Utshovঅধ্যায় 87
87.1
বৈশংপায়ন উবাচ
প্রাতরুত্থায় কৃষ্ণস্তু কৃতবান্সর্বমাহ্নিকম্
ব্রাহ্মণৈরভ্যনুজ্ঞাতঃ প্রয়য়ৌ নগরং প্রতি
87.2
তং প্রয়ান্তং মহাবাহুমনুজ্ঞাপ্য ততো নৃপ
পর্যবর্তন্ত তে সর্বে বৃকস্থলনিবাসিনঃ
87.3
ধার্তরাষ্ট্রাস্তমায়ান্তং প্রত্যুজ্জগ্মুঃ স্বলংকৃতাঃ
দুর্যোধনমৃতে সর্বে ভীষ্মদ্রোণকৃপাদয়ঃ
87.4
পৌরাশ্চ বহুলা রাজন্হৃষীকেশং দিদৃক্ষবঃ
যানৈর্বহুবিধৈরন্যে পদ্ভিরেব তথাপরে
87.5
স বৈ পথি সমাগম্য ভীষ্মেণাক্লিষ্টকর্মণা
দ্রোণেন ধার্তরাষ্ট্রৈশ্চ তৈর্বৃতো নগরং যয়ৌ
87.6
কৃষ্ণসংমাননার্থং চ নগরং সমলংকৃতম্
বভূবূ রাজমার্গাশ্চ বহুরত্নসমাচিতাঃ
87.7
ন স্ম কশ্চিদ্গৃহে রাজংস্তদাসীদ্ভরতর্ষভ
ন স্ত্রী ন বৃদ্ধো ন শিশুর্বাসুদেবদিদৃক্ষয়া
87.8
রাজমার্গে নরা ন স্ম সংভবন্ত্যবনিং গতাঃ
তথা হি সুমহদ্রাজন্হৃষীকেশপ্রবেশনে
87.9
আবৃতানি বরস্ত্রীভির্গৃহাণি সুমহান্ত্যপি
প্রচলন্তীব ভারেণ দৃশ্যন্তে স্ম মহীতলে
87.10
তথা চ গতিমন্তস্তে বাসুদেবস্য বাজিনঃ
প্রনষ্টগতয়োঽভূবন্রাজমার্গে নরৈর্বৃতে
87.11
স গৃহং ধৃতরাষ্ট্রস্য প্রাবিশচ্ছত্রুকর্শনঃ
পাণ্ডুরং পুণ্ডরীকাক্ষঃ প্রাসাদৈরুপশোভিতম্
87.12
তিস্রঃ কক্ষ্যা ব্যতিক্রম্য কেশবো রাজবেশ্মনঃ
বৈচিত্রবীর্যং রাজানমভ্যগচ্ছদরিংদমঃ
87.13
অভ্যাগচ্ছতি দাশার্হে প্রজ্ঞাচক্ষুর্নরেশ্বরঃ
সহৈব দ্রোণভীষ্মাভ্যামুদতিষ্ঠন্মহায়শাঃ
87.14
কৃপশ্চ সোমদত্তশ্চ মহারাজশ্চ বাহ্লিকঃ
আসনেভ্যোঽচলন্সর্বে পূজয়ন্তো জনার্দনম্
87.15
ততো রাজানমাসাদ্য ধৃতরাষ্ট্রং যশস্বিনম্
স ভীষ্মং পূজয়ামাস বার্ষ্ণেয়ো বাগ্ভিরঞ্জসা
87.16
তেষু ধর্মানুপূর্বীং তাং প্রয়ুজ্য মধুসূদনঃ
যথাবয়ঃ সমীয়ায় রাজভিস্তত্র মাধবঃ
87.17
অথ দ্রোণং সপুত্রং স বাহ্লীকং চ যশস্বিনম্
কৃপং চ সোমদত্তং চ সমীয়ায় জনার্দনঃ
87.18
তত্রাসীদূর্জিতং মৃষ্টং কাঞ্চনং মহদাসনম্
শাসনাদ্ধৃতরাষ্ট্রস্য তত্রোপাবিশদচ্যুতঃ
87.19
অথ গাং মধুপর্কং চাপ্যুদকং চ জনার্দনে
উপজহ্রুর্যথান্যায়ং ধৃতরাষ্ট্রপুরোহিতাঃ
87.20
কৃতাতিথ্যস্তু গোবিন্দঃ সর্বান্পরিহসন্কুরূন্
আস্তে সংবন্ধকং কুর্বন্কুরুভিঃ পরিবারিতঃ
87.21
সোঽর্চিতো ধৃতরাষ্ট্রেণ পূজিতশ্চ মহায়শাঃ
রাজানং সমনুজ্ঞাপ্য নিরাক্রামদরিংদমঃ
87.22
তৈঃ সমেত্য যথান্যায়ং কুরুভিঃ কুরুসংসদি
বিদুরাবসথং রম্যমুপাতিষ্ঠত মাধবঃ
87.23
বিদুরঃ সর্বকল্যাণৈরভিগম্য জনার্দনম্
অর্চয়ামাস দাশার্হং সর্বকামৈরুপস্থিতম্
87.24
কৃতাতিথ্যং তু গোবিন্দং বিদুরঃ সর্বধর্মবিৎ
কুশলং পাণ্ডুপুত্রাণামপৃচ্ছন্মধুসূদনম্
87.25
প্রীয়মাণস্য সুহৃদো বিদুষো বুদ্ধিসত্তমঃ
ধর্মনিত্যস্য চ তদা গতদোষস্য ধীমতঃ
87.26
তস্য সর্বং সবিস্তারং পাণ্ডবানাং বিচেষ্টিতম্
ক্ষত্তুরাচষ্ট দাশার্হঃ সর্বপ্রত্যক্ষদর্শিবান্