অধ্যায় 68

68.1

ধৃতরাষ্ট্র উবাচ
ভূয়ো মে পুণ্ডরীকাক্ষং সংজয়াচক্ষ্ব পৃচ্ছতে
নামকর্মার্থবিত্তাত প্রাপ্নুয়াং পুরুষোত্তমম্

সংজয় উবাচ
শ্রুতং মে তস্য দেবস্য নামনির্বচনং শুভম্
যাবত্তত্রাভিজানেঽহমপ্রমেয়ো হি কেশবঃ

বসনাত্সর্বভূতানাং বসুত্বাদ্দেবয়োনিতঃ
বাসুদেবস্ততো বেদ্যো বৃষত্বাদ্বৃষ্ণিরুচ্যতে

মৌনাদ্ধ্যানাচ্চ যোগাচ্চ বিদ্ধি ভারত মাধবম্
সর্বতত্ত্বলয়াচ্চৈব মধুহা মধুসূদনঃ

কৃষির্ভূবাচকঃ শব্দো ণশ্চ নির্বৃতিবাচকঃ
কৃষ্ণস্তদ্ভাবয়োগাচ্চ কৃষ্ণো ভবতি শাশ্বতঃ

পুণ্ডরীকং পরং ধাম নিত্যমক্ষয়মক্ষরম্
তদ্ভাবাত্পুণ্ডরীকাক্ষো দস্যুত্রাসাজ্জনার্দনঃ

যতঃ সত্ত্বং ন চ্যবতে যচ্চ সত্ত্বান্ন হীয়তে
সত্ত্বতঃ সাত্বতস্তস্মাদার্ষভাদ্বৃষভেক্ষণঃ

ন জায়তে জনিত্র্যাং যদজস্তস্মাদনীকজিৎ
দেবানাং স্বপ্রকাশত্বাদ্দমাদ্দামোদরং বিদুঃ

হর্ষাত্সৌখ্যাত্সুখৈশ্বর্যাদ্ধৃষীকেশত্বমশ্নুতে
বাহুভ্যাং রোদসী বিভ্রন্মহাবাহুরিতি স্মৃতঃ

অধো ন ক্ষীয়তে জাতু যস্মাত্তস্মাদধোক্ষজঃ
নরাণাময়নাচ্চাপি তেন নারায়ণঃ স্মৃতঃ
পূরণাত্সদনাচ্চৈব ততোঽসৌ পুরুষোত্তমঃ

অসতশ্চ সতশ্চৈব সর্বস্য প্রভবাপ্যয়াৎ
সর্বস্য চ সদা জ্ঞানাত্সর্বমেনং প্রচক্ষতে

সত্যে প্রতিষ্ঠিতঃ কৃষ্ণঃ সত্যমত্র প্রতিষ্ঠিতম্
সত্যাত্সত্যং চ গোবিন্দস্তস্মাত্সত্যোঽপি নামতঃ

বিষ্ণুর্বিক্রমণাদেব জয়নাজ্জিষ্ণুরুচ্যতে
শাশ্বতত্বাদনন্তশ্চ গোবিন্দো বেদনাদ্গবাম্

অতত্ত্বং কুরুতে তত্ত্বং তেন মোহয়তে প্রজাঃ
এবংবিধো ধর্মনিত্যো ভগবান্মুনিভিঃ সহ
আগন্তা হি মহাবাহুরানৃশংস্যার্থমচ্যুতঃ