Utshovঅধ্যায় 82
82.1
বৈশংপায়ন উবাচ
প্রয়ান্তং দেবকীপুত্রং পরবীররুজো দশ
মহারথা মহাবাহুমন্বয়ুঃ শস্ত্রপাণয়ঃ
82.2
পদাতীনাং সহস্রং চ সাদিনাং চ পরংতপ
ভোজ্যং চ বিপুলং রাজন্প্রেষ্যাশ্চ শতশোঽপরে
82.3
জনমেজয় উবাচ
কথং প্রয়াতো দাশার্হো মহাত্মা মধুসূদনঃ
কানি বা ব্রজতস্তস্য নিমিত্তানি মহৌজসঃ
82.4
বৈশংপায়ন উবাচ
তস্য প্রয়াণে যান্যাসন্নদ্ভুতানি মহাত্মনঃ
তানি মে শৃণু দিব্যানি দৈবান্যৌত্পাতিকানি চ
82.5
অনভ্রেঽশনিনির্ঘোষঃ সবিদ্যুত্সমজায়ত
অন্বগেব চ পর্জন্যঃ প্রাবর্ষদ্বিঘনে ভৃশম্
82.6
প্রত্যগূহুর্মহানদ্যঃ প্রাঙ্মুখাঃ সিন্ধুসত্তমাঃ
বিপরীতা দিশঃ সর্বা ন প্রাজ্ঞায়ত কিংচন
82.7
প্রাজ্বলন্নগ্নয়ো রাজন্পৃথিবী সমকম্পত
উদপানাশ্চ কুম্ভাশ্চ প্রাসিঞ্চঞ্শতশো জলম্
82.8
তমঃসংবৃতমপ্যাসীত্সর্বং জগদিদং তদা
ন দিশো নাদিশো রাজন্প্রজ্ঞায়ন্তে স্ম রেণুনা
82.9
প্রাদুরাসীন্মহাঞ্শব্দঃ খে শরীরং ন দৃশ্যতে
সর্বেষু রাজন্দেশেষু তদদ্ভুতমিবাভবৎ
82.10
প্রামথ্নাদ্ধাস্তিনপুরং বাতো দক্ষিণপশ্চিমঃ
আরুজন্গণশো বৃক্ষান্পরুষো ভীমনিস্বনঃ
82.11
যত্র যত্র তু বার্ষ্ণেয়ো বর্ততে পথি ভারত
তত্র তত্র সুখো বায়ুঃ সর্বং চাসীত্প্রদক্ষিণম্
82.12
ববর্ষ পুষ্পবর্ষং চ কমলানি চ ভূরিশঃ
সমশ্চ পন্থা নির্দুঃখো ব্যপেতকুশকণ্টকঃ
82.13
স গচ্ছন্ব্রাহ্মণৈ রাজংস্তত্র তত্র মহাভুজঃ
অর্চ্যতে মধুপর্কৈশ্চ সুমনোভির্বসুপ্রদঃ
82.14
তং কিরন্তি মহাত্মানং বন্যৈঃ পুষ্পৈঃ সুগন্ধিভিঃ
স্ত্রিয়ঃ পথি সমাগম্য সর্বভূতহিতে রতম্
82.15
স শালিভবনং রম্যং সর্বসস্যসমাচিতম্
সুখং পরমধর্মিষ্ঠমত্যগাদ্ভরতর্ষভ
82.16
পশ্যন্বহুপশূন্গ্রামান্রম্যান্হৃদয়তোষণান্
পুরাণি চ ব্যতিক্রামন্রাষ্ট্রাণি বিবিধানি চ
82.17
নিত্যহৃষ্টাঃ সুমনসো ভারতৈরভিরক্ষিতাঃ
নোদ্বিগ্নাঃ পরচক্রাণামনয়ানামকোবিদাঃ
82.18
উপপ্লব্যাদথায়ান্তং জনাঃ পুরনিবাসিনঃ
পথ্যতিষ্ঠন্ত সহিতা বিষ্বক্সেনদিদৃক্ষয়া
82.19
তে তু সর্বে সুনামানমগ্নিমিদ্ধমিব প্রভুম্
অর্চয়ামাসুরর্চ্যং তং দেশাতিথিমুপস্থিতম্
82.20
বৃকস্থলং সমাসাদ্য কেশবঃ পরবীরহা
প্রকীর্ণরশ্মাবাদিত্যে বিমলে লোহিতায়তি
82.21
অবতীর্য রথাত্তূর্ণং কৃত্বা শৌচং যথাবিধি
রথমোচনমাদিশ্য সংধ্যামুপবিবেশ হ
82.22
দারুকোঽপি হয়ান্মুক্ত্বা পরিচর্য চ শাস্ত্রতঃ
মুমোচ সর্বং বর্মাণি মুক্ত্বা চৈনানবাসৃজৎ
82.23
অভ্যতীত্য তু তত্সর্বমুবাচ মধুসূদনঃ
যুধিষ্ঠিরস্য কার্যার্থমিহ বত্স্যামহে ক্ষপাম্
82.24
তস্য তন্মতমাজ্ঞায় চক্রুরাবসথং নরাঃ
ক্ষণেন চান্নপানানি গুণবন্তি সমার্জয়ন্
82.25
তস্মিন্গ্রামে প্রধানাস্তু য আসন্ব্রাহ্মণা নৃপ
আর্যাঃ কুলীনা হ্রীমন্তো ব্রাহ্মীং বৃত্তিমনুষ্ঠিতাঃ
82.26
তেঽভিগম্য মহাত্মানং হৃষীকেশমরিংদমম্
পূজাং চক্রুর্যথান্যায়মাশীর্মঙ্গলসংয়ুতাম্
82.27
তে পূজয়িত্বা দাশার্হং সর্বলোকেষু পূজিতম্
ন্যবেদয়ন্ত বেশ্মানি রত্নবন্তি মহাত্মনে
82.28
তান্প্রভুঃ কৃতমিত্যুক্ত্বা সত্কৃত্য চ যথার্হতঃ
অভ্যেত্য তেষাং বেশ্মানি পুনরায়াত্সহৈব তৈঃ
82.29
সুমৃষ্টং ভোজয়িত্বা চ ব্রাহ্মণাংস্তত্র কেশবঃ
ভুক্ত্বা চ সহ তৈঃ সর্বৈরবসত্তাং ক্ষপাং সুখম্