিদ্যা মম বিদ্যা ন হীয়তে
বিদ্যাহীনস্তমোধ্বস্তো নাভিজানাতি কেশবম্

বিদ্যয়া তাত জানামি ত্রিয়ুগং মধুসূদনম্
কর্তারমকৃতং দেবং ভূতানাং প্রভবাপ্যয়ম্

ধৃতরাষ্ট্র উবাচ
গাবল্গণেঽত্র কা ভক্তির্যা তে নিত্যা জনার্দনে
যয়া ত্বমভিজানাসি ত্রিয়ুগং মধুসূদনম্

সংজয় উবাচ
মায়াং ন সেবে ভদ্রং তে ন বৃথাধর্মমাচরে
শুদ্ধভাবং গতো ভক্ত্যা শাস্ত্রাদ্বেদ্মি জনার্দনম্

ধৃতরাষ্ট্র উবাচ
দুর্যোধন হৃষীকেশং প্রপদ্যস্ব জনার্দনম্
আপ্তো নঃ সংজয়স্তাত শরণং গচ্ছ কেশবম্

দুর্যোধন উবাচ
ভগবান্দেবকীপুত্রো লোকং চেন্নিহনিষ্যতি
প্রবদন্নর্জুনে সখ্যং নাহং গচ্ছেঽদ্য কেশবম্

ধৃতরাষ্ট্র উবাচ
অবাগ্গান্ধারি পুত্রস্তে গচ্ছত্যেষ সুদুর্মতিঃ
ঈর্ষ্যুর্দুরাত্মা মানী চ শ্রেয়সাং বচনাতিগঃ

গান্ধার্যুবাচ
ঐশ্বর্যকাম দুষ্টাত্মন্বৃদ্ধানাং শাসনাতিগ
ঐশ্বর্যজীবিতে হিত্বা পিতরং মাং চ বালিশ

বর্ধয়ন্দুর্হৃদাং প্রীতিং মাং চ শোকেন বর্ধয়ন্
নিহতো ভীমসেনেন স্মর্তাসি বচনং পিতুঃ

ব্যাস উবাচ
দয়িতোঽসি রাজন্কৃষ্ণস্য ধৃতরাষ্ট্র নিবোধ মে
যস্য তে সংজয়ো দূতো যস্ত্বাং শ্রেয়সি যোক্ষ্যতে

জানাত্যেষ হৃষীকেশং পুরাণং যচ্চ বৈ নবম্
শুশ্রূষমাণমেকাগ্রং মোক্ষ্যতে মহতো ভয়াৎ

বৈচিত্রবীর্য পুরুষাঃ ক্রোধহর্ষতমোবৃতাঃ
সিতা বহুবিধৈঃ পাশৈর্যে ন তুষ্টাঃ স্বকৈর্ধনৈঃ

যমস্য বশমায়ান্তি কামমূঢাঃ পুনঃ পুনঃ
অন্ধনেত্রা যথৈবান্ধা নীয়মানাঃ স্বকর্মভিঃ

এষ একায়নঃ পন্থা যেন যান্তি মনীষিণঃ
তং দৃষ্ট্বা মৃত্যুমত্যেতি মহাংস্তত্র ন সজ্জতে

ধৃতরাষ্ট্র উবাচ
অঙ্গ সংজয় মে শংস পন্থানমকুতোভয়ম্
যেন গত্বা হৃষীকেশং প্রাপ্নুয়াং শান্তিমুত্তমাম্

সংজয় উবাচ
নাকৃতাত্মা কৃতাত্মানং জাতু বিদ্যাজ্জনার্দনম্
আত্মনস্তু ক্রিয়োপায়ো নান্যত্রেন্দ্রিয়নিগ্রহাৎ

ইন্দ্রিয়াণামুদীর্ণানাং কামত্যাগোঽপ্রমাদতঃ
অপ্রমাদোঽবিহিংসা চ জ্ঞানয়োনিরসংশয়ম্

ইন্দ্রিয়াণাং যমে যত্তো ভব রাজন্নতন্দ্রিতঃ
বুদ্ধিশ্চ মা তে চ্যবতু নিয়চ্ছৈতাং যতস্ততঃ

এতজ্জ্ঞানং বিদুর্বিপ্রা ধ্রুবমিন্দ্রিয়ধারণম্
এতজ্জ্ঞানং চ পন্থাশ্চ যেন যান্তি মনীষিণঃ

অপ্রাপ্যঃ কেশবো রাজন্নিন্দ্রিয়ৈরজিতৈর্নৃভিঃ
আগমাধিগতো যোগাদ্বশী তত্ত্বে প্রসীদতি