অধ্যায় 72

72.1

ভীমসেন উবাচ
যথা যথৈব শান্তিঃ স্যাত্কুরূণাং মধুসূদন
তথা তথৈব ভাষেথা মা স্ম যুদ্ধেন ভীষয়েঃ

অমর্ষী নিত্যসংরব্ধঃ শ্রেয়োদ্বেষী মহামনাঃ
নোগ্রং দুর্যোধনো বাচ্যঃ সাম্নৈবৈনং সমাচরেঃ

প্রকৃত্যা পাপসত্ত্বশ্চ তুল্যচেতাশ্চ দস্যুভিঃ
ঐশ্বর্যমদমত্তশ্চ কৃতবৈরশ্চ পাণ্ডবৈঃ

অদীর্ঘদর্শী নিষ্ঠূরী ক্ষেপ্তা ক্রূরপরাক্রমঃ
দীর্ঘমন্যুরনেয়শ্চ পাপাত্মা নিকৃতিপ্রিয়ঃ

ম্রিয়েতাপি ন ভজ্যেত নৈব জহ্যাত্স্বকং মতম্
তাদৃশেন শমং কৃষ্ণ মন্যে পরমদুষ্করম্

সুহৃদামপ্যবাচীনস্ত্যক্তধর্মঃ প্রিয়ানৃতঃ
প্রতিহন্ত্যেব সুহৃদাং বাচশ্চৈব মনাংসি চ

স মন্যুবশমাপন্নঃ স্বভাবং দুষ্টমাস্থিতঃ
স্বভাবাত্পাপমন্বেতি তৃণৈস্তুন্ন ইবোরগঃ

দুর্যোধনো হি যত্সেনঃ সর্বথা বিদিতস্তব
যচ্ছীলো যত্স্বভাবশ্চ যদ্বলো যত্পরাক্রমঃ

পুরা প্রসন্নাঃ কুরবঃ সহপুত্রাস্তথা বয়ম্
ইন্দ্রজ্যেষ্ঠা ইবাভূম মোদমানাঃ সবান্ধবাঃ

দুর্যোধনস্য ক্রোধেন ভারতা মধুসূদন
ধক্ষ্যন্তে শিশিরাপায়ে বনানীব হুতাশনৈঃ

অষ্টাদশেমে রাজানঃ প্রখ্যাতা মধুসূদন
যে সমুচ্চিচ্ছিদুর্জ্ঞাতীন্সুহৃদশ্চ সবান্ধবান্

অসুরাণাং সমৃদ্ধানাং জ্বলতামিব তেজসা
পর্যায়কালে ধর্মস্য প্রাপ্তে বলিরজায়ত

হৈহয়ানামুদাবর্তো নীপানাং জনমেজয়ঃ
বহুলস্তালজঙ্ঘানাং কৃমীণামুদ্ধতো বসুঃ

অজবিন্দুঃ সুবীরাণাং সুরাষ্ট্রাণাং কুশর্দ্ধিকঃ
অর্কজশ্চ বলীহানাং চীনানাং ধৌতমূলকঃ

হয়গ্রীবো বিদেহানাং বরপ্রশ্চ মহৌজসাম্
বাহুঃ সুন্দরবেগানাং দীপ্তাক্ষাণাং পুরূরবাঃ

সহজশ্চেদিমত্স্যানাং প্রচেতানাং বৃহদ্বলঃ
ধারণশ্চেন্দ্রবত্সানাং মুকুটানাং বিগাহনঃ

শমশ্চ নন্দিবেগানামিত্যেতে কুলপাংসনাঃ
যুগান্তে কৃষ্ণ সংভূতাঃ কুলেষু পুরুষাধমাঃ

অপ্যয়ং নঃ কুরূণাং স্যাদ্যুগান্তে কালসংভৃতঃ
দুর্যোধনঃ কুলাঙ্গারো জঘন্যঃ পাপপূরুষঃ

তস্মান্মৃদু শনৈরেনং ব্রূয়া ধর্মার্থসংহিতম্
কামানুবন্ধবহুলং নোগ্রমুগ্রপরাক্রমম্

অপি দুর্যোধনং কৃষ্ণ সর্বে বয়মধশ্চরাঃ
নীচৈর্ভূত্বানুয়াস্যামো মা স্ম নো ভরতা নশন্

অপ্যুদাসীনবৃত্তিঃ স্যাদ্যথা নঃ কুরুভিঃ সহ
বাসুদেব তথা কার্যং ন কুরূননয়ঃ স্পৃশেৎ

বাচ্যঃ পিতামহো বৃদ্ধো যে চ কৃষ্ণ সভাসদঃ
ভ্রাতৄণামস্তু সৌভ্রাত্রং ধার্তরাষ্ট্রঃ প্রশাম্যতাম্

অহমেতদ্ব্রবীম্যেবং রাজা চৈব প্রশংসতি
অর্জুনো নৈব যুদ্ধার্থী ভূয়সী হি দয়ার্জুনে