Utshovঅধ্যায় 88
88.1
বৈশংপায়ন উবাচ
অথোপগম্য বিদুরমপরাহ্ণে জনার্দনঃ
পিতৃষ্বসারং গোবিন্দঃ সোঽভ্যগচ্ছদরিংদমঃ
88.2
সা দৃষ্ট্বা কৃষ্ণমায়ান্তং প্রসন্নাদিত্যবর্চসম্
কণ্ঠে গৃহীত্বা প্রাক্রোশত্পৃথা পার্থাননুস্মরন্
88.3
তেষাং সত্ত্ববতাং মধ্যে গোবিন্দং সহচারিণম্
চিরস্য দৃষ্ট্বা বার্ষ্ণেয়ং বাষ্পমাহারয়ত্পৃথা
88.4
সাব্রবীত্কৃষ্ণমাসীনং কৃতাতিথ্যং যুধাং পতিম্
বাষ্পগদ্গদপূর্ণেন মুখেন পরিশুষ্যতা
88.5
যে তে বাল্যাত্প্রভৃত্যেব গুরুশুশ্রূষণে রতাঃ
পরস্পরস্য সুহৃদঃ সংমতাঃ সমচেতসঃ
88.6
নিকৃত্যা ভ্রংশিতা রাজ্যাজ্জনার্হা নির্জনং গতাঃ
বিনীতক্রোধহর্ষাশ্চ ব্রহ্মণ্যাঃ সত্যবাদিনঃ
88.7
ত্যক্ত্বা প্রিয়সুখে পার্থা রুদন্তীমপহায় মাম্
অহার্ষুশ্চ বনং যান্তঃ সমূলং হৃদয়ং মম
88.8
অতদর্হা মহাত্মানঃ কথং কেশব পাণ্ডবাঃ
ঊষুর্মহাবনে তাত সিংহব্যাঘ্রগজাকুলে
88.9
বালা বিহীনাঃ পিত্রা তে ময়া সততলালিতাঃ
অপশ্যন্তঃ স্বপিতরৌ কথমূষুর্মহাবনে
88.10
শঙ্খদুন্দুভিনির্ঘোষৈর্মৃদঙ্গৈর্বৈণবৈরপি
পাণ্ডবাঃ সমবোধ্যন্ত বাল্যাত্প্রভৃতি কেশব
88.11
যে স্ম বারণশব্দেন হয়ানাং হেষিতেন চ
রথনেমিনিনাদৈশ্চ ব্যবোধ্যন্ত সদা গৃহে
88.12
শঙ্খভেরীনিনাদেন বেণুবীণানুনাদিনা
পুণ্যাহঘোষমিশ্রেণ পূজ্যমানা দ্বিজাতিভিঃ
88.13
বস্ত্রৈ রত্নৈরলংকারৈঃ পূজয়ন্তো দ্বিজন্মনঃ
গীর্ভির্মঙ্গলয়ুক্তাভির্ব্রাহ্মণানাং মহাত্মনাম্
88.14
অর্চিতৈরর্চনার্হৈশ্চ স্তুবদ্ভিরভিনন্দিতাঃ
প্রাসাদাগ্রেষ্ববোধ্যন্ত রাঙ্কবাজিনশায়িনঃ
88.15
তে নূনং নিনদং শ্রুত্বা শ্বাপদানাং মহাবনে
ন স্মোপয়ান্তি নিদ্রাং বৈ অতদর্হা জনার্দন
88.16
ভেরীমৃদঙ্গনিনদৈঃ শঙ্খবৈণবনিস্বনৈঃ
স্ত্রীণাং গীতনিনাদৈশ্চ মধুরৈর্মধুসূদন
88.17
বন্দিমাগধসূতৈশ্চ স্তুবদ্ভির্বোধিতাঃ কথম্
মহাবনে ব্যবোধ্যন্ত শ্বাপদানাং রুতেন তে
88.18
হ্রীমান্সত্যধৃতির্দান্তো ভূতানামনুকম্পিতা
