অধ্যায় 76

76.1

অর্জুন উবাচ
উক্তং যুধিষ্ঠিরেণৈব যাবদ্বাচ্যং জনার্দন
তব বাক্যং তু মে শ্রুত্বা প্রতিভাতি পরংতপ

নৈব প্রশমমত্র ত্বং মন্যসে সুকরং প্রভো
লোভাদ্বা ধৃতরাষ্ট্রস্য দৈন্যাদ্বা সমুপস্থিতাৎ

অফলং মন্যসে চাপি পুরুষস্য পরাক্রমম্
ন চান্তরেণ কর্মাণি পৌরুষেণ ফলোদয়ঃ

তদিদং ভাষিতং বাক্যং তথা চ ন তথৈব চ
ন চৈতদেবং দ্রষ্টব্যমসাধ্যমিতি কিংচন

কিং চৈতন্মন্যসে কৃচ্ছ্রমস্মাকং পাপমাদিতঃ
কুর্বন্তি তেষাং কর্মাণি যেষাং নাস্তি ফলোদয়ঃ

সংপাদ্যমানং সম্যক্চ স্যাত্কর্ম সফলং প্রভো
স তথা কৃষ্ণ বর্তস্ব যথা শর্ম ভবেত্পরৈঃ

পাণ্ডবানাং কুরূণাং চ ভবান্পরমকঃ সুহৃৎ
সুরাণামসুরাণাং চ যথা বীর প্রজাপতিঃ

কুরূণাং পাণ্ডবানাং চ প্রতিপত্স্ব নিরাময়ম্
অস্মদ্ধিতমনুষ্ঠাতুং ন মন্যে তব দুষ্করম্

এবং চেত্কার্যতামেতি কার্যং তব জনার্দন
গমনাদেবমেব ত্বং করিষ্যসি ন সংশয়ঃ

চিকীর্ষিতমথান্যত্তে তস্মিন্বীর দুরাত্মনি
ভবিষ্যতি তথা সর্বং যথা তব চিকীর্ষিতম্

শর্ম তৈঃ সহ বা নোঽস্তু তব বা যচ্চিকীর্ষিতম্
বিচার্যমাণো যঃ কামস্তব কৃষ্ণ স নো গুরুঃ

ন স নার্হতি দুষ্টাত্মা বধং সসুতবান্ধবঃ
যেন ধর্মসুতে দৃষ্ট্বা ন সা শ্রীরুপমর্ষিতা

যচ্চাপ্যপশ্যতোপায়ং ধর্মিষ্ঠং মধুসূদন
উপায়েন নৃশংসেন হৃতা দুর্দ্যূতদেবিনা

কথং হি পুরুষো জাতঃ ক্ষত্রিয়েষু ধনুর্ধরঃ
সমাহূতো নিবর্তেত প্রাণত্যাগেঽপ্যুপস্থিতে

অধর্মেণ জিতান্দৃষ্ট্বা বনে প্রব্রজিতাংস্তথা
বধ্যতাং মম বার্ষ্ণেয় নির্গতোঽসৌ সুয়োধনঃ

ন চৈতদদ্ভুতং কৃষ্ণ মিত্রার্থে যচ্চিকীর্ষসি
ক্রিয়া কথং নু মুখ্যা স্যান্মৃদুনা বেতরেণ বা

অথ বা মন্যসে জ্যায়ান্বধস্তেষামনন্তরম্
তদেব ক্রিয়তামাশু ন বিচার্যমতস্ত্বয়া

জানাসি হি যথা তেন দ্রৌপদী পাপবুদ্ধিনা
পরিক্লিষ্টা সভামধ্যে তচ্চ তস্যাপি মর্ষিতম্

স নাম সম্যগ্বর্তেত পাণ্ডবেষ্বিতি মাধব
ন মে সংজায়তে বুদ্ধির্বীজমুপ্তমিবোষরে

তস্মাদ্যন্মন্যসে যুক্তং পাণ্ডবানাং চ যদ্ধিতম্
তদাশু কুরু বার্ষ্ণেয় যন্নঃ কার্যমনন্তরম্