অধ্যায় 75

75.1

ভগবানুবাচ
ভাবং জিজ্ঞাসমানোঽহং প্রণয়াদিদমব্রুবম্
ন চাক্ষেপান্ন পাণ্ডিত্যান্ন ক্রোধান্ন বিবক্ষয়া

বেদাহং তব মাহাত্ম্যমুত তে বেদ যদ্বলম্
উত তে বেদ কর্মাণি ন ত্বাং পরিভবাম্যহম্

যথা চাত্মনি কল্যাণং সংভাবয়সি পাণ্ডব
সহস্রগুণমপ্যেতত্ত্বয়ি সংভাবয়াম্যহম্

যাদৃশে চ কুলে জন্ম সর্বরাজাভিপূজিতে
বন্ধুভিশ্চ সুহৃদ্ভিশ্চ ভীম ত্বমসি তাদৃশঃ

জিজ্ঞাসন্তো হি ধর্মস্য সংদিগ্ধস্য বৃকোদর
পর্যায়ং ন ব্যবস্যন্তি দৈবমানুষয়োর্জনাঃ

স এব হেতুর্ভূত্বা হি পুরুষস্যার্থসিদ্ধিষু
বিনাশেঽপি স এবাস্য সংদিগ্ধং কর্ম পৌরুষম্

অন্যথা পরিদৃষ্টানি কবিভির্দোষদর্শিভিঃ
অন্যথা পরিবর্তন্তে বেগা ইব নভস্বতঃ

সুমন্ত্রিতং সুনীতং চ ন্যায়তশ্চোপপাদিতম্
কৃতং মানুষ্যকং কর্ম দৈবেনাপি বিরুধ্যতে

দৈবমপ্যকৃতং কর্ম পৌরুষেণ বিহন্যতে
শীতমুষ্ণং তথা বর্ষং ক্ষুত্পিপাসে চ ভারত

যদন্যদ্দিষ্টভাবস্য পুরুষস্য স্বয়ংকৃতম্
তস্মাদনবরোধশ্চ বিদ্যতে তত্র লক্ষণম্

লোকস্য নান্যতো বৃত্তিঃ পাণ্ডবান্যত্র কর্মণঃ
এবংবুদ্ধিঃ প্রবর্তেত ফলং স্যাদুভয়ান্বয়াৎ

য এবং কৃতবুদ্ধিঃ সন্কর্মস্বেব প্রবর্ততে
নাসিদ্ধৌ ব্যথতে তস্য ন সিদ্ধৌ হর্ষমশ্নুতে

তত্রেয়মর্থমাত্রা মে ভীমসেন বিবক্ষিতা
নৈকান্তসিদ্ধির্মন্তব্যা কুরুভিঃ সহ সংয়ুগে

নাতিপ্রণীতরশ্মিঃ স্যাত্তথা ভবতি পর্যয়ে
বিষাদমর্ছেদ্গ্লানিং বা এতদর্থং ব্রবীমি তে

শ্বোভূতে ধৃতরাষ্ট্রস্য সমীপং প্রাপ্য পাণ্ডব
যতিষ্যে প্রশমং কর্তুং যুষ্মদর্থমহাপয়ন্

শমং চেত্তে করিষ্যন্তি ততোঽনন্তং যশো মম
ভবতাং চ কৃতঃ কামস্তেষাং চ শ্রেয় উত্তমম্

তে চেদভিনিবেক্ষ্যন্তি নাভ্যুপৈষ্যন্তি মে বচঃ
কুরবো যুদ্ধমেবাত্র রৌদ্রং কর্ম ভবিষ্যতি

অস্মিন্যুদ্ধে ভীমসেন ত্বয়ি ভারঃ সমাহিতঃ
ধূরর্জুনেন ধার্যা স্যাদ্বোঢব্য ইতরো জনঃ

অহং হি যন্তা বীভত্সোর্ভবিতা সংয়ুগে সতি
ধনংজয়স্যৈষ কামো ন হি যুদ্ধং ন কাময়ে

তস্মাদাশঙ্কমানোঽহং বৃকোদর মতিং তব
তুদন্নক্লীবয়া বাচা তেজস্তে সমদীপয়ম্