অধ্যায় 74

74.1

বৈশংপায়ন উবাচ
তথোক্তো বাসুদেবেন নিত্যমন্যুরমর্ষণঃ
সদশ্ববত্সমাধাবদ্বভাষে তদনন্তরম্

অন্যথা মাং চিকীর্ষন্তমন্যথা মন্যসেঽচ্যুত
প্রণীতভাবমত্যন্তং যুধি সত্যপরাক্রমম্

বেত্থ দাশার্হ সত্ত্বং মে দীর্ঘকালং সহোষিতঃ
উত বা মাং ন জানাসি প্লবন্হ্রদ ইবাপ্লবঃ
তস্মাদপ্রতিরূপাভির্বাগ্ভির্মাং ত্বং সমর্ছসি

কথং হি ভীমসেনং মাং জানন্কশ্চন মাধব
ব্রূয়াদপ্রতিরূপাণি যথা মাং বক্তুমর্হসি

তস্মাদিদং প্রবক্ষ্যামি বচনং বৃষ্ণিনন্দন
আত্মনঃ পৌরুষং চৈব বলং চ ন সমং পরৈঃ

সর্বথা নার্যকর্মৈতত্প্রশংসা স্বয়মাত্মনঃ
অতিবাদাপবিদ্ধস্তু বক্ষ্যামি বলমাত্মনঃ

পশ্যেমে রোদসী কৃষ্ণ যয়োরাসন্নিমাঃ প্রজাঃ
অচলে চাপ্যনন্তে চ প্রতিষ্ঠে সর্বমাতরৌ

যদীমে সহসা ক্রুদ্ধে সমেয়াতাং শিলে ইব
অহমেতে নিগৃহ্ণীয়াং বাহুভ্যাং সচরাচরে

পশ্যৈতদন্তরং বাহ্বোর্মহাপরিঘয়োরিব
য এতত্প্রাপ্য মুচ্যেত ন তং পশ্যামি পূরুষম্

হিমবাংশ্চ সমুদ্রশ্চ বজ্রী চ বলভিত্স্বয়ম্
ময়াভিপন্নং ত্রায়েরন্বলমাস্থায় ন ত্রয়ঃ

যুধ্যেয়ং ক্ষত্রিয়ান্সর্বান্পাণ্ডবেষ্বাততায়িনঃ
অধঃ পাদতলেনৈতানধিষ্ঠাস্যামি ভূতলে

ন হি ত্বং নাভিজানাসি মম বিক্রমমচ্যুত
যথা ময়া বিনির্জিত্য রাজানো বশগাঃ কৃতাঃ

অথ চেন্মাং ন জানাসি সূর্যস্যেবোদ্যতঃ প্রভাম্
বিগাঢে যুধি সংবাধে বেত্স্যসে মাং জনার্দন

কিং মাত্যবাক্ষীঃ পরুষৈর্ব্রণং সূচ্যা ইবানঘ
যথামতি ব্রবীম্যেতদ্বিদ্ধি মামধিকং ততঃ

দ্রষ্টাসি যুধি সংবাধে প্রবৃত্তে বৈশসেঽহনি
ময়া প্রণুন্নান্মাতঙ্গান্রথিনঃ সাদিনস্তথা

তথা নরানভিক্রুদ্ধং নিঘ্নন্তং ক্ষত্রিয়র্ষভান্
দ্রষ্টা মাং ত্বং চ লোকশ্চ বিকর্ষন্তং বরান্বরান্

ন মে সীদন্তি মজ্জানো ন মমোদ্বেপতে মনঃ
সর্বলোকাদভিক্রুদ্ধান্ন ভয়ং বিদ্যতে মম

কিং তু সৌহৃদমেবৈতত্কৃপয়া মধুসূদন
সর্বাংস্তিতিক্ষে সংক্লেশান্মা স্ম নো ভরতা নশন্