Utshovঅধ্যায় 80
80.1
বৈশংপায়ন উবাচ
রাজ্ঞস্তু বচনং শ্রুত্বা ধর্মার্থসহিতং হিতম্
কৃষ্ণা দাশার্হমাসীনমব্রবীচ্ছোককর্ষিতা
80.2
সুতা দ্রুপদরাজস্য স্বসিতায়তমূর্ধজা
সংপূজ্য সহদেবং চ সাত্যকিং চ মহারথম্
80.3
ভীমসেনং চ সংশান্তং দৃষ্ট্বা পরমদুর্মনাঃ
অশ্রুপূর্ণেক্ষণা বাক্যমুবাচেদং মনস্বিনী
80.4
বিদিতং তে মহাবাহো ধর্মজ্ঞ মধুসূদন
যথা নিকৃতিমাস্থায় ভ্রংশিতাঃ পাণ্ডবাঃ সুখাৎ
80.5
ধৃতরাষ্ট্রস্য পুত্রেণ সামাত্যেন জনার্দন
যথা চ সংজয়ো রাজ্ঞা মন্ত্রং রহসি শ্রাবিতঃ
80.6
যুধিষ্ঠিরেণ দাশার্হ তচ্চাপি বিদিতং তব
যথোক্তঃ সংজয়শ্চৈব তচ্চ সর্বং শ্রুতং ত্বয়া
80.7
পঞ্চ নস্তাত দীয়ন্তাং গ্রামা ইতি মহাদ্যুতে
কুশস্থলং বৃকস্থলমাসন্দী বারণাবতম্
80.8
অবসানং মহাবাহো কিংচিদেব তু পঞ্চমম্
ইতি দুর্যোধনো বাচ্যঃ সুহৃদশ্চাস্য কেশব
80.9
তচ্চাপি নাকরোদ্বাক্যং শ্রুত্বা কৃষ্ণ সুয়োধনঃ
যুধিষ্ঠিরস্য দাশার্হ হ্রীমতঃ সংধিমিচ্ছতঃ
80.10
অপ্রদানেন রাজ্যস্য যদি কৃষ্ণ সুয়োধনঃ
সংধিমিচ্ছেন্ন কর্তব্যস্তত্র গত্বা কথংচন
80.11
শক্ষ্যন্তি হি মহাবাহো পাণ্ডবাঃ সৃঞ্জয়ৈঃ সহ
ধার্তরাষ্ট্রবলং ঘোরং ক্রুদ্ধং প্রতিসমাসিতুম্
80.12
ন হি সাম্না ন দানেন শক্যোঽর্থস্তেষু কশ্চন
তস্মাত্তেষু ন কর্তব্যা কৃপা তে মধুসূদন
80.13
সাম্না দানেন বা কৃষ্ণ যে ন শাম্যন্তি শত্রবঃ
মোক্তব্যস্তেষু দণ্ডঃ স্যাজ্জীবিতং পরিরক্ষতা
80.14
তস্মাত্তেষু মহাদণ্ডঃ ক্ষেপ্তব্যঃ ক্ষিপ্রমচ্যুত
ত্বয়া চৈব মহাবাহো পাণ্ডবৈঃ সহ সৃঞ্জয়ৈঃ
80.15
এতত্সমর্থং পার্থানাং তব চৈব যশস্করম্
ক্রিয়মাণং ভবেত্কৃষ্ণ ক্ষত্রস্য চ সুখাবহম্
80.16
ক্ষত্রিয়েণ হি হন্তব্যঃ ক্ষত্রিয়ো লোভমাস্থিতঃ
অক্ষত্রিয়ো বা দাশার্হ স্বধর্মমনুতিষ্ঠতা
80.17
অন্যত্র ব্রাহ্মণাত্তাত সর্বপাপেষ্ববস্থিতাৎ
গুরুর্হি সর্ববর্ণানাং ব্রাহ্মণঃ প্রসৃতাগ্রভুক্
80.18
যথাবধ্যে ভবেদ্দোষো বধ্যমানে জনার্দন
স বধ্যস্যাবধে দৃষ্ট ইতি ধর্মবিদো বিদুঃ
80.19
যথা ত্বাং ন স্পৃশেদেষ দোষঃ কৃষ্ণ তথা কুরু
পাণ্ডবৈঃ সহ দাশার্হ সৃঞ্জয়ৈশ্চ সসৈনিকৈঃ
80.20
পুনরুক্তং চ বক্ষ্যামি বিশ্রম্ভেণ জনার্দন
কা নু সীমন্তিনী মাদৃক্পৃথিব্যামস্তি কেশব
80.21
সুতা দ্রুপদরাজস্য বেদিমধ্যাত্সমুত্থিতা
ধৃষ্টদ্যুম্নস্য ভগিনী তব কৃষ্ণ প্রিয়া সখী
80.22
আজমীঢকুলং প্রাপ্তা স্নুষা পাণ্ডোর্মহাত্মনঃ
মহিষী পাণ্ডুপুত্রাণাং পঞ্চেন্দ্রসমবর্চসাম্
80.23
সুতা মে পঞ্চভির্বীরৈঃ পঞ্চ জাতা মহারথাঃ
অভিমন্যুর্যথা কৃষ্ণ তথা তে তব ধর্মতঃ
80.24
সাহং কেশগ্রহং প্রাপ্তা পরিক্লিষ্টা সভাং গতা
পশ্যতাং পাণ্ডুপুত্রাণাং ত্বয়ি জীবতি কেশব
80.25
জীবত্সু কৌরবেয়েষু পাঞ্চালেষ্বথ বৃষ্ণিষু
