অধ্যায় 84

84.1

ধৃতরাষ্ট্র উবাচ
উপপ্লব্যাদিহ ক্ষত্তরুপয়াতো জনার্দনঃ
বৃকস্থলে নিবসতি স চ প্রাতরিহেষ্যতি

আহুকানামধিপতিঃ পুরোগঃ সর্বসাত্বতাম্
মহামনা মহাবীর্যো মহামাত্রো জনার্দনঃ

স্ফীতস্য বৃষ্ণিবংশস্য ভর্তা গোপ্তা চ মাধবঃ
ত্রয়াণামপি লোকানাং ভগবান্প্রপিতামহঃ

বৃষ্ণ্যন্ধকাঃ সুমনসো যস্য প্রজ্ঞামুপাসতে
আদিত্যা বসবো রুদ্রা যথা বুদ্ধিং বৃহস্পতেঃ

তস্মৈ পূজাং প্রয়োক্ষ্যামি দাশার্হায় মহাত্মনে
প্রত্যক্ষং তব ধর্মজ্ঞ তন্মে কথয়তঃ শৃণু

একবর্ণৈঃ সুকৃষ্ণাঙ্গৈর্বাহ্লিজাতৈর্হয়োত্তমৈঃ
চতুর্যুক্তান্রথাংস্তস্মৈ রৌক্মান্দাস্যামি ষোডশ

নিত্যপ্রভিন্নান্মাতঙ্গানীষাদন্তান্প্রহারিণঃ
অষ্টানুচরমেকৈকমষ্টৌ দাস্যামি কেশবে

দাসীনামপ্রজাতানাং শুভানাং রুক্মবর্চসাম্
শতমস্মৈ প্রদাস্যামি দাসানামপি তাবতঃ

আবিকং বহু সুস্পর্শং পার্বতীয়ৈরুপাহৃতম্
তদপ্যস্মৈ প্রদাস্যামি সহস্রাণি দশাষ্ট চ

অজিনানাং সহস্রাণি চীনদেশোদ্ভবানি চ
তান্যপ্যস্মৈ প্রদাস্যামি যাবদর্হতি কেশবঃ

দিবা রাত্রৌ চ ভাত্যেষ সুতেজা বিমলো মণিঃ
তমপ্যস্মৈ প্রদাস্যামি তমপ্যর্হতি কেশবঃ

একেনাপি পতত্যহ্না যোজনানি চতুর্দশ
যানমশ্বতরীয়ুক্তং দাস্যে তস্মৈ তদপ্যহম্

যাবন্তি বাহনান্যস্য যাবন্তঃ পুরুষাশ্চ তে
ততোঽষ্টগুণমপ্যস্মৈ ভোজ্যং দাস্যাম্যহং সদা

মম পুত্রাশ্চ পৌত্রাশ্চ সর্বে দুর্যোধনাদৃতে
প্রত্যুদ্যাস্যন্তি দাশার্হং রথৈর্মৃষ্টৈরলংকৃতাঃ

স্বলংকৃতাশ্চ কল্যাণ্যঃ পাদৈরেব সহস্রশঃ
বারমুখ্যা মহাভাগং প্রত্যুদ্যাস্যন্তি কেশবম্

নগরাদপি যাঃ কাশ্চিদ্গমিষ্যন্তি জনার্দনম্
দ্রষ্টুং কন্যাশ্চ কল্যাণ্যস্তাশ্চ যাস্যন্ত্যনাবৃতাঃ

সস্ত্রীপুরুষবালং হি নগরং মধুসূদনম্
উদীক্ষতে মহাত্মানং ভানুমন্তমিব প্রজাঃ

মহাধ্বজপতাকাশ্চ ক্রিয়ন্তাং সর্বতোদিশম্
জলাবসিক্তো বিরজাঃ পন্থাস্তস্যেতি চান্বশাৎ

দুঃশাসনস্য চ গৃহং দুর্যোধনগৃহাদ্বরম্
তদস্য ক্রিয়তাং ক্ষিপ্রং সুসংমৃষ্টমলংকৃতম্

এতদ্ধি রুচিরাকারৈঃ প্রাসাদৈরুপশোভিতম্
শিবং চ রমণীয়ং চ সর্বর্তু সুমহাধনম্

সর্বমস্মিন্গৃহে রত্নং মম দুর্যোধনস্য চ
যদ্যদর্হেত্স বার্ষ্ণেয়স্তত্তদ্দেয়মসংশয়ম্