UtshovChapter 85
85.1
विदुर उवाच
राजन्बहुमतश्चासि त्रैलोक्यस्यापि सत्तमः
संभावितश्च लोकस्य संमतश्चासि भारत
Vidura uvacha
Rajanbahumatashchasi trailokyasyapi sattamah
Sambhavitashcha lokasya sammatashchasi bharata
85.2
यत्त्वमेवंगते ब्रूयाः पश्चिमे वयसि स्थितः
शास्त्राद्वा सुप्रतर्काद्वा सुस्थिरः स्थविरो ह्यसि
Yattvamevangate bruyah pashchime vayasi sthitah
Shastradva supratarkadva susthirah sthaviro hyasi
85.3
लेखाश्मनीव भाः सूर्ये महोर्मिरिव सागरे
धर्मस्त्वयि महान्राजन्निति व्यवसिताः प्रजाः
Lekhashmaniva bhah surye mahormiriva sagare
Dharmastvayi mahanrajanniti vyavasitah prajah
85.4
सदैव भावितो लोको गुणौघैस्तव पार्थिव
गुणानां रक्षणे नित्यं प्रयतस्व सबान्धवः
Sadaiva bhavito loko gunaughaistava parthiva
Gunanam rakshane nityam prayatasva sabandhavah
85.5
आर्जवं प्रतिपद्यस्व मा बाल्याद्बहुधा नशीः
राज्यं पुत्रांश्च पौत्रांश्च सुहृदश्चापि सुप्रियान्
Arjavam pratipadyasva ma balyadbahudha nashih
Rajyam putranshcha pautranshcha suhridashchapi supriyan
85.6
यत्त्वं दित्ससि कृष्णाय राजन्नतिथये बहु
एतदन्यच्च दाशार्हः पृथिवीमपि चार्हति
Yattvam ditsasi krishnaya rajannatithaye bahu
Etadanyachcha dasharhah prithivimapi charhati
85.7
न तु त्वं धर्ममुद्दिश्य तस्य वा प्रियकारणात्
एतदिच्छसि कृष्णाय सत्येनात्मानमालभे
Na tu tvam dharmamuddishya tasya va priyakaranat
Etadichchhasi krishnaya satyenatmanamalabhe
85.8
मायैषातत्त्वमेवैतच्छद्मैतद्भूरिदक्षिण
जानामि ते मतं राजन्गूढं बाह्येन कर्मणा
Mayaishatattvamevaitachchhadmaitadbhuridakshina
Janami te matam rajangudham bahyena karmana
85.9
पञ्च पञ्चैव लिप्सन्ति ग्रामकान्पाण्डवा नृप
न च दित्ससि तेभ्यस्तांस्तच्छमं कः करिष्यति
Pancha panchaiva lipsanti gramakanpandava nripa
Na cha ditsasi tebhyastanstachchhamam kah karishyati
85.10
अर्थेन तु महाबाहुं वार्ष्णेयं त्वं जिहीर्षसि
अनेनैवाभ्युपायेन पाण्डवेभ्यो बिभित्ससि
Arthena tu mahabahum varshneyam tvam jihirshasi
Anenaivabhyupayena pandavebhyo bibhitsasi
85.11
न च वित्तेन शक्योऽसौ नोद्यमेन न गर्हया
अन्यो धनंजयात्कर्तुमेतत्तत्त्वं ब्रवीमि ते
Na cha vittena shakyosau nodyamena na garhaya
Anyo dhananjayatkartumetattattvam bravimi te
85.12
वेद कृष्णस्य माहात्म्यं वेदास्य दृढभक्तिताम्
अत्याज्यमस्य जानामि प्राणैस्तुल्यं धनंजयम्
Veda krishnasya mahatmyam vedasya dridhabhaktitam
Atyajyamasya janami pranaistulyam dhananjayam
85.13
अन्यत्कुम्भादपां पूर्णादन्यत्पादावसेचनात्
अन्यत्कुशलसंप्रश्नान्नैषिष्यति जनार्दनः
Anyatkumbhadapam purnadanyatpadavasechanat
Anyatkushalasamprashnannaishishyati janardanah
85.14
यत्त्वस्य प्रियमातिथ्यं मानार्हस्य महात्मनः
तदस्मै क्रियतां राजन्मानार्हो हि जनार्दनः
Yattvasya priyamatithyam manarhasya mahatmanah
Tadasmai kriyatam rajanmanarho hi janardanah
85.15
आशंसमानः कल्याणं कुरूनभ्येति केशवः
येनैव राजन्नर्थेन तदेवास्मा उपाकुरु
Ashansamanah kalyanam kurunabhyeti keshavah
Yenaiva rajannarthena tadevasma upakuru
85.16
शममिच्छति दाशार्हस्तव दुर्योधनस्य च
पाण्डवानां च राजेन्द्र तदस्य वचनं कुरु
Shamamichchhati dasharhastava duryodhanasya cha
Pandavanam cha rajendra tadasya vachanam kuru
85.17
पितासि राजन्पुत्रास्ते वृद्धस्त्वं शिशवः परे
वर्तस्व पितृवत्तेषु वर्तन्ते ते हि पुत्रवत्
Pitasi rajanputraste vriddhastvam shishavah pare
Vartasva pitrivatteshu vartante te hi putravat