Utshovঅধ্যায় 70
70.1
বৈশংপায়ন উবাচ
সংজয়ে প্রতিয়াতে তু ধর্মরাজো যুধিষ্ঠিরঃ
অভ্যভাষত দাশার্হমৃষভং সর্বসাত্বতাম্
70.2
অয়ং স কালঃ সংপ্রাপ্তো মিত্রাণাং মে জনার্দন
ন চ ত্বদন্যং পশ্যামি যো ন আপত্সু তারয়েৎ
70.3
ত্বাং হি মাধব সংশ্রিত্য নির্ভয়া মোহদর্পিতম্
ধার্তরাষ্ট্রং সহামাত্যং স্বমংশমনুয়ুঞ্জ্মহে
70.4
যথা হি সর্বাস্বাপত্সু পাসি বৃষ্ণীনরিংদম
তথা তে পাণ্ডবা রক্ষ্যাঃ পাহ্যস্মান্মহতো ভয়াৎ
70.5
ভগবানুবাচ
অয়মস্মি মহাবাহো ব্রূহি যত্তে বিবক্ষিতম্
করিষ্যামি হি তত্সর্বং যত্ত্বং বক্ষ্যসি ভারত
70.6
যুধিষ্ঠির উবাচ
শ্রুতং তে ধৃতরাষ্ট্রস্য সপুত্রস্য চিকীর্ষিতম্
এতদ্ধি সকলং কৃষ্ণ সংজয়ো মাং যদব্রবীৎ
70.7
তন্মতং ধৃতরাষ্ট্রস্য সোঽস্যাত্মা বিবৃতান্তরঃ
যথোক্তং দূত আচষ্টে বধ্যঃ স্যাদন্যথা ব্রুবন্
70.8
অপ্রদানেন রাজ্যস্য শান্তিমস্মাসু মার্গতি
লুব্ধঃ পাপেন মনসা চরন্নসমমাত্মনঃ
70.9
যত্তদ্দ্বাদশ বর্ষাণি বনে নির্ব্যুষিতা বয়ম্
ছদ্মনা শরদং চৈকাং ধৃতরাষ্ট্রস্য শাসনাৎ
70.10
স্থাতা নঃ সময়ে তস্মিন্ধৃতরাষ্ট্র ইতি প্রভো
নাহাস্ম সময়ং কৃষ্ণ তদ্ধি নো ব্রাহ্মণা বিদুঃ
70.11
বৃদ্ধো রাজা ধৃতরাষ্ট্রঃ স্বধর্মং নানুপশ্যতি
পশ্যন্বা পুত্রগৃদ্ধিত্বান্মন্দস্যান্বেতি শাসনম্
70.12
সুয়োধনমতে তিষ্ঠন্রাজাস্মাসু জনার্দন
মিথ্যা চরতি লুব্ধঃ সংশ্চরন্প্রিয়মিবাত্মনঃ
70.13
ইতো দুঃখতরং কিং নু যত্রাহং মাতরং ততঃ
সংবিধাতুং ন শক্নোমি মিত্রাণাং বা জনার্দন
70.14
কাশিভিশ্চেদিপাঞ্চালৈর্মত্স্যৈশ্চ মধুসূদন
ভবতা চৈব নাথেন পঞ্চ গ্রামা বৃতা ময়া
70.15
কুশস্থলং বৃকস্থলমাসন্দী বারণাবতম্
অবসানং চ গোবিন্দ কিংচিদেবাত্র পঞ্চমম্
70.16
পঞ্চ নস্তাত দীয়ন্তাং গ্রামা বা নগরাণি বা
বসেম সহিতা যেষু মা চ নো ভরতা নশন্
70.17
ন চ তানপি দুষ্টাত্মা ধার্তরাষ্ট্রোঽনুমন্যতে
স্বাম্যমাত্মনি মত্বাসাবতো দুঃখতরং নু কিম্
70.18
কুলে জাতস্য বৃদ্ধস্য পরবিত্তেষু গৃধ্যতঃ
লোভঃ প্রজ্ঞানমাহন্তি প্রজ্ঞা হন্তি হতা হ্রিয়ম্
70.19
