Utshovঅধ্যায় 78
78.1
নকুল উবাচ
উক্তং বহুবিধং বাক্যং ধর্মরাজেন মাধব
ধর্মজ্ঞেন বদান্যেন ধর্ময়ুক্তং চ তত্ত্বতঃ
78.2
মতমাজ্ঞায় রাজ্ঞশ্চ ভীমসেনেন মাধব
সংশমো বাহুবীর্যং চ খ্যাপিতং মাধবাত্মনঃ
78.3
তথৈব ফল্গুনেনাপি যদুক্তং তত্ত্বয়া শ্রুতম্
আত্মনশ্চ মতং বীর কথিতং ভবতাসকৃৎ
78.4
সর্বমেতদতিক্রম্য শ্রুত্বা পরমতং ভবান্
যত্প্রাপ্তকালং মন্যেথাস্তত্কুর্যাঃ পুরুষোত্তম
78.5
তস্মিংস্তস্মিন্নিমিত্তে হি মতং ভবতি কেশব
প্রাপ্তকালং মনুষ্যেণ স্বয়ং কার্যমরিংদম
78.6
অন্যথা চিন্তিতো হ্যর্থঃ পুনর্ভবতি সোঽন্যথা
অনিত্যমতয়ো লোকে নরাঃ পুরুষসত্তম
78.7
অন্যথা বুদ্ধয়ো হ্যাসন্নস্মাসু বনবাসিষু
অদৃশ্যেষ্বন্যথা কৃষ্ণ দৃশ্যেষু পুনরন্যথা
78.8
অস্মাকমপি বার্ষ্ণেয় বনে বিচরতাং তদা
ন তথা প্রণয়ো রাজ্যে যথা সংপ্রতি বর্ততে
78.9
নিবৃত্তবনবাসান্নঃ শ্রুত্বা বীর সমাগতাঃ
অক্ষৌহিণ্যো হি সপ্তেমাস্ত্বত্প্রসাদাজ্জনার্দন
78.10
ইমান্হি পুরুষব্যাঘ্রানচিন্ত্যবলপৌরুষান্
আত্তশস্ত্রান্রণে দৃষ্ট্বা ন ব্যথেদিহ কঃ পুমান্
78.11
স ভবান্কুরুমধ্যে তং সান্ত্বপূর্বং ভয়ান্বিতম্
ব্রূয়াদ্বাক্যং যথা মন্দো ন ব্যথেত সুয়োধনঃ
78.12
যুধিষ্ঠিরং ভীমসেনং বীভত্সুং চাপরাজিতম্
সহদেবং চ মাং চৈব ত্বাং চ রামং চ কেশব
78.13
সাত্যকিং চ মহাবীর্যং বিরাটং চ সহাত্মজম্
দ্রুপদং চ সহামাত্যং ধৃষ্টদ্যুম্নং চ পার্ষতম্
78.14
কাশিরাজং চ বিক্রান্তং ধৃষ্টকেতুং চ চেদিপম্
মাংসশোণিতভৃন্মর্ত্যঃ প্রতিয়ুধ্যেত কো যুধি
78.15
স ভবান্গমনাদেব সাধয়িষ্যত্যসংশয়ম্
ইষ্টমর্থং মহাবাহো ধর্মরাজস্য কেবলম্
78.16
বিদুরশ্চৈব ভীষ্মশ্চ দ্রোণশ্চ সহবাহ্লিকঃ
শ্রেয়ঃ সমর্থা বিজ্ঞাতুমুচ্যমানং ত্বয়ানঘ
78.17
তে চৈনমনুনেষ্যন্তি ধৃতরাষ্ট্রং জনাধিপম্
তং চ পাপসমাচারং সহামাত্যং সুয়োধনম্
78.18
শ্রোতা চার্থস্য বিদুরস্ত্বং চ বক্তা জনার্দন
কমিবার্থং বিবর্তন্তং স্থাপয়েতাং ন বর্ত্মনি