Utshovঅধ্যায় 81
81.1
অর্জুন উবাচ
কুরূণামদ্য সর্বেষাং ভবান্সুহৃদনুত্তমঃ
সংবন্ধী দয়িতো নিত্যমুভয়োঃ পক্ষয়োরপি
81.2
পাণ্ডবৈর্ধার্তরাষ্ট্রাণাং প্রতিপাদ্যমনাময়ম্
সমর্থঃ প্রশমং চৈষাং কর্তুং ত্বমসি কেশব
81.3
ত্বমিতঃ পুণ্ডরীকাক্ষ সুয়োধনমমর্ষণম্
শান্ত্যর্থং ভারতং ব্রূয়া যত্তদ্বাচ্যমমিত্রহন্
81.4
ত্বয়া ধর্মার্থয়ুক্তং চেদুক্তং শিবমনাময়ম্
হিতং নাদাস্যতে বালো দিষ্টস্য বশমেষ্যতি
81.5
ভগবানুবাচ
ধর্ম্যমস্মদ্ধিতং চৈব কুরূণাং যদনাময়ম্
এষ যাস্যামি রাজানং ধৃতরাষ্ট্রমভীপ্সয়া
81.6
বৈশংপায়ন উবাচ
ততো ব্যপেতে তমসি সূর্যে বিমল উদ্গতে
মৈত্রে মুহূর্তে সংপ্রাপ্তে মৃদ্বর্চিষি দিবাকরে
81.7
কৌমুদে মাসি রেবত্যাং শরদন্তে হিমাগমে
স্ফীতসস্যসুখে কালে কল্যঃ সত্ত্ববতাং বরঃ
81.8
মঙ্গল্যাঃ পুণ্যনির্ঘোষা বাচঃ শৃণ্বংশ্চ সূনৃতাঃ
ব্রাহ্মণানাং প্রতীতানামৃষীণামিব বাসবঃ
81.9
কৃত্বা পৌর্বাহ্ণিকং কৃত্যং স্নাতঃ শুচিরলংকৃতঃ
উপতস্থে বিবস্বন্তং পাবকং চ জনার্দনঃ
81.10
ঋষভং পৃষ্ঠ আলভ্য ব্রাহ্মণানভিবাদ্য চ
অগ্নিং প্রদক্ষিণং কৃত্বা পশ্যন্কল্যাণমগ্রতঃ
81.11
তত্প্রতিজ্ঞায় বচনং পাণ্ডবস্য জনার্দনঃ
শিনের্নপ্তারমাসীনমভ্যভাষত সাত্যকিম্
81.12
রথ আরোপ্যতাং শঙ্খশ্চক্রং চ গদয়া সহ
উপাসঙ্গাশ্চ শক্ত্যশ্চ সর্বপ্রহরণানি চ
81.13
দুর্যোধনো হি দুষ্টাত্মা কর্ণশ্চ সহসৌবলঃ
ন চ শত্রুরবজ্ঞেয়ঃ প্রাকৃতোঽপি বলীয়সা
81.14
ততস্তন্মতমাজ্ঞায় কেশবস্য পুরঃসরাঃ
প্রসস্রুর্যোজয়িষ্যন্তো রথং চক্রগদাভৃতঃ
81.15
তং দীপ্তমিব কালাগ্নিমাকাশগমিবাধ্বগম্
চন্দ্রসূর্যপ্রকাশাভ্যাং চক্রাভ্যাং সমলংকৃতম্
81.16
অর্ধচন্দ্রৈশ্চ চন্দ্রৈশ্চ মত্স্যৈঃ সমৃগপক্ষিভিঃ
পুষ্পৈশ্চ বিবিধৈশ্চিত্রং মণিরত্নৈশ্চ সর্বশঃ
81.17
তরুণাদিত্যসংকাশং বৃহন্তং চারুদর্শনম্
মণিহেমবিচিত্রাঙ্গং সুধ্বজং সুপতাকিনম্
81.18
সূপস্করমনাধৃষ্যং বৈয়াঘ্রপরিবারণম্