হ্রীর্হতা বাধতে ধর্মং ধর্মো হন্তি হতঃ শ্রিয়ম্
শ্রীর্হতা পুরুষং হন্তি পুরুষস্যাস্বতা বধঃ
70.20
অস্বতো হি নিবর্তন্তে জ্ঞাতয়ঃ সুহৃদর্ত্বিজঃ
অপুষ্পাদফলাদ্বৃক্ষাদ্যথা তাত পতত্রিণঃ
70.21
এতচ্চ মরণং তাত যদস্মাত্পতিতাদিব
জ্ঞাতয়ো বিনিবর্তন্তে প্রেতসত্ত্বাদিবাসবঃ
70.22
নাতঃ পাপীয়সীং কাংচিদবস্থাং শম্বরোঽব্রবীৎ
যত্র নৈবাদ্য ন প্রাতর্ভোজনং প্রতিদৃশ্যতে
70.23
ধনমাহুঃ পরং ধর্মং ধনে সর্বং প্রতিষ্ঠিতম্
জীবন্তি ধনিনো লোকে মৃতা যে ত্বধনা নরাঃ
70.24
যে ধনাদপকর্ষন্তি নরং স্ববলমাশ্রিতাঃ
তে ধর্মমর্থং কামং চ প্রমথ্নন্তি নরং চ তম্
70.25
এতামবস্থাং প্রাপ্যৈকে মরণং বব্রিরে জনাঃ
গ্রামায়ৈকে বনায়ৈকে নাশায়ৈকে প্রবব্রজুঃ
70.26
উন্মাদমেকে পুষ্যন্তি যান্ত্যন্যে দ্বিষতাং বশম্
দাস্যমেকে নিগচ্ছন্তি পরেষামর্থহেতুনা
70.27
আপদেবাস্য মরণাত্পুরুষস্য গরীয়সী
শ্রিয়ো বিনাশস্তদ্ধ্যস্য নিমিত্তং ধর্মকাময়োঃ
70.28
যদস্য ধর্ম্যং মরণং শাশ্বতং লোকবর্ত্ম তৎ
সমন্তাত্সর্বভূতানাং ন তদত্যেতি কশ্চন
70.29
ন তথা বাধ্যতে কৃষ্ণ প্রকৃত্যা নির্ধনো জনঃ
যথা ভদ্রাং শ্রিয়ং প্রাপ্য তয়া হীনঃ সুখৈধিতঃ
70.30
স তদাত্মাপরাধেন সংপ্রাপ্তো ব্যসনং মহৎ
সেন্দ্রান্গর্হয়তে দেবান্নাত্মানং চ কথংচন
70.31
ন চাস্মিন্সর্বশাস্ত্রাণি প্রতরন্তি নিগর্হণাম্
সোঽভিক্রুধ্যতি ভৃত্যানাং সুহৃদশ্চাভ্যসূয়তি
70.32
তং তদা মন্যুরেবৈতি স ভূয়ঃ সংপ্রমুহ্যতি
স মোহবশমাপন্নঃ ক্রূরং কর্ম নিষেবতে
70.33
পাপকর্মাত্যয়ায়ৈব সংকরং তেন পুষ্যতি
সংকরো নরকায়ৈব সা কাষ্ঠা পাপকর্মণাম্
70.34
ন চেত্প্রবুধ্যতে কৃষ্ণ নরকায়ৈব গচ্ছতি
তস্য প্রবোধঃ প্রজ্ঞৈব প্রজ্ঞাচক্ষুর্ন রিষ্যতি
70.35
প্রজ্ঞালাভে হি পুরুষঃ শাস্ত্রাণ্যেবান্ববেক্ষতে
শাস্ত্রনিত্যঃ পুনর্ধর্মং তস্য হ্রীরঙ্গমুত্তমম্
70.36
হ্রীমান্হি পাপং প্রদ্বেষ্টি তস্য শ্রীরভিবর্ধতে
শ্রীমান্স যাবদ্ভবতি তাবদ্ভবতি পূরুষঃ
70.37
ধর্মনিত্যঃ প্রশান্তাত্মা কার্যয়োগবহঃ সদা
নাধর্মে কুরুতে বুদ্ধিং ন চ পাপেষু বর্ততে
70.38
