অধ্যায় 69

69.1

ধৃতরাষ্ট্র উবাচ
চক্ষুষ্মতাং বৈ স্পৃহয়ামি সংজয়; দ্রক্ষ্যন্তি যে বাসুদেবং সমীপে
বিভ্রাজমানং বপুষা পরেণ; প্রকাশয়ন্তং প্রদিশো দিশশ্চ

ঈরয়ন্তং ভারতীং ভারতানা;মভ্যর্চনীয়াং শংকরীং সৃঞ্জয়ানাম্
বুভূষদ্ভির্গ্রহণীয়ামনিন্দ্যাং; পরাসূনামগ্রহণীয়রূপাম্

সমুদ্যন্তং সাত্বতমেকবীরং; প্রণেতারমৃষভং যাদবানাম্
নিহন্তারং ক্ষোভণং শাত্রবাণাং; মুষ্ণন্তং চ দ্বিষতাং বৈ যশাংসি

দ্রষ্টারো হি কুরবস্তং সমেতা; মহাত্মানং শত্রুহণং বরেণ্যম্
ব্রুবন্তং বাচমনৃশংসরূপাং; বৃষ্ণিশ্রেষ্ঠং মোহয়ন্তং মদীয়ান্

ঋষিং সনাতনতমং বিপশ্চিতং; বাচঃ সমুদ্রং কলশং যতীনাম্
অরিষ্টনেমিং গরুডং সুপর্ণং; পতিং প্রজানাং ভুবনস্য ধাম

সহস্রশীর্ষং পুরুষং পুরাণ;মনাদিমধ্যান্তমনন্তকীর্তিম্
শুক্রস্য ধাতারমজং জনিত্রং; পরং পরেভ্যঃ শরণং প্রপদ্যে

ত্রৈলোক্যনির্মাণকরং জনিত্রং; দেবাসুরাণামথ নাগরক্ষসাম্
নরাধিপানাং বিদুষাং প্রধান;মিন্দ্রানুজং তং শরণং প্রপদ্যে