যশোঘ্নং প্রত্যমিত্রাণাং যদূনাং নন্দিবর্ধনম্
81.19
বাজিভিঃ সৈন্যসুগ্রীবমেঘপুষ্পবলাহকৈঃ
স্নাতৈঃ সংপাদয়াং চক্রুঃ সংপন্নৈঃ সর্বসংপদা
81.20
মহিমানং তু কৃষ্ণস্য ভূয় এবাভিবর্ধয়ন্
সুঘোষঃ পতগেন্দ্রেণ ধ্বজেন যুয়ুজে রথঃ
81.21
তং মেরুশিখরপ্রখ্যং মেঘদুন্দুভিনিস্বনম্
আরুরোহ রথং শৌরির্বিমানমিব পুণ্যকৃৎ
81.22
ততঃ সাত্যকিমারোপ্য প্রয়য়ৌ পুরুষোত্তমঃ
পৃথিবীং চান্তরিক্ষং চ রথঘোষেণ নাদয়ন্
81.23
ব্যপোঢাভ্রঘনঃ কালঃ ক্ষণেন সমপদ্যত
শিবশ্চানুববৌ বায়ুঃ প্রশান্তমভবদ্রজঃ
81.24
প্রদক্ষিণানুলোমাশ্চ মঙ্গল্যা মৃগপক্ষিণঃ
প্রয়াণে বাসুদেবস্য বভূবুরনুয়ায়িনঃ
81.25
মঙ্গল্যার্থপদৈঃ শব্দৈরন্ববর্তন্ত সর্বশঃ
সারসাঃ শতপত্রাশ্চ হংসাশ্চ মধুসূদনম্
81.26
মন্ত্রাহুতিমহাহোমৈর্হূয়মানশ্চ পাবকঃ
প্রদক্ষিণশিখো ভূত্বা বিধূমঃ সমপদ্যত
81.27
বসিষ্ঠো বামদেবশ্চ ভূরিদ্যুম্নো গয়ঃ ক্রথঃ
শুক্রনারদবাল্মীকা মরুতঃ কুশিকো ভৃগুঃ
81.28
ব্রহ্মদেবর্ষয়শ্চৈব কৃষ্ণং যদুসুখাবহম্
প্রদক্ষিণমবর্তন্ত সহিতা বাসবানুজম্
81.29
এবমেতৈর্মহাভাগৈর্মহর্ষিগণসাধুভিঃ
পূজিতঃ প্রয়য়ৌ কৃষ্ণঃ কুরূণাং সদনং প্রতি
81.30
তং প্রয়ান্তমনুপ্রায়াত্কুন্তীপুত্রো যুধিষ্ঠিরঃ
ভীমসেনার্জুনৌ চোভৌ মাদ্রীপুত্রৌ চ পাণ্ডবৌ
81.31
চেকিতানশ্চ বিক্রান্তো ধৃষ্টকেতুশ্চ চেদিপঃ
দ্রুপদঃ কাশিরাজশ্চ শিখণ্ডী চ মহারথঃ
81.32
ধৃষ্টদ্যুম্নঃ সপুত্রশ্চ বিরাটঃ কেকয়ৈঃ সহ
সংসাধনার্থং প্রয়য়ুঃ ক্ষত্রিয়াঃ ক্ষত্রিয়র্ষভম্
81.33
ততোঽনুব্রজ্য গোবিন্দং ধর্মরাজো যুধিষ্ঠিরঃ
রাজ্ঞাং সকাশে দ্যুতিমানুবাচেদং বচস্তদা
81.34
যো নৈব কামান্ন ভয়ান্ন লোভান্নার্থকারণাৎ
অন্যায়মনুবর্তেত স্থিরবুদ্ধিরলোলুপঃ
81.35
ধর্মজ্ঞো ধৃতিমান্প্রাজ্ঞঃ সর্বভূতেষু কেশবঃ
ঈশ্বরঃ সর্বভূতানাং দেবদেবঃ প্রতাপবান্
81.36
তং সর্বগুণসংপন্নং শ্রীবত্সকৃতলক্ষণম্
সংপরিষ্বজ্য কৌন্তেয়ঃ সংদেষ্টুমুপচক্রমে
