অধ্যায় 86

86.1

দুর্যোধন উবাচ
যদাহ বিদুরঃ কৃষ্ণে সর্বং তত্সত্যমুচ্যতে
অনুরক্তো হ্যসংহার্যঃ পার্থান্প্রতি জনার্দনঃ

যত্তু সত্কারসংয়ুক্তং দেয়ং বসু জনার্দনে
অনেকরূপং রাজেন্দ্র ন তদ্দেয়ং কদাচন

দেশঃ কালস্তথায়ুক্তো ন হি নার্হতি কেশবঃ
মংস্যত্যধোক্ষজো রাজন্ভয়াদর্চতি মামিতি

অবমানশ্চ যত্র স্যাত্ক্ষত্রিয়স্য বিশাং পতে
ন তত্কুর্যাদ্বুধঃ কার্যমিতি মে নিশ্চিতা মতিঃ

স হি পূজ্যতমো দেবঃ কৃষ্ণঃ কমললোচনঃ
ত্রয়াণামপি লোকানাং বিদিতং মম সর্বথা

ন তু তস্মিন্প্রদেয়ং স্যাত্তথা কার্যগতিঃ প্রভো
বিগ্রহঃ সমুপারব্ধো ন হি শাম্যত্যবিগ্রহাৎ

বৈশংপায়ন উবাচ
তস্য তদ্বচনং শ্রুত্বা ভীষ্মঃ কুরুপিতামহঃ
বৈচিত্রবীর্যং রাজানমিদং বচনমব্রবীৎ

সত্কৃতোঽসত্কৃতো বাপি ন ক্রুধ্যেত জনার্দনঃ
নালমন্যমবজ্ঞাতুমবজ্ঞাতোঽপি কেশবঃ

যত্তু কার্যং মহাবাহো মনসা কার্যতাং গতম্
সর্বোপায়ৈর্ন তচ্ছক্যং কেনচিত্কর্তুমন্যথা

স যদ্ব্রূয়ান্মহাবাহুস্তত্কার্যমবিশঙ্কয়া
বাসুদেবেন তীর্থেন ক্ষিপ্রং সংশাম্য পাণ্ডবৈঃ

ধর্ম্যমর্থ্যং স ধর্মাত্মা ধ্রুবং বক্তা জনার্দনঃ
তস্মিন্বাচ্যাঃ প্রিয়া বাচো ভবতা বান্ধবৈঃ সহ

দুর্যোধন উবাচ
ন পর্যায়োঽস্তি যদ্রাজঞ্শ্রিয়ং নিষ্কেবলামহম্
তৈঃ সহেমামুপাশ্নীয়াং জীবঞ্জীবৈঃ পিতামহ

ইদং তু সুমহত্কার্যং শৃণু মে যত্সমর্থিতম্
পরায়ণং পাণ্ডবানাং নিয়ংস্যামি জনার্দনম্

তস্মিন্বদ্ধে ভবিষ্যন্তি বৃষ্ণয়ঃ পৃথিবী তথা
পাণ্ডবাশ্চ বিধেয়া মে স চ প্রাতরিহেষ্যতি

অত্রোপায়ং যথা সম্যঙ্ন বুধ্যেত জনার্দনঃ
ন চাপায়ো ভবেত্কশ্চিত্তদ্ভবান্প্রব্রবীতু মে

বৈশংপায়ন উবাচ
তস্য তদ্বচনং শ্রুত্বা ঘোরং কৃষ্ণাভিসংহিতম্
ধৃতরাষ্ট্রঃ সহামাত্যো ব্যথিতো বিমনাভবৎ

ততো দুর্যোধনমিদং ধৃতরাষ্ট্রোঽব্রবীদ্বচঃ
মৈবং বোচঃ প্রজাপাল নৈষ ধর্মঃ সনাতনঃ

দূতশ্চ হি হৃষীকেশঃ সংবন্ধী চ প্রিয়শ্চ নঃ
অপাপঃ কৌরবেয়েষু কথং বন্ধনমর্হতি

ভীষ্ম উবাচ
পরীতো ধৃতরাষ্ট্রায়ং তব পুত্রঃ সুমন্দধীঃ
বৃণোত্যনর্থং ন ত্বর্থং যাচ্যমানঃ সুহৃদ্গণৈঃ

ইমমুত্পথি বর্তন্তং পাপং পাপানুবন্ধিনম্
বাক্যানি সুহৃদাং হিত্বা ত্বমপ্যস্যানুবর্তসে

কৃষ্ণমক্লিষ্টকর্মাণমাসাদ্যায়ং সুদুর্মতিঃ
তব পুত্রঃ সহামাত্যঃ ক্ষণেন ন ভবিষ্যতি

পাপস্যাস্য নৃশংসস্য ত্যক্তধর্মস্য দুর্মতেঃ
নোত্সহেঽনর্থসংয়ুক্তাং বাচং শ্রোতুং কথংচন

বৈশংপায়ন উবাচ
ইত্যুক্ত্বা ভরতশ্রেষ্ঠো বৃদ্ধঃ পরমমন্যুমান্
উত্থায় তস্মাত্প্রাতিষ্ঠদ্ভীষ্মঃ সত্যপরাক্রমঃ