অধ্যায় 79

79.1

সহদেব উবাচ
যদেতত্কথিতং রাজ্ঞা ধর্ম এষ সনাতনঃ
যথা তু যুদ্ধমেব স্যাত্তথা কার্যমরিংদম

যদি প্রশমমিচ্ছেয়ুঃ কুরবঃ পাণ্ডবৈঃ সহ
তথাপি যুদ্ধং দাশার্হ যোজয়েথাঃ সহৈব তৈঃ

কথং নু দৃষ্ট্বা পাঞ্চালীং তথা ক্লিষ্টাং সভাগতাম্
অবধেন প্রশাম্যেত মম মন্যুঃ সুয়োধনে

যদি ভীমার্জুনৌ কৃষ্ণ ধর্মরাজশ্চ ধার্মিকঃ
ধর্মমুত্সৃজ্য তেনাহং যোদ্ধুমিচ্ছামি সংয়ুগে

সাত্যকিরুবাচ
সত্যমাহ মহাবাহো সহদেবো মহামতিঃ
দুর্যোধনবধে শান্তিস্তস্য কোপস্য মে ভবেৎ

জানাসি হি যথা দৃষ্ট্বা চীরাজিনধরান্বনে
তবাপি মন্যুরুদ্ভূতো দুঃখিতান্প্রেক্ষ্য পাণ্ডবান্

তস্মান্মাদ্রীসুতঃ শূরো যদাহ পুরুষর্ষভঃ
বচনং সর্বয়োধানাং তন্মতং পুরুষোত্তম

বৈশংপায়ন উবাচ
এবং বদতি বাক্যং তু যুয়ুধানে মহামতৌ
সুভীমঃ সিংহনাদোঽভূদ্যোধানাং তত্র সর্বশঃ

সর্বে হি সর্বতো বীরাস্তদ্বচঃ প্রত্যপূজয়ন্
সাধু সাধ্বিতি শৈনেয়ং হর্ষয়ন্তো যুয়ুত্সবঃ