অহ্রীকো বা বিমূঢো বা নৈব স্ত্রী ন পুনঃ পুমান্
নাস্যাধিকারো ধর্মেঽস্তি যথা শূদ্রস্তথৈব সঃ
70.39
হ্রীমানবতি দেবাংশ্চ পিতৄনাত্মানমেব চ
তেনামৃতত্বং ব্রজতি সা কাষ্ঠা পুণ্যকর্মণাম্
70.40
তদিদং ময়ি তে দৃষ্টং প্রত্যক্ষং মধুসূদন
যথা রাজ্যাত্পরিভ্রষ্টো বসামি বসতীরিমাঃ
70.41
তে বয়ং ন শ্রিয়ং হাতুমলং ন্যায়েন কেনচিৎ
অত্র নো যতমানানাং বধশ্চেদপি সাধু তৎ
70.42
তত্র নঃ প্রথমঃ কল্পো যদ্বয়ং তে চ মাধব
প্রশান্তাঃ সমভূতাশ্চ শ্রিয়ং তামশ্নুবীমহি
70.43
তত্রৈষা পরমা কাষ্ঠা রৌদ্রকর্মক্ষয়োদয়া
যদ্বয়ং কৌরবান্হত্বা তানি রাষ্ট্রাণ্যশীমহি
70.44
যে পুনঃ স্যুরসংবদ্ধা অনার্যাঃ কৃষ্ণ শত্রবঃ
তেষামপ্যবধঃ কার্যঃ কিং পুনর্যে স্যুরীদৃশাঃ
70.45
জ্ঞাতয়শ্চ হি ভূয়িষ্ঠাঃ সহায়া গুরবশ্চ নঃ
তেষাং বধোঽতিপাপীয়ান্কিং নু যুদ্ধেঽস্তি শোভনম্
70.46
পাপঃ ক্ষত্রিয়ধর্মোঽয়ং বয়ং চ ক্ষত্রবান্ধবাঃ
স নঃ স্বধর্মোঽধর্মো বা বৃত্তিরন্যা বিগর্হিতা
70.47
শূদ্রঃ করোতি শুশ্রূষাং বৈশ্যা বিপণিজীবিনঃ
বয়ং বধেন জীবামঃ কপালং ব্রাহ্মণৈর্বৃতম্
70.48
ক্ষত্রিয়ঃ ক্ষত্রিয়ং হন্তি মত্স্যো মত্স্যেন জীবতি
শ্বা শ্বানং হন্তি দাশার্হ পশ্য ধর্মো যথাগতঃ
70.49
যুদ্ধে কৃষ্ণ কলির্নিত্যং প্রাণাঃ সীদন্তি সংয়ুগে
বলং তু নীতিমাত্রায় হঠে জয়পরাজয়ৌ
70.50
নাত্মচ্ছন্দেন ভূতানাং জীবিতং মরণং তথা
নাপ্যকালে সুখং প্রাপ্যং দুঃখং বাপি যদূত্তম
70.51
একো হ্যপি বহূন্হন্তি ঘ্নন্ত্যেকং বহবোঽপ্যুত
শূরং কাপুরুষো হন্তি অয়শস্বী যশস্বিনম্
70.52
জয়শ্চৈবোভয়োর্দৃষ্ট উভয়োশ্চ পরাজয়ঃ
তথৈবাপচয়ো দৃষ্টো ব্যপয়ানে ক্ষয়ব্যয়ৌ
70.53
সর্বথা বৃজিনং যুদ্ধং কো ঘ্নন্ন প্রতিহন্যতে
হতস্য চ হৃষীকেশ সমৌ জয়পরাজয়ৌ
70.54
পরাজয়শ্চ মরণান্মন্যে নৈব বিশিষ্যতে
যস্য স্যাদ্বিজয়ঃ কৃষ্ণ তস্যাপ্যপচয়ো ধ্রুবম্
70.55
অন্ততো দয়িতং ঘ্নন্তি কেচিদপ্যপরে জনাঃ
তস্যাঙ্গ বলহীনস্য পুত্রান্ভ্রাতৄনপশ্যতঃ
নির্বেদো জীবিতে কৃষ্ণ সর্বতশ্চোপজায়তে
70.56
যে হ্যেব বীরা হ্রীমন্ত আর্যাঃ করুণবেদিনঃ