কামদ্বেষৌ বশে কৃত্বা সতাং বর্ত্মানুবর্ততে
88.19
অম্বরীষস্য মান্ধাতুর্যয়াতের্নহুষস্য চ
ভরতস্য দিলীপস্য শিবেরৌশীনরস্য চ
88.20
রাজর্ষীণাং পুরাণানাং ধুরং ধত্তে দুরুদ্বহাম্
শীলবৃত্তোপসংপন্নো ধর্মজ্ঞঃ সত্যসংগরঃ
88.21
রাজা সর্বগুণোপেতস্ত্রৈলোক্যস্যাপি যো ভবেৎ
অজাতশত্রুর্ধর্মাত্মা শুদ্ধজাম্বূনদপ্রভঃ
88.22
শ্রেষ্ঠঃ কুরুষু সর্বেষু ধর্মতঃ শ্রুতবৃত্ততঃ
প্রিয়দর্শনো দীর্ঘভুজঃ কথং কৃষ্ণ যুধিষ্ঠিরঃ
88.23
যঃ স নাগায়ুতপ্রাণো বাতরংহা বৃকোদরঃ
অমর্ষী পাণ্ডবো নিত্যং প্রিয়ো ভ্রাতুঃ প্রিয়ংকরঃ
88.24
কীচকস্য চ সজ্ঞাতের্যো হন্তা মধুসূদন
শূরঃ ক্রোধবশানাং চ হিডিম্বস্য বকস্য চ
88.25
পরাক্রমে শক্রসমো বায়ুবেগসমো জবে
মহেশ্বরসমঃ ক্রোধে ভীমঃ প্রহরতাং বরঃ
88.26
ক্রোধং বলমমর্ষং চ যো নিধায় পরংতপঃ
জিতাত্মা পাণ্ডবোঽমর্ষী ভ্রাতুস্তিষ্ঠতি শাসনে
88.27
তেজোরাশিং মহাত্মানং বলৌঘমমিতৌজসম্
ভীমং প্রদর্শনেনাপি ভীমসেনং জনার্দন
তং মমাচক্ষ্ব বার্ষ্ণেয় কথমদ্য বৃকোদরঃ
88.28
আস্তে পরিঘবাহুঃ স মধ্যমঃ পাণ্ডবোঽচ্যুত
অর্জুনেনার্জুনো যঃ স কৃষ্ণ বাহুসহস্রিণা
দ্বিবাহুঃ স্পর্ধতে নিত্যমতীতেনাপি কেশব
88.29
ক্ষিপত্যেকেন বেগেন পঞ্চ বাণশতানি যঃ
ইষ্বস্ত্রে সদৃশো রাজ্ঞঃ কার্তবীর্যস্য পাণ্ডবঃ
88.30
তেজসাদিত্যসদৃশো মহর্ষিপ্রতিমো দমে
ক্ষময়া পৃথিবীতুল্যো মহেন্দ্রসমবিক্রমঃ
88.31
আধিরাজ্যং মহদ্দীপ্তং প্রথিতং মধুসূদন
আহৃতং যেন বীর্যেণ কুরূণাং সর্বরাজসু
88.32
যস্য বাহুবলং ঘোরং কৌরবাঃ পর্যুপাসতে
স সর্বরথিনাং শ্রেষ্ঠঃ পাণ্ডবঃ সত্যবিক্রমঃ
88.33
যোঽপাশ্রয়ঃ পাণ্ডবানাং দেবানামিব বাসবঃ
স তে ভ্রাতা সখা চৈব কথমদ্য ধনংজয়ঃ
88.34
দয়াবান্সর্বভূতেষু হ্রীনিষেধো মহাস্ত্রবিৎ
মৃদুশ্চ সুকুমারশ্চ ধার্মিকশ্চ প্রিয়শ্চ মে
88.35
সহদেবো মহেষ্বাসঃ শূরঃ সমিতিশোভনঃ
ভ্রাতৄণাং কৃষ্ণ শুশ্রূষুর্ধর্মার্থকুশলো যুবা
88.36
