UtshovChapter 76
76.1
अर्जुन उवाच
उक्तं युधिष्ठिरेणैव यावद्वाच्यं जनार्दन
तव वाक्यं तु मे श्रुत्वा प्रतिभाति परंतप
Arjuna uvacha
Uktam yudhishthirenaiva yavadvachyam janardana
Tava vakyam tu me shrutva pratibhati parantapa
76.2
नैव प्रशममत्र त्वं मन्यसे सुकरं प्रभो
लोभाद्वा धृतराष्ट्रस्य दैन्याद्वा समुपस्थितात्
Naiva prashamamatra tvam manyase sukaram prabho
Lobhadva dhritarashtrasya dainyadva samupasthitat
76.3
अफलं मन्यसे चापि पुरुषस्य पराक्रमम्
न चान्तरेण कर्माणि पौरुषेण फलोदयः
Aphalam manyase chapi purushasya parakramam
Na chantarena karmani paurushena phalodayah
76.4
तदिदं भाषितं वाक्यं तथा च न तथैव च
न चैतदेवं द्रष्टव्यमसाध्यमिति किंचन
Tadidam bhashitam vakyam tatha cha na tathaiva cha
Na chaitadevam drashtavyamasadhyamiti kinchana
76.5
किं चैतन्मन्यसे कृच्छ्रमस्माकं पापमादितः
कुर्वन्ति तेषां कर्माणि येषां नास्ति फलोदयः
Kim chaitanmanyase krichchhramasmakam papamaditah
Kurvanti tesham karmani yesham nasti phalodayah
76.6
संपाद्यमानं सम्यक्च स्यात्कर्म सफलं प्रभो
स तथा कृष्ण वर्तस्व यथा शर्म भवेत्परैः
Sampadyamanam samyakcha syatkarma saphalam prabho
Sa tatha krishna vartasva yatha sharma bhavetparaih
76.7
पाण्डवानां कुरूणां च भवान्परमकः सुहृत्
सुराणामसुराणां च यथा वीर प्रजापतिः
Pandavanam kurunam cha bhavanparamakah suhrit
Suranamasuranam cha yatha vira prajapatih
76.8
कुरूणां पाण्डवानां च प्रतिपत्स्व निरामयम्
अस्मद्धितमनुष्ठातुं न मन्ये तव दुष्करम्
Kurunam pandavanam cha pratipatsva niramayam
Asmaddhitamanushthatum na manye tava dushkaram
76.9
एवं चेत्कार्यतामेति कार्यं तव जनार्दन
गमनादेवमेव त्वं करिष्यसि न संशयः
Evam chetkaryatameti karyam tava janardana
Gamanadevameva tvam karishyasi na sanshayah
76.10
चिकीर्षितमथान्यत्ते तस्मिन्वीर दुरात्मनि
भविष्यति तथा सर्वं यथा तव चिकीर्षितम्
Chikirshitamathanyatte tasminvira duratmani
Bhavishyati tatha sarvam yatha tava chikirshitam
76.11
शर्म तैः सह वा नोऽस्तु तव वा यच्चिकीर्षितम्
विचार्यमाणो यः कामस्तव कृष्ण स नो गुरुः
Sharma taih saha va nostu tava va yachchikirshitam
Vicharyamano yah kamastava krishna sa no guruh
76.12
न स नार्हति दुष्टात्मा वधं ससुतबान्धवः
येन धर्मसुते दृष्ट्वा न सा श्रीरुपमर्षिता
Na sa narhati dushtatma vadham sasutabandhavah
Yena dharmasute drishtva na sa shrirupamarshita
76.13
यच्चाप्यपश्यतोपायं धर्मिष्ठं मधुसूदन
उपायेन नृशंसेन हृता दुर्द्यूतदेविना
Yachchapyapashyatopayam dharmishtham madhusudana
Upayena nrishansena hrita durdyutadevina
76.14
कथं हि पुरुषो जातः क्षत्रियेषु धनुर्धरः
समाहूतो निवर्तेत प्राणत्यागेऽप्युपस्थिते
Katham hi purusho jatah kshatriyeshu dhanurdharah
Samahuto nivarteta pranatyagepyupasthite
76.15
अधर्मेण जितान्दृष्ट्वा वने प्रव्रजितांस्तथा
वध्यतां मम वार्ष्णेय निर्गतोऽसौ सुयोधनः
Adharmena jitandrishtva vane pravrajitanstatha
Vadhyatam mama varshneya nirgatosau suyodhanah
76.16
न चैतदद्भुतं कृष्ण मित्रार्थे यच्चिकीर्षसि
क्रिया कथं नु मुख्या स्यान्मृदुना वेतरेण वा
Na chaitadadbhutam krishna mitrarthe yachchikirshasi
Kriya katham nu mukhya syanmriduna vetarena va
76.17
अथ वा मन्यसे ज्यायान्वधस्तेषामनन्तरम्
तदेव क्रियतामाशु न विचार्यमतस्त्वया
Atha va manyase jyayanvadhasteshamanantaram
Tadeva kriyatamashu na vicharyamatastvaya
76.18
जानासि हि यथा तेन द्रौपदी पापबुद्धिना
परिक्लिष्टा सभामध्ये तच्च तस्यापि मर्षितम्
Janasi hi yatha tena draupadi papabuddhina
Pariklishta sabhamadhye tachcha tasyapi marshitam
76.19
स नाम सम्यग्वर्तेत पाण्डवेष्विति माधव
न मे संजायते बुद्धिर्बीजमुप्तमिवोषरे
Sa nama samyagvarteta pandaveshviti madhava
Na me sanjayate buddhirbijamuptamivoshare
76.20
तस्माद्यन्मन्यसे युक्तं पाण्डवानां च यद्धितम्
तदाशु कुरु वार्ष्णेय यन्नः कार्यमनन्तरम्
Tasmadyanmanyase yuktam pandavanam cha yaddhitam
Tadashu kuru varshneya yannah karyamanantaram