ত এব যুদ্ধে হন্যন্তে যবীয়ান্মুচ্যতে জনঃ
70.57
হত্বাপ্যনুশয়ো নিত্যং পরানপি জনার্দন
অনুবন্ধশ্চ পাপোঽত্র শেষশ্চাপ্যবশিষ্যতে
70.58
শেষো হি বলমাসাদ্য ন শেষমবশেষয়েৎ
সর্বোচ্ছেদে চ যততে বৈরস্যান্তবিধিত্সয়া
70.59
জয়ো বৈরং প্রসৃজতি দুঃখমাস্তে পরাজিতঃ
সুখং প্রশান্তঃ স্বপিতি হিত্বা জয়পরাজয়ৌ
70.60
জাতবৈরশ্চ পুরুষো দুঃখং স্বপিতি নিত্যদা
অনির্বৃতেন মনসা সসর্প ইব বেশ্মনি
70.61
উত্সাদয়তি যঃ সর্বং যশসা স বিয়ুজ্যতে
অকীর্তিং সর্বভূতেষু শাশ্বতীং স নিয়চ্ছতি
70.62
ন হি বৈরাণি শাম্যন্তি দীর্ঘকালকৃতান্যপি
আখ্যাতারশ্চ বিদ্যন্তে পুমাংশ্চোত্পদ্যতে কুলে
70.63
ন চাপি বৈরং বৈরেণ কেশব ব্যুপশাম্যতি
হবিষাগ্নির্যথা কৃষ্ণ ভূয় এবাভিবর্ধতে
70.64
অতোঽন্যথা নাস্তি শান্তির্নিত্যমন্তরমন্ততঃ
অন্তরং লিপ্সমানানাময়ং দোষো নিরন্তরঃ
70.65
পৌরুষেয়ো হি বলবানাধির্হৃদয়বাধনঃ
তস্য ত্যাগেন বা শান্তির্নিবৃত্ত্যা মনসোঽপি বা
70.66
অথ বা মূলঘাতেন দ্বিষতাং মধুসূদন
ফলনির্বৃত্তিরিদ্ধা স্যাত্তন্নৃশংসতরং ভবেৎ
70.67
যা তু ত্যাগেন শান্তিঃ স্যাত্তদৃতে বধ এব সঃ
সংশয়াচ্চ সমুচ্ছেদাদ্দ্বিষতামাত্মনস্তথা
70.68
ন চ ত্যক্তুং তদিচ্ছামো ন চেচ্ছামঃ কুলক্ষয়ম্
অত্র যা প্রণিপাতেন শান্তিঃ সৈব গরীয়সী
70.69
সর্বথা যতমানানাময়ুদ্ধমভিকাঙ্ক্ষতাম্
সান্ত্বে প্রতিহতে যুদ্ধং প্রসিদ্ধমপরাক্রমম্
70.70
প্রতিঘাতেন সান্ত্বস্য দারুণং সংপ্রবর্ততে
তচ্ছুনামিব গোপাদে পণ্ডিতৈরুপলক্ষিতম্
70.71
লাঙ্গূলচালনং ক্ষ্বেডঃ প্রতিরাবো বিবর্তনম্
দন্তদর্শনমারাবস্ততো যুদ্ধং প্রবর্ততে
70.72
তত্র যো বলবান্কৃষ্ণ জিত্বা সোঽত্তি তদামিষম্
এবমেব মনুষ্যেষু বিশেষো নাস্তি কশ্চন
70.73
সর্বথা ত্বেতদুচিতং দুর্বলেষু বলীয়সাম্
অনাদরো বিরোধশ্চ প্রণিপাতী হি দুর্বলঃ
70.74
পিতা রাজা চ বৃদ্ধশ্চ সর্বথা মানমর্হতি
তস্মান্মান্যশ্চ পূজ্যশ্চ ধৃতরাষ্ট্রো জনার্দন
70.75
পুত্রস্নেহস্তু বলবান্ধৃতরাষ্ট্রস্য মাধব
স পুত্রবশমাপন্নঃ প্রণিপাতং প্রহাস্যতি
70.76