81.37
যা সা বাল্যাত্প্রভৃত্যস্মান্পর্যবর্ধয়তাবলা
উপবাসতপঃশীলা সদা স্বস্ত্যয়নে রতা
81.38
দেবতাতিথিপূজাসু গুরুশুশ্রূষণে রতা
বত্সলা প্রিয়পুত্রা চ প্রিয়াস্মাকং জনার্দন
81.39
সুয়োধনভয়াদ্যা নোঽত্রায়তামিত্রকর্শন
মহতো মৃত্যুসংবাধাদুত্তরন্নৌরিবার্ণবাৎ
81.40
অস্মত্কৃতে চ সততং যয়া দুঃখানি মাধব
অনুভূতান্যদুঃখার্হা তাং স্ম পৃচ্ছেরনাময়ম্
81.41
ভৃশমাশ্বাসয়েশ্চৈনাং পুত্রশোকপরিপ্লুতাম্
অভিবাদ্য স্বজেথাশ্চ পাণ্ডবান্পরিকীর্তয়ন্
81.42
ঊঢাত্প্রভৃতি দুঃখানি শ্বশুরাণামরিংদম
নিকারানতদর্হা চ পশ্যন্তী দুঃখমশ্নুতে
81.43
অপি জাতু স কালঃ স্যাত্কৃষ্ণ দুঃখবিপর্যয়ঃ
যদহং মাতরং ক্লিষ্টাং সুখে দধ্যামরিংদম
81.44
প্রব্রজন্তোঽন্বধাবত্সা কৃপণা পুত্রগৃদ্ধিনী
রুদতীমপহায়ৈনামুপগচ্ছাম যদ্বনম্
81.45
ন নূনং ম্রিয়তে দুঃখৈঃ সা চেজ্জীবতি কেশব
তথা পুত্রাধিভির্গাঢমার্তা হ্যানর্তসত্কৃতা
81.46
অভিবাদ্যা তু সা কৃষ্ণ ত্বয়া মদ্বচনাদ্বিভো
ধৃতরাষ্ট্রশ্চ কৌরব্যো রাজানশ্চ বয়োঽধিকাঃ
81.47
ভীষ্মং দ্রোণং কৃপং চৈব মহারাজং চ বাহ্লিকম্
দ্রৌণিং চ সোমদত্তং চ সর্বাংশ্চ ভরতান্পৃথক্
81.48
বিদুরং চ মহাপ্রাজ্ঞং কুরূণাং মন্ত্রধারিণম্
অগাধবুদ্ধিং ধর্মজ্ঞং স্বজেথা মধুসূদন
81.49
ইত্যুক্ত্বা কেশবং তত্র রাজমধ্যে যুধিষ্ঠিরঃ
অনুজ্ঞাতো নিববৃতে কৃষ্ণং কৃত্বা প্রদক্ষিণম্
81.50
ব্রজন্নেব তু বীভত্সুঃ সখায়ং পুরুষর্ষভম্
অব্রবীত্পরবীরঘ্নং দাশার্হমপরাজিতম্
81.51
যদস্মাকং বিভো বৃত্তং পুরা বৈ মন্ত্রনিশ্চয়ে
অর্ধরাজ্যস্য গোবিন্দ বিদিতং সর্বরাজসু
81.52
তচ্চেদ্দদ্যাদসঙ্গেন সত্কৃত্যানবমন্য চ
প্রিয়ং মে স্যান্মহাবাহো মুচ্যেরন্মহতো ভয়াৎ
81.53
অতশ্চেদন্যথা কর্তা ধার্তরাষ্ট্রোঽনুপায়বিৎ
অন্তং নূনং করিষ্যামি ক্ষত্রিয়াণাং জনার্দন
81.54
এবমুক্তে পাণ্ডবেন পর্যহৃষ্যদ্বৃকোদরঃ
মুহুর্মুহুঃ ক্রোধবশাত্প্রাবেপত চ পাণ্ডবঃ