সদৈব সহদেবস্য ভ্রাতরো মধুসূদন
বৃত্তং কল্যাণবৃত্তস্য পূজয়ন্তি মহাত্মনঃ
88.37
জ্যেষ্ঠাপচায়িনং বীরং সহদেবং যুধাং পতিম্
শুশ্রূষুং মম বার্ষ্ণেয় মাদ্রীপুত্রং প্রচক্ষ্ব মে
88.38
সুকুমারো যুবা শূরো দর্শনীয়শ্চ পাণ্ডবঃ
ভ্রাতৄণাং কৃষ্ণ সর্বেষাং প্রিয়ঃ প্রাণো বহিশ্চরঃ
88.39
চিত্রয়োধী চ নকুলো মহেষ্বাসো মহাবলঃ
কচ্চিত্স কুশলী কৃষ্ণ বত্সো মম সুখৈধিতঃ
88.40
সুখোচিতমদুঃখার্হং সুকুমারং মহারথম্
অপি জাতু মহাবাহো পশ্যেয়ং নকুলং পুনঃ
88.41
পক্ষ্মসংপাতজে কালে নকুলেন বিনাকৃতা
ন লভামি সুখং বীর সাদ্য জীবামি পশ্য মাম্
88.42
সর্বৈঃ পুত্রৈঃ প্রিয়তমা দ্রৌপদী মে জনার্দন
কুলীনা শীলসংপন্না সর্বৈঃ সমুদিতা গুণৈঃ
88.43
পুত্রলোকাত্পতিলোকান্বৃণ্বানা সত্যবাদিনী
প্রিয়ান্পুত্রান্পরিত্যজ্য পাণ্ডবানন্বপদ্যত
88.44
মহাভিজনসংপন্না সর্বকামৈঃ সুপূজিতা
ঈশ্বরী সর্বকল্যাণী দ্রৌপদী কথমচ্যুত
88.45
পতিভিঃ পঞ্চভিঃ শূরৈরগ্নিকল্পৈঃ প্রহারিভিঃ
উপপন্না মহেষ্বাসৈর্দ্রৌপদী দুঃখভাগিনী
88.46
চতুর্দশমিমং বর্ষং যন্নাপশ্যমরিংদম
পুত্রাধিভিঃ পরিদ্যূনাং দ্রৌপদীং সত্যবাদিনীম্
88.47
ন নূনং কর্মভিঃ পুণ্যৈরশ্নুতে পুরুষঃ সুখম্
দ্রৌপদী চেত্তথাবৃত্তা নাশ্নুতে সুখমব্যয়ম্
88.48
ন প্রিয়ো মম কৃষ্ণায় বীভত্সুর্ন যুধিষ্ঠিরঃ
ভীমসেনো যমৌ বাপি যদপশ্যং সভাগতাম্
88.49
ন মে দুঃখতরং কিংচিদ্ভূতপূর্বং ততোঽধিকম্
যদ্দ্রৌপদীং নিবাতস্থাং শ্বশুরাণাং সমীপগাম্
88.50
আনায়িতামনার্যেণ ক্রোধলোভানুবর্তিনা
সর্বে প্রৈক্ষন্ত কুরব একবস্ত্রাং সভাগতাম্
88.51
তত্রৈব ধৃতরাষ্ট্রশ্চ মহারাজশ্চ বাহ্লিকঃ
কৃপশ্চ সোমদত্তশ্চ নির্বিণ্ণাঃ কুরবস্তথা
88.52
তস্যাং সংসদি সর্বস্যাং ক্ষত্তারং পূজয়াম্যহম্
বৃত্তেন হি ভবত্যার্যো ন ধনেন ন বিদ্যয়া
88.53
তস্য কৃষ্ণ মহাবুদ্ধের্গম্ভীরস্য মহাত্মনঃ
ক্ষত্তুঃ শীলমলংকারো লোকান্বিষ্টভ্য তিষ্ঠতি
88.54
