অধ্যায় 77

77.1

ভগবানুবাচ
এবমেতন্মহাবাহো যথা বদসি পাণ্ডব
সর্বং ত্বিদং সমায়ত্তং বীভত্সো কর্মণোর্দ্বয়োঃ

ক্ষেত্রং হি রসবচ্ছুদ্ধং কর্ষকেণোপপাদিতম্
ঋতে বর্ষং ন কৌন্তেয় জাতু নির্বর্তয়েত্ফলম্

তত্র বৈ পৌরুষং ব্রূয়ুরাসেকং যত্নকারিতম্
তত্র চাপি ধ্রুবং পশ্যেচ্ছোষণং দৈবকারিতম্

তদিদং নিশ্চিতং বুদ্ধ্যা পূর্বৈরপি মহাত্মভিঃ
দৈবে চ মানুষে চৈব সংয়ুক্তং লোককারণম্

অহং হি তত্করিষ্যামি পরং পুরুষকারতঃ
দৈবং তু ন ময়া শক্যং কর্ম কর্তুং কথংচন

স হি ধর্মং চ সত্যং চ ত্যক্ত্বা চরতি দুর্মতিঃ
ন হি সংতপ্যতে তেন তথারূপেণ কর্মণা

তাং চাপি বুদ্ধিং পাপিষ্ঠাং বর্ধয়ন্ত্যস্য মন্ত্রিণঃ
শকুনিঃ সূতপুত্রশ্চ ভ্রাতা দুঃশাসনস্তথা

স হি ত্যাগেন রাজ্যস্য ন শমং সমুপেষ্যতি
অন্তরেণ বধাত্পার্থ সানুবন্ধঃ সুয়োধনঃ

ন চাপি প্রণিপাতেন ত্যক্তুমিচ্ছতি ধর্মরাট্
যাচ্যমানস্তু রাজ্যং স ন প্রদাস্যতি দুর্মতিঃ

ন তু মন্যে স তদ্বাচ্যো যদ্যুধিষ্ঠিরশাসনম্
উক্তং প্রয়োজনং তত্র ধর্মরাজেন ভারত

তথা পাপস্তু তত্সর্বং ন করিষ্যতি কৌরবঃ
তস্মিংশ্চাক্রিয়মাণেঽসৌ লোকবধ্যো ভবিষ্যতি

মম চাপি স বধ্যো বৈ জগতশ্চাপি ভারত
যেন কৌমারকে যূয়ং সর্বে বিপ্রকৃতাস্তথা

বিপ্রলুপ্তং চ বো রাজ্যং নৃশংসেন দুরাত্মনা
ন চোপশাম্যতে পাপঃ শ্রিয়ং দৃষ্ট্বা যুধিষ্ঠিরে

অসকৃচ্চাপ্যহং তেন ত্বত্কৃতে পার্থ ভেদিতঃ
ন ময়া তদ্গৃহীতং চ পাপং তস্য চিকীর্ষিতম্

জানাসি হি মহাবাহো ত্বমপ্যস্য পরং মতম্
প্রিয়ং চিকীর্ষমাণং চ ধর্মরাজস্য মামপি

স জানংস্তস্য চাত্মানং মম চৈব পরং মতম্
অজানন্নিব চাকস্মাদর্জুনাদ্যাভিশঙ্কসে

যচ্চাপি পরমং দিব্যং তচ্চাপ্যবগতং ত্বয়া
বিধানবিহিতং পার্থ কথং শর্ম ভবেত্পরৈঃ

যত্তু বাচা ময়া শক্যং কর্মণা চাপি পাণ্ডব
করিষ্যে তদহং পার্থ ন ত্বাশংসে শমং পরৈঃ

কথং গোহরণে ব্রূয়াদিচ্ছঞ্শর্ম তথাবিধম্
যাচ্যমানোঽপি ভীষ্মেণ সংবত্সরগতেঽধ্বনি

তদৈব তে পরাভূতা যদা সংকল্পিতাস্ত্বয়া
লবশঃ ক্ষণশশ্চাপি ন চ তুষ্টঃ সুয়োধনঃ

সর্বথা তু ময়া কার্যং ধর্মরাজস্য শাসনম্
বিভাব্যং তস্য ভূয়শ্চ কর্ম পাপং দুরাত্মনঃ