Utshovঅধ্যায় 71
71.1
ভগবানুবাচ
সংজয়স্য শ্রুতং বাক্যং ভবতশ্চ শ্রুতং ময়া
সর্বং জানাম্যভিপ্রায়ং তেষাং চ ভবতশ্চ যঃ
71.2
তব ধর্মাশ্রিতা বুদ্ধিস্তেষাং বৈরাশ্রিতা মতিঃ
যদয়ুদ্ধেন লভ্যেত তত্তে বহুমতং ভবেৎ
71.3
ন চ তন্নৈষ্ঠিকং কর্ম ক্ষত্রিয়স্য বিশাং পতে
আহুরাশ্রমিণঃ সর্বে যদ্ভৈক্ষং ক্ষত্রিয়শ্চরেৎ
71.4
জয়ো বধো বা সংগ্রামে ধাত্রা দিষ্টঃ সনাতনঃ
স্বধর্মঃ ক্ষত্রিয়স্যৈষ কার্পণ্যং ন প্রশস্যতে
71.5
ন হি কার্পণ্যমাস্থায় শক্যা বৃত্তির্যুধিষ্ঠির
বিক্রমস্ব মহাবাহো জহি শত্রূনরিংদম
71.6
অতিগৃদ্ধাঃ কৃতস্নেহা দীর্ঘকালং সহোষিতাঃ
কৃতমিত্রাঃ কৃতবলা ধার্তরাষ্ট্রাঃ পরংতপ
71.7
ন পর্যায়োঽস্তি যত্সাম্যং ত্বয়ি কুর্যুর্বিশাং পতে
বলবত্তাং হি মন্যন্তে ভীষ্মদ্রোণকৃপাদিভিঃ
71.8
যাবচ্চ মার্দবেনৈতান্রাজন্নুপচরিষ্যসি
তাবদেতে হরিষ্যন্তি তব রাজ্যমরিংদম
71.9
নানুক্রোশান্ন কার্পণ্যান্ন চ ধর্মার্থকারণাৎ
অলং কর্তুং ধার্তরাষ্ট্রাস্তব কামমরিংদম
71.10
এতদেব নিমিত্তং তে পাণ্ডবাস্তু যথা ত্বয়ি
নান্বতপ্যন্ত কৌপীনং তাবত্কৃত্বাপি দুষ্করম্
71.11
পিতামহস্য দ্রোণস্য বিদুরস্য চ ধীমতঃ
পশ্যতাং কুরুমুখ্যানাং সর্বেষামেব তত্ত্বতঃ
71.12
দানশীলং মৃদুং দান্তং ধর্মকামমনুব্রতম্
যত্ত্বামুপধিনা রাজন্দ্যূতেনাবঞ্চয়ত্তদা
ন চাপত্রপতে পাপো নৃশংসস্তেন কর্মণা
71.13
তথাশীলসমাচারে রাজন্মা প্রণয়ং কৃথাঃ
বধ্যাস্তে সর্বলোকস্য কিং পুনস্তব ভারত
71.14
বাগ্ভিস্ত্বপ্রতিরূপাভিরতুদত্সকনীয়সম্
শ্লাঘমানঃ প্রহৃষ্টঃ সন্ভাষতে ভ্রাতৃভিঃ সহ
71.15
এতাবত্পাণ্ডবানাং হি নাস্তি কিংচিদিহ স্বকম্
নামধেয়ং চ গোত্রং চ তদপ্যেষাং ন শিষ্যতে
71.16
কালেন মহতা চৈষাং ভবিষ্যতি পরাভবঃ
প্রকৃতিং তে ভজিষ্যন্তি নষ্টপ্রকৃতয়ো জনাঃ
71.17
এতাশ্চান্যাশ্চ পরুষা বাচঃ স সমুদীরয়ন্
শ্লাঘতে জ্ঞাতিমধ্যে স্ম ত্বয়ি প্রব্রজিতে বনম্
71.18
যে তত্রাসন্সমানীতাস্তে দৃষ্ট্বা ত্বামনাগসম্
অশ্রুকণ্ঠা রুদন্তশ্চ সভায়ামাসতে তদা
71.19
ন চৈনমভ্যনন্দংস্তে রাজানো ব্রাহ্মণৈঃ সহ
সর্বে দুর্যোধনং তত্র নিন্দন্তি স্ম সভাসদঃ
71.20
কুলীনস্য চ যা নিন্দা বধশ্চামিত্রকর্শন