তত্র কিং মন্যসে কৃষ্ণ প্রাপ্তকালমনন্তরম্
কথমর্থাচ্চ ধর্মাচ্চ ন হীয়েমহি মাধব
70.77
ঈদৃশে হ্যর্থকৃচ্ছ্রেঽস্মিন্কমন্যং মধুসূদন
উপসংপ্রষ্টুমর্হামি ত্বামৃতে পুরুষোত্তম
70.78
প্রিয়শ্চ প্রিয়কামশ্চ গতিজ্ঞঃ সর্বকর্মণাম্
কো হি কৃষ্ণাস্তি নস্ত্বাদৃক্সর্বনিশ্চয়বিত্সুহৃৎ
70.79
বৈশংপায়ন উবাচ
এবমুক্তঃ প্রত্যুবাচ ধর্মরাজং জনার্দনঃ
উভয়োরেব বামর্থে যাস্যামি কুরুসংসদম্
70.80
শমং তত্র লভেয়ং চেদ্যুষ্মদর্থমহাপয়ন্
পুণ্যং মে সুমহদ্রাজংশ্চরিতং স্যান্মহাফলম্
70.81
মোচয়েয়ং মৃত্যুপাশাত্সংরব্ধান্কুরুসৃঞ্জয়ান্
পাণ্ডবান্ধার্তরাষ্ট্রাংশ্চ সর্বাং চ পৃথিবীমিমাম্
70.82
যুধিষ্ঠির উবাচ
ন মমৈতন্মতং কৃষ্ণ যত্ত্বং যায়াঃ কুরূন্প্রতি
সুয়োধনঃ সূক্তমপি ন করিষ্যতি তে বচঃ
70.83
সমেতং পার্থিবং ক্ষত্রং সুয়োধনবশানুগম্
তেষাং মধ্যাবতরণং তব কৃষ্ণ ন রোচয়ে
70.84
ন হি নঃ প্রীণয়েদ্দ্রব্যং ন দেবত্বং কুতঃ সুখম্
ন চ সর্বামরৈশ্বর্যং তব রোধেন মাধব
70.85
ভগবানুবাচ
জানাম্যেতাং মহারাজ ধার্তরাষ্ট্রস্য পাপতাম্
অবাচ্যাস্তু ভবিষ্যামঃ সর্বলোকে মহীক্ষিতাম্
70.86
ন চাপি মম পর্যাপ্তাঃ সহিতাঃ সর্বপার্থিবাঃ
ক্রুদ্ধস্য প্রমুখে স্থাতুং সিংহস্যেবেতরে মৃগাঃ
70.87
অথ চেত্তে প্রবর্তেরন্ময়ি কিংচিদসাংপ্রতম্
নির্দহেয়ং কুরূন্সর্বানিতি মে ধীয়তে মতিঃ
70.88
ন জাতু গমনং তত্র ভবেত্পার্থ নিরর্থকম্
অর্থপ্রাপ্তিঃ কদাচিত্স্যাদন্ততো বাপ্যবাচ্যতা
70.89
যুধিষ্ঠির উবাচ
যত্তুভ্যং রোচতে কৃষ্ণ স্বস্তি প্রাপ্নুহি কৌরবান্
কৃতার্থং স্বস্তিমন্তং ত্বাং দ্রক্ষ্যামি পুনরাগতম্
70.90
বিষ্বক্সেন কুরূন্গত্বা ভারতাঞ্শময়েঃ প্রভো
যথা সর্বে সুমনসঃ সহ স্যামঃ সুচেতসঃ
70.91
ভ্রাতা চাসি সখা চাসি বীভত্সোর্মম চ প্রিয়ঃ
সৌহৃদেনাবিশঙ্ক্যোঽসি স্বস্তি প্রাপ্নুহি ভূতয়ে
70.92
অস্মান্বেত্থ পরান্বেত্থ বেত্থার্থং বেত্থ ভাষিতম্
যদ্যদস্মদ্ধিতং কৃষ্ণ তত্তদ্বাচ্যঃ সুয়োধনঃ
70.93
যদ্যদ্ধর্মেণ সংয়ুক্তমুপপদ্যেদ্ধিতং বচঃ
তত্তত্কেশব ভাষেথাঃ সান্ত্বং বা যদি বেতরৎ