সা শোকার্তা চ হৃষ্টা চ দৃষ্ট্বা গোবিন্দমাগতম্
নানাবিধানি দুঃখানি সর্বাণ্যেবান্বকীর্তয়ৎ
88.55
পূর্বৈরাচরিতং যত্তত্কুরাজভিররিংদম
অক্ষদ্যূতং মৃগবধঃ কচ্চিদেষাং সুখাবহম্
88.56
তন্মাং দহতি যত্কৃষ্ণা সভায়াং কুরুসংনিধৌ
ধার্তরাষ্ট্রৈঃ পরিক্লিষ্টা যথা নকুশলং তথা
88.57
নির্বাসনং চ নগরাত্প্রব্রজ্যা চ পরংতপ
নানাবিধানাং দুঃখানামাবাসোঽস্মি জনার্দন
অজ্ঞাতচর্যা বালানামবরোধশ্চ কেশব
88.58
ন স্ম ক্লেশতমং মে স্যাত্পুত্রৈঃ সহ পরংতপ
দুর্যোধনেন নিকৃতা বর্ষমদ্য চতুর্দশম্
88.59
দুঃখাদপি সুখং ন স্যাদ্যদি পুণ্যফলক্ষয়ঃ
ন মে বিশেষো জাত্বাসীদ্ধার্তরাষ্ট্রেষু পাণ্ডবৈঃ
88.60
তেন সত্যেন কৃষ্ণ ত্বাং হতামিত্রং শ্রিয়া বৃতম্
অস্মাদ্বিমুক্তং সংগ্রামাত্পশ্যেয়ং পাণ্ডবৈঃ সহ
নৈব শক্যাঃ পরাজেতুং সত্ত্বং হ্যেষাং তথাগতম্
88.61
পিতরং ত্বেব গর্হেয়ং নাত্মানং ন সুয়োধনম্
যেনাহং কুন্তিভোজায় ধনং ধূর্তৈরিবার্পিতা
88.62
বালাং মামার্যকস্তুভ্যং ক্রীডন্তীং কন্দুহস্তকাম্
অদদাত্কুন্তিভোজায় সখা সখ্যে মহাত্মনে
88.63
সাহং পিত্রা চ নিকৃতা শ্বশুরৈশ্চ পরংতপ
অত্যন্তদুঃখিতা কৃষ্ণ কিং জীবিতফলং মম
88.64
যন্মা বাগব্রবীন্নক্তং সূতকে সব্যসাচিনঃ
পুত্রস্তে পৃথিবীং জেতা যশশ্চাস্য দিবং স্পৃশেৎ
88.65
হত্বা কুরূন্গ্রামজন্যে রাজ্যং প্রাপ্য ধনংজয়ঃ
ভ্রাতৃভিঃ সহ কৌন্তেয়স্ত্রীন্মেধানাহরিষ্যতি
88.66
নাহং তামভ্যসূয়ামি নমো ধর্মায় বেধসে
কৃষ্ণায় মহতে নিত্যং ধর্মো ধারয়তি প্রজাঃ
88.67
ধর্মশ্চেদস্তি বার্ষ্ণেয় তথা সত্যং ভবিষ্যতি
ত্বং চাপি তত্তথা কৃষ্ণ সর্বং সংপাদয়িষ্যসি
88.68
ন মাং মাধব বৈধব্যং নার্থনাশো ন বৈরিতা
তথা শোকায় ভবতি যথা পুত্রৈর্বিনাভবঃ
88.69
যাহং গাণ্ডীবধন্বানং সর্বশস্ত্রভৃতাং বরম্
ধনংজয়ং ন পশ্যামি কা শান্তির্হৃদয়স্য মে
88.70
ইদং চতুর্দশং বর্ষং যন্নাপশ্যং যুধিষ্ঠিরম্