মহাগুণো বধো রাজন্ন তু নিন্দা কুজীবিকা
71.21
তদৈব নিহতো রাজন্যদৈব নিরপত্রপঃ
নিন্দিতশ্চ মহারাজ পৃথিব্যাং সর্বরাজসু
71.22
ঈষত্কার্যো বধস্তস্য যস্য চারিত্রমীদৃশম্
প্রস্কম্ভনপ্রতিস্তব্ধশ্ছিন্নমূল ইব দ্রুমঃ
71.23
বধ্যঃ সর্প ইবানার্যঃ সর্বলোকস্য দুর্মতিঃ
জহ্যেনং ত্বমমিত্রঘ্ন মা রাজন্বিচিকিত্সিথাঃ
71.24
সর্বথা ত্বত্ক্ষমং চৈতদ্রোচতে চ মমানঘ
যত্ত্বং পিতরি ভীষ্মে চ প্রণিপাতং সমাচরেঃ
71.25
অহং তু সর্বলোকস্য গত্বা ছেত্স্যামি সংশয়ম্
যেষামস্তি দ্বিধাভাবো রাজন্দুর্যোধনং প্রতি
71.26
মধ্যে রাজ্ঞামহং তত্র প্রাতিপৌরুষিকান্গুণান্
তব সংকীর্তয়িষ্যামি যে চ তস্য ব্যতিক্রমাঃ
71.27
ব্রুবতস্তত্র মে বাক্যং ধর্মার্থসহিতং হিতম্
নিশম্য পার্থিবাঃ সর্বে নানাজনপদেশ্বরাঃ
71.28
ত্বয়ি সংপ্রতিপত্স্যন্তে ধর্মাত্মা সত্যবাগিতি
তস্মিংশ্চাধিগমিষ্যন্তি যথা লোভাদবর্তত
71.29
গর্হয়িষ্যামি চৈবৈনং পৌরজানপদেষ্বপি
বৃদ্ধবালানুপাদায় চাতুর্বর্ণ্যসমাগমে
71.30
শমং চেদ্যাচমানস্ত্বং ন ধর্মং তত্র লপ্স্যসে
কুরূন্বিগর্হয়িষ্যন্তি ধৃতরাষ্ট্রং চ পার্থিবাঃ
71.31
তস্মিঁল্লোকপরিত্যক্তে কিং কার্যমবশিষ্যতে
হতে দুর্যোধনে রাজন্যদন্যত্ক্রিয়তামিতি
71.32
যাত্বা চাহং কুরূন্সর্বান্যুষ্মদর্থমহাপয়ন্
যতিষ্যে প্রশমং কর্তুং লক্ষয়িষ্যে চ চেষ্টিতম্
71.33
কৌরবাণাং প্রবৃত্তিং চ গত্বা যুদ্ধাধিকারিকাম্
নিশাম্য বিনিবর্তিষ্যে জয়ায় তব ভারত
71.34
সর্বথা যুদ্ধমেবাহমাশংসামি পরৈঃ সহ
নিমিত্তানি হি সর্বাণি তথা প্রাদুর্ভবন্তি মে
71.35
মৃগাঃ শকুন্তাশ্চ বদন্তি ঘোরং; হস্ত্যশ্বমুখ্যেষু নিশামুখেষু
ঘোরাণি রূপাণি তথৈব চাগ্নি;র্বর্ণান্বহূন্পুষ্যতি ঘোররূপান্
মনুষ্যলোকক্ষপণোঽথ ঘোরো; নো চেদনুপ্রাপ্ত ইহান্তকঃ স্যাৎ
71.36
শস্ত্রাণি পত্রং কবচান্রথাংশ্চ; নাগান্ধ্বজাংশ্চ প্রতিপাদয়িত্বা
যোধাশ্চ সর্বে কৃতনিশ্রমাস্তে; ভবন্তু হস্ত্যশ্বরথেষু যত্তাঃ
সাংগ্রামিকং তে যদুপার্জনীয়ং; সর্বং সমগ্রং কুরু তন্নরেন্দ্র
71.37
দুর্যোধনো ন হ্যলমদ্য দাতুং; জীবংস্তবৈতন্নৃপতে কথংচিৎ
যত্তে পুরস্তাদভবত্সমৃদ্ধং; দ্যূতে হৃতং পাণ্ডবমুখ্য রাজ্যম্