অধ্যায় 73

73.1

বৈশংপায়ন উবাচ
এতচ্ছ্রুত্বা মহাবাহুঃ কেশবঃ প্রহসন্নিব
অভূতপূর্বং ভীমস্য মার্দবোপগতং বচঃ

গিরেরিব লঘুত্বং তচ্ছীতত্বমিব পাবকে
মত্বা রামানুজঃ শৌরিঃ শার্ঙ্গধন্বা বৃকোদরম্

সংতেজয়ংস্তদা বাগ্ভির্মাতরিশ্বেব পাবকম্
উবাচ ভীমমাসীনং কৃপয়াভিপরিপ্লুতম্

ত্বমন্যদা ভীমসেন যুদ্ধমেব প্রশংসসি
বধাভিনন্দিনঃ ক্রূরান্ধার্তরাষ্ট্রান্মিমর্দিষুঃ

ন চ স্বপিষি জাগর্ষি ন্যুব্জঃ শেষে পরংতপ
ঘোরামশান্তাং রুশতীং সদা বাচং প্রভাষসে

নিঃশ্বসন্নগ্নিবর্ণেন সংতপ্তঃ স্বেন মন্যুনা
অপ্রশান্তমনা ভীম সধূম ইব পাবকঃ

একান্তে নিষ্টনঞ্শেষে ভারার্ত ইব দুর্বলঃ
অপি ত্বাং কেচিদুন্মত্তং মন্যন্তেঽতদ্বিদো জনাঃ

আরুজ্য বৃক্ষান্নির্মূলান্গজঃ পরিভুজন্নিব
নিঘ্নন্পদ্ভিঃ ক্ষিতিং ভীম নিষ্টনন্পরিধাবসি

নাস্মিঞ্জনেঽভিরমসে রহঃ ক্ষিয়সি পাণ্ডব
নান্যং নিশি দিবা বাপি কদাচিদভিনন্দসি

অকস্মাত্স্ময়মানশ্চ রহস্যাস্সে রুদন্নিব
জান্বোর্মূর্ধানমাধায় চিরমাস্সে প্রমীলিতঃ

ভ্রুকুটিং চ পুনঃ কুর্বন্নোষ্ঠৌ চ বিলিহন্নিব
অভীক্ষ্ণং দৃশ্যসে ভীম সর্বং তন্মন্যুকারিতম্

যথা পুরস্তাত্সবিতা দৃশ্যতে শুক্রমুচ্চরন্
যথা চ পশ্চান্নির্মুক্তো ধ্রুবং পর্যেতি রশ্মিবান্

তথা সত্যং ব্রবীম্যেতন্নাস্তি তস্য ব্যতিক্রমঃ
হন্তাহং গদয়াভ্যেত্য দুর্যোধনমমর্ষণম্

ইতি স্ম মধ্যে ভ্রাতৄণাং সত্যেনালভসে গদাম্
তস্য তে প্রশমে বুদ্ধির্ধীয়তেঽদ্য পরংতপ

অহো যুদ্ধপ্রতীপানি যুদ্ধকাল উপস্থিতে
পশ্যসীবাপ্রতীপানি কিং ত্বাং ভীর্ভীম বিন্দতি

অহো পার্থ নিমিত্তানি বিপরীতানি পশ্যসি
স্বপ্নান্তে জাগরান্তে চ তস্মাত্প্রশমমিচ্ছসি

অহো নাশংসসে কিংচিত্পুংস্ত্বং ক্লীব ইবাত্মনি
কশ্মলেনাভিপন্নোঽসি তেন তে বিকৃতং মনঃ

উদ্বেপতে তে হৃদয়ং মনস্তে প্রবিষীদতি
ঊরুস্তম্ভগৃহীতোঽসি তস্মাত্প্রশমমিচ্ছসি

অনিত্যং কিল মর্ত্যস্য চিত্তং পার্থ চলাচলম্
বাতবেগপ্রচলিতা অষ্ঠীলা শাল্মলেরিব

তবৈষা বিকৃতা বুদ্ধির্গবাং বাগিব মানুষী
মনাংসি পাণ্ডুপুত্রাণাং মজ্জয়ত্যপ্লবানিব

ইদং মে মহদাশ্চর্যং পর্বতস্যেব সর্পণম্
যদীদৃশং প্রভাষেথা ভীমসেনাসমং বচঃ

স দৃষ্ট্বা স্বানি কর্মাণি কুলে জন্ম চ ভারত
উত্তিষ্ঠস্ব বিষাদং মা কৃথা বীর স্থিরো ভব

ন চৈতদনুরূপং তে যত্তে গ্লানিররিংদম
যদোজসা ন লভতে ক্ষত্রিয়ো ন তদশ্নুতে