অধ্যায় 83

83.1

বৈশংপায়ন উবাচ
তথা দূতৈঃ সমাজ্ঞায় আয়ান্তং মধুসূদনম্
ধৃতরাষ্ট্রোঽব্রবীদ্ভীষ্মমর্চয়িত্বা মহাভুজম্

দ্রোণং চ সংজয়ং চৈব বিদুরং চ মহামতিম্
দুর্যোধনং চ সামাত্যং হৃষ্টরোমাব্রবীদিদম্

অদ্ভুতং মহদাশ্চর্যং শ্রূয়তে কুরুনন্দন
স্ত্রিয়ো বালাশ্চ বৃদ্ধাশ্চ কথয়ন্তি গৃহে গৃহে

সত্কৃত্যাচক্ষতে চান্যে তথৈবান্যে সমাগতাঃ
পৃথগ্বাদাশ্চ বর্তন্তে চত্বরেষু সভাসু চ

উপয়াস্যতি দাশার্হঃ পাণ্ডবার্থে পরাক্রমী
স নো মান্যশ্চ পূজ্যশ্চ সর্বথা মধুসূদনঃ

তস্মিন্হি যাত্রা লোকস্য ভূতানামীশ্বরো হি সঃ
তস্মিন্ধৃতিশ্চ বীর্যং চ প্রজ্ঞা চৌজশ্চ মাধবে

স মান্যতাং নরশ্রেষ্ঠঃ স হি ধর্মঃ সনাতনঃ
পূজিতো হি সুখায় স্যাদসুখঃ স্যাদপূজিতঃ

স চেত্তুষ্যতি দাশার্হ উপচারৈররিংদমঃ
কৃত্স্নান্সর্বানভিপ্রায়ান্প্রাপ্স্যামঃ সর্বরাজসু

তস্য পূজার্থমদ্যৈব সংবিধত্স্ব পরংতপ
সভাঃ পথি বিধীয়ন্তাং সর্বকামসমাহিতাঃ

যথা প্রীতির্মহাবাহো ত্বয়ি জায়েত তস্য বৈ
তথা কুরুষ্ব গান্ধারে কথং বা ভীষ্ম মন্যসে

ততো ভীষ্মাদয়ঃ সর্বে ধৃতরাষ্ট্রং জনাধিপম্
ঊচুঃ পরমমিত্যেবং পূজয়ন্তোঽস্য তদ্বচঃ

তেষামনুমতং জ্ঞাত্বা রাজা দুর্যোধনস্তদা
সভাবাস্তূনি রম্যাণি প্রদেষ্টুমুপচক্রমে

ততো দেশেষু দেশেষু রমণীয়েষু ভাগশঃ
সর্বরত্নসমাকীর্ণাঃ সভাশ্চক্রুরনেকশঃ

আসনানি বিচিত্রাণি যুক্তানি বিবিধৈর্গুণৈঃ
স্ত্রিয়ো গন্ধানলংকারান্সূক্ষ্মাণি বসনানি চ

গুণবন্ত্যন্নপানানি ভোজ্যানি বিবিধানি চ
মাল্যানি চ সুগন্ধীনি তানি রাজা দদৌ ততঃ

বিশেষতশ্চ বাসার্থং সভাং গ্রামে বৃকস্থলে
বিদধে কৌরবো রাজা বহুরত্নাং মনোরমাম্

এতদ্বিধায় বৈ সর্বং দেবার্হমতিমানুষম্
আচখ্যৌ ধৃতরাষ্ট্রায় রাজা দুর্যোধনস্তদা

তাঃ সভাঃ কেশবঃ সর্বা রত্নানি বিবিধানি চ
অসমীক্ষ্যৈব দাশার্হ উপায়াত্কুরুসদ্ম তৎ