ধনংজয়ং চ গোবিন্দ যমৌ তং চ বৃকোদরম্
88.71
জীবনাশং প্রনষ্টানাং শ্রাদ্ধং কুর্বন্তি মানবাঃ
অর্থতস্তে মম মৃতাস্তেষাং চাহং জনার্দন
88.72
ব্রূয়া মাধব রাজানং ধর্মাত্মানং যুধিষ্ঠিরম্
ভূয়াংস্তে হীয়তে ধর্মো মা পুত্রক বৃথা কৃথাঃ
88.73
পরাশ্রয়া বাসুদেব যা জীবামি ধিগস্তু মাম্
বৃত্তেঃ কৃপণলব্ধায়া অপ্রতিষ্ঠৈব জ্যায়সী
88.74
অথো ধনংজয়ং ব্রূয়া নিত্যোদ্যুক্তং বৃকোদরম্
যদর্থং ক্ষত্রিয়া সূতে তস্য কালোঽয়মাগতঃ
88.75
অস্মিংশ্চেদাগতে কালে কালো বোঽতিক্রমিষ্যতি
লোকসংভাবিতাঃ সন্তঃ সুনৃশংসং করিষ্যথ
88.76
নৃশংসেন চ বো যুক্তাংস্ত্যজেয়ং শাশ্বতীঃ সমাঃ
কালে হি সমনুপ্রাপ্তে ত্যক্তব্যমপি জীবিতম্
88.77
মাদ্রীপুত্রৌ চ বক্তব্যৌ ক্ষত্রধর্মরতৌ সদা
বিক্রমেণার্জিতান্ভোগান্বৃণীতং জীবিতাদপি
88.78
বিক্রমাধিগতা হ্যর্থাঃ ক্ষত্রধর্মেণ জীবতঃ
মনো মনুষ্যস্য সদা প্রীণন্তি পুরুষোত্তম
88.79
গত্বা ব্রূহি মহাবাহো সর্বশস্ত্রভৃতাং বরম্
অর্জুনং পাণ্ডবং বীরং দ্রৌপদ্যাঃ পদবীং চর
88.80
বিদিতৌ হি তবাত্যন্তং ক্রুদ্ধাবিব যথান্তকৌ
ভীমার্জুনৌ নয়েতাং হি দেবানপি পরাং গতিম্
88.81
তয়োশ্চৈতদবজ্ঞানং যত্সা কৃষ্ণা সভাং গতা
দুঃশাসনশ্চ কর্ণশ্চ পরুষাণ্যভ্যভাষতাম্
88.82
দুর্যোধনো ভীমসেনমভ্যগচ্ছন্মনস্বিনম্
পশ্যতাং কুরুমুখ্যানাং তস্য দ্রক্ষ্যতি যত্ফলম্
88.83
ন হি বৈরং সমাসাদ্য প্রশাম্যতি বৃকোদরঃ
সুচিরাদপি ভীমস্য ন হি বৈরং প্রশাম্যতি
যাবদন্তং ন নয়তি শাত্রবাঞ্শত্রুকর্শনঃ
88.84
ন দুঃখং রাজ্যহরণং ন চ দ্যূতে পরাজয়ঃ
প্রব্রাজনং চ পুত্রাণাং ন মে তদ্দুঃখকারণম্
88.85
যত্তু সা বৃহতী শ্যামা একবস্ত্রা সভাং গতা
অশৃণোত্পরুষা বাচস্ততো দুঃখতরং নু কিম্
88.86
স্ত্রীধর্মিণী বরারোহা ক্ষত্রধর্মরতা সদা
নাধ্যগচ্ছত্তথা নাথং কৃষ্ণা নাথবতী সতী
88.87
যস্যা মম সপুত্রায়াস্ত্বং নাথো মধুসূদন
রামশ্চ বলিনাং শ্রেষ্ঠঃ প্রদ্যুম্নশ্চ মহারথঃ