81.55
বেপমানশ্চ কৌন্তেয়ঃ প্রাক্রোশন্মহতো রবান্
ধনংজয়বচঃ শ্রুত্বা হর্ষোত্সিক্তমনা ভৃশম্
81.56
তস্য তং নিনদং শ্রুত্বা সংপ্রাবেপন্ত ধন্বিনঃ
বাহনানি চ সর্বাণি শকৃন্মূত্রং প্রসুস্রুবুঃ
81.57
ইত্যুক্ত্বা কেশবং তত্র তথা চোক্ত্বা বিনিশ্চয়ম্
অনুজ্ঞাতো নিববৃতে পরিষ্বজ্য জনার্দনম্
81.58
তেষু রাজসু সর্বেষু নিবৃত্তেষু জনার্দনঃ
তূর্ণমভ্যপতদ্ধৃষ্টঃ সৈন্যসুগ্রীববাহনঃ
81.59
তে হয়া বাসুদেবস্য দারুকেণ প্রচোদিতাঃ
পন্থানমাচেমুরিব গ্রসমানা ইবাম্বরম্
81.60
অথাপশ্যন্মহাবাহুরৃষীনধ্বনি কেশবঃ
ব্রাহ্ম্যা শ্রিয়া দীপ্যমানান্স্থিতানুভয়তঃ পথি
81.61
সোঽবতীর্য রথাত্তূর্ণমভিবাদ্য জনার্দনঃ
যথাবত্তানৃষীন্সর্বানভ্যভাষত পূজয়ন্
81.62
কচ্চিল্লোকেষু কুশলং কচ্চিদ্ধর্মঃ স্বনুষ্ঠিতঃ
ব্রাহ্মণানাং ত্রয়ো বর্ণাঃ কচ্চিত্তিষ্ঠন্তি শাসনে
81.63
তেভ্যঃ প্রয়ুজ্য তাং পূজাং প্রোবাচ মধুসূদনঃ
ভগবন্তঃ ক্ব সংসিদ্ধাঃ কা বীথী ভবতামিহ
81.64
কিং বা ভগবতাং কার্যমহং কিং করবাণি বঃ
কেনার্থেনোপসংপ্রাপ্তা ভগবন্তো মহীতলম্
81.65
তমব্রবীজ্জামদগ্ন্য উপেত্য মধুসূদনম্
পরিষ্বজ্য চ গোবিন্দং পুরা সুচরিতে সখা
81.66
দেবর্ষয়ঃ পুণ্যকৃতো ব্রাহ্মণাশ্চ বহুশ্রুতাঃ
রাজর্ষয়শ্চ দাশার্হ মানয়ন্তস্তপস্বিনঃ
81.67
দেবাসুরস্য দ্রষ্টারঃ পুরাণস্য মহাদ্যুতে
সমেতং পার্থিবং ক্ষত্রং দিদৃক্ষন্তশ্চ সর্বতঃ
81.68
সভাসদশ্চ রাজানস্ত্বাং চ সত্যং জনার্দন
এতন্মহত্প্রেক্ষণীয়ং দ্রষ্টুং গচ্ছাম কেশব
81.69
ধর্মার্থসহিতা বাচঃ শ্রোতুমিচ্ছাম মাধব
ত্বয়োচ্যমানাঃ কুরুষু রাজমধ্যে পরংতপ
81.70
ভীষ্মদ্রোণাদয়শ্চৈব বিদুরশ্চ মহামতিঃ
ত্বং চ যাদবশার্দূল সভায়াং বৈ সমেষ্যথ
81.71
তব বাক্যানি দিব্যানি তত্র তেষাং চ মাধব
শ্রোতুমিচ্ছাম গোবিন্দ সত্যানি চ শুভানি চ
81.72
আপৃষ্টোঽসি মহাবাহো পুনর্দ্রক্ষ্যামহে বয়ম্
যাহ্যবিঘ্নেন বৈ বীর দ্রক্ষ্যামস্ত্বাং সভাগতম্