অধ্যায় 85

85.1

বিদুর উবাচ
রাজন্বহুমতশ্চাসি ত্রৈলোক্যস্যাপি সত্তমঃ
সংভাবিতশ্চ লোকস্য সংমতশ্চাসি ভারত

যত্ত্বমেবংগতে ব্রূয়াঃ পশ্চিমে বয়সি স্থিতঃ
শাস্ত্রাদ্বা সুপ্রতর্কাদ্বা সুস্থিরঃ স্থবিরো হ্যসি

লেখাশ্মনীব ভাঃ সূর্যে মহোর্মিরিব সাগরে
ধর্মস্ত্বয়ি মহান্রাজন্নিতি ব্যবসিতাঃ প্রজাঃ

সদৈব ভাবিতো লোকো গুণৌঘৈস্তব পার্থিব
গুণানাং রক্ষণে নিত্যং প্রয়তস্ব সবান্ধবঃ

আর্জবং প্রতিপদ্যস্ব মা বাল্যাদ্বহুধা নশীঃ
রাজ্যং পুত্রাংশ্চ পৌত্রাংশ্চ সুহৃদশ্চাপি সুপ্রিয়ান্

যত্ত্বং দিত্সসি কৃষ্ণায় রাজন্নতিথয়ে বহু
এতদন্যচ্চ দাশার্হঃ পৃথিবীমপি চার্হতি

ন তু ত্বং ধর্মমুদ্দিশ্য তস্য বা প্রিয়কারণাৎ
এতদিচ্ছসি কৃষ্ণায় সত্যেনাত্মানমালভে

মায়ৈষাতত্ত্বমেবৈতচ্ছদ্মৈতদ্ভূরিদক্ষিণ
জানামি তে মতং রাজন্গূঢং বাহ্যেন কর্মণা

পঞ্চ পঞ্চৈব লিপ্সন্তি গ্রামকান্পাণ্ডবা নৃপ
ন চ দিত্সসি তেভ্যস্তাংস্তচ্ছমং কঃ করিষ্যতি

অর্থেন তু মহাবাহুং বার্ষ্ণেয়ং ত্বং জিহীর্ষসি
অনেনৈবাভ্যুপায়েন পাণ্ডবেভ্যো বিভিত্সসি

ন চ বিত্তেন শক্যোঽসৌ নোদ্যমেন ন গর্হয়া
অন্যো ধনংজয়াত্কর্তুমেতত্তত্ত্বং ব্রবীমি তে

বেদ কৃষ্ণস্য মাহাত্ম্যং বেদাস্য দৃঢভক্তিতাম্
অত্যাজ্যমস্য জানামি প্রাণৈস্তুল্যং ধনংজয়ম্

অন্যত্কুম্ভাদপাং পূর্ণাদন্যত্পাদাবসেচনাৎ
অন্যত্কুশলসংপ্রশ্নান্নৈষিষ্যতি জনার্দনঃ

যত্ত্বস্য প্রিয়মাতিথ্যং মানার্হস্য মহাত্মনঃ
তদস্মৈ ক্রিয়তাং রাজন্মানার্হো হি জনার্দনঃ

আশংসমানঃ কল্যাণং কুরূনভ্যেতি কেশবঃ
যেনৈব রাজন্নর্থেন তদেবাস্মা উপাকুরু

শমমিচ্ছতি দাশার্হস্তব দুর্যোধনস্য চ
পাণ্ডবানাং চ রাজেন্দ্র তদস্য বচনং কুরু

পিতাসি রাজন্পুত্রাস্তে বৃদ্ধস্ত্বং শিশবঃ পরে
বর্তস্ব পিতৃবত্তেষু বর্তন্তে তে হি পুত্রবৎ