88.88
সাহমেবংবিধং দুঃখং সহেঽদ্য পুরুষোত্তম
ভীমে জীবতি দুর্ধর্ষে বিজয়ে চাপলায়িনি
88.89
তত আশ্বাসয়ামাস পুত্রাধিভিরভিপ্লুতাম্
পিতৃষ্বসারং শোচন্তীং শৌরিঃ পার্থসখঃ পৃথাম্
88.90
কা নু সীমন্তিনী ত্বাদৃগ্লোকেষ্বস্তি পিতৃষ্বসঃ
শূরস্য রাজ্ঞো দুহিতা আজমীঢকুলং গতা
88.91
মহাকুলীনা ভবতী হ্রদাদ্ধ্রদমিবাগতা
ঈশ্বরী সর্বকল্যাণী ভর্ত্রা পরমপূজিতা
88.92
বীরসূর্বীরপত্নী চ সর্বৈঃ সমুদিতা গুণৈঃ
সুখদুঃখে মহাপ্রাজ্ঞে ত্বাদৃশী সোঢুমর্হতি
88.93
নিদ্রাতন্দ্রী ক্রোধহর্ষৌ ক্ষুত্পিপাসে হিমাতপৌ
এতানি পার্থা নির্জিত্য নিত্যং বীরাঃ সুখে রতাঃ
88.94
ত্যক্তগ্রাম্যসুখাঃ পার্থা নিত্যং বীরসুখপ্রিয়াঃ
ন তে স্বল্পেন তুষ্যেয়ুর্মহোত্সাহা মহাবলাঃ
88.95
অন্তং ধীরা নিষেবন্তে মধ্যং গ্রাম্যসুখপ্রিয়াঃ
উত্তমাংশ্চ পরিক্লেশান্ভোগাংশ্চাতীব মানুষান্
88.96
অন্তেষু রেমিরে ধীরা ন তে মধ্যেষু রেমিরে
অন্তপ্রাপ্তিং সুখামাহুর্দুঃখমন্তরমন্তয়োঃ
88.97
অভিবাদয়ন্তি ভবতীং পাণ্ডবাঃ সহ কৃষ্ণয়া
আত্মানং চ কুশলিনং নিবেদ্যাহুরনাময়ম্
88.98
অরোগান্সর্বসিদ্ধার্থান্ক্ষিপ্রং দ্রক্ষ্যসি পাণ্ডবান্
ঈশ্বরান্সর্বলোকস্য হতামিত্রাঞ্শ্রিয়া বৃতান্
88.99
এবমাশ্বাসিতা কুন্তী প্রত্যুবাচ জনার্দনম্
পুত্রাধিভিরভিধ্বস্তা নিগৃহ্যাবুদ্ধিজং তমঃ
88.100
যদ্যত্তেষাং মহাবাহো পথ্যং স্যান্মধুসূদন
যথা যথা ত্বং মন্যেথাঃ কুর্যাঃ কৃষ্ণ তথা তথা
88.101
অবিলোপেন ধর্মস্য অনিকৃত্যা পরংতপ
প্রভাবজ্ঞাস্মি তে কৃষ্ণ সত্যস্যাভিজনস্য চ
88.102
ব্যবস্থায়াং চ মিত্রেষু বুদ্ধিবিক্রময়োস্তথা
ত্বমেব নঃ কুলে ধর্মস্ত্বং সত্যং ত্বং তপো মহৎ
88.103
ত্বং ত্রাতা ত্বং মহদ্ব্রহ্ম ত্বয়ি সর্বং প্রতিষ্ঠিতম্
যথৈবাত্থ তথৈবৈতত্ত্বয়ি সত্যং ভবিষ্যতি
88.104
তামামন্ত্র্য চ গোবিন্দঃ কৃত্বা চাভিপ্রদক্ষিণম্
প্রাতিষ্ঠত মহাবাহুর্দুর্যোধনগৃহান্প্রতি