দাসীভূতাস্মি পাপানাং সভামধ্যে ব্যবস্থিতা
80.26
নিরামর্ষেষ্বচেষ্টেষু প্রেক্ষমাণেষু পাণ্ডুষু
ত্রাহি মামিতি গোবিন্দ মনসা কাঙ্ক্ষিতোঽসি মে
80.27
যত্র মাং ভগবান্রাজা শ্বশুরো বাক্যমব্রবীৎ
বরং বৃণীষ্ব পাঞ্চালি বরার্হাসি মতাসি মে
80.28
অদাসাঃ পাণ্ডবাঃ সন্তু সরথাঃ সায়ুধা ইতি
ময়োক্তে যত্র নির্মুক্তা বনবাসায় কেশব
80.29
এবংবিধানাং দুঃখানামভিজ্ঞোঽসি জনার্দন
ত্রাহি মাং পুণ্ডরীকাক্ষ সভর্তৃজ্ঞাতিবান্ধবাম্
80.30
নন্বহং কৃষ্ণ ভীষ্মস্য ধৃতরাষ্ট্রস্য চোভয়োঃ
স্নুষা ভবামি ধর্মেণ সাহং দাসীকৃতাভবম্
80.31
ধিগ্বলং ভীমসেনস্য ধিক্পার্থস্য ধনুষ্মতাম্
যত্র দুর্যোধনঃ কৃষ্ণ মুহূর্তমপি জীবতি
80.32
যদি তেঽহমনুগ্রাহ্যা যদি তেঽস্তি কৃপা ময়ি
ধার্তরাষ্ট্রেষু বৈ কোপঃ সর্বঃ কৃষ্ণ বিধীয়তাম্
80.33
ইত্যুক্ত্বা মৃদুসংহারং বৃজিনাগ্রং সুদর্শনম্
সুনীলমসিতাপাঙ্গী পুণ্যগন্ধাধিবাসিতম্
80.34
সর্বলক্ষণসংপন্নং মহাভুজগবর্চসম্
কেশপক্ষং বরারোহা গৃহ্য সব্যেন পাণিনা
80.35
পদ্মাক্ষী পুণ্ডরীকাক্ষমুপেত্য গজগামিনী
অশ্রুপূর্ণেক্ষণা কৃষ্ণা কৃষ্ণং বচনমব্রবীৎ
80.36
অয়ং তে পুণ্ডরীকাক্ষ দুঃশাসনকরোদ্ধৃতঃ
স্মর্তব্যঃ সর্বকালেষু পরেষাং সংধিমিচ্ছতা
80.37
যদি ভীমার্জুনৌ কৃষ্ণ কৃপণৌ সংধিকামুকৌ
পিতা মে যোত্স্যতে বৃদ্ধঃ সহ পুত্রৈর্মহারথৈঃ
80.38
পঞ্চ চৈব মহাবীর্যাঃ পুত্রা মে মধুসূদন
অভিমন্যুং পুরস্কৃত্য যোত্স্যন্তি কুরুভিঃ সহ
80.39
দুঃশাসনভুজং শ্যামং সংছিন্নং পাংসুগুণ্ঠিতম্
যদ্যহং তং ন পশ্যামি কা শান্তির্হৃদয়স্য মে
80.40
ত্রয়োদশ হি বর্ষাণি প্রতীক্ষন্ত্যা গতানি মে
নিধায় হৃদয়ে মন্যুং প্রদীপ্তমিব পাবকম্
80.41
বিদীর্যতে মে হৃদয়ং ভীমবাক্শল্যপীডিতম্
যোঽয়মদ্য মহাবাহুর্ধর্মং সমনুপশ্যতি
80.42
ইত্যুক্ত্বা বাষ্পসন্নেন কণ্ঠেনায়তলোচনা
রুরোদ কৃষ্ণা সোত্কম্পং সস্বরং বাষ্পগদ্গদম্
80.43
স্তনৌ পীনায়তশ্রোণী সহিতাবভিবর্ষতী
দ্রবীভূতমিবাত্যুষ্ণমুত্সৃজদ্বারি নেত্রজম্
80.44
তামুবাচ মহাবাহুঃ কেশবঃ পরিসান্ত্বয়ন্
অচিরাদ্দ্রক্ষ্যসে কৃষ্ণে রুদতীর্ভরতস্ত্রিয়ঃ
80.45
এবং তা ভীরু রোত্স্যন্তি নিহতজ্ঞাতিবান্ধবাঃ
হতমিত্রা হতবলা যেষাং ক্রুদ্ধাসি ভামিনি
80.46
অহং চ তত্করিষ্যামি ভীমার্জুনয়মৈঃ সহ
যুধিষ্ঠিরনিয়োগেন দৈবাচ্চ বিধিনির্মিতাৎ
80.47
ধার্তরাষ্ট্রাঃ কালপক্বা ন চেচ্ছৃণ্বন্তি মে বচঃ
শেষ্যন্তে নিহতা ভূমৌ শ্বশৃগালাদনীকৃতাঃ
80.48
চলেদ্ধি হিমবাঞ্শৈলো মেদিনী শতধা ভবেৎ
দ্যৌঃ পতেচ্চ সনক্ষত্রা ন মে মোঘং বচো ভবেৎ
80.49
সত্যং তে প্রতিজানামি কৃষ্ণে বাষ্পো নিগৃহ্যতাম্
হতামিত্রাঞ্শ্রিয়া যুক্তানচিরাদ্দ্রক্ষ্যসে পতীন্