UtshovChapter 88
88.1
वैशंपायन उवाच
अथोपगम्य विदुरमपराह्णे जनार्दनः
पितृष्वसारं गोविन्दः सोऽभ्यगच्छदरिंदमः
Vaishampayana uvacha
Athopagamya viduramaparahne janardanah
Pitrishvasaram govindah sobhyagachchhadarindamah
88.2
सा दृष्ट्वा कृष्णमायान्तं प्रसन्नादित्यवर्चसम्
कण्ठे गृहीत्वा प्राक्रोशत्पृथा पार्थाननुस्मरन्
Sa drishtva krishnamayantam prasannadityavarchasam
Kanthe grihitva prakroshatpritha parthananusmaran
88.3
तेषां सत्त्ववतां मध्ये गोविन्दं सहचारिणम्
चिरस्य दृष्ट्वा वार्ष्णेयं बाष्पमाहारयत्पृथा
Tesham sattvavatam madhye govindam sahacharinam
Chirasya drishtva varshneyam bashpamaharayatpritha
88.4
साब्रवीत्कृष्णमासीनं कृतातिथ्यं युधां पतिम्
बाष्पगद्गदपूर्णेन मुखेन परिशुष्यता
Sabravitkrishnamasinam kritatithyam yudham patim
Bashpagadgadapurnena mukhena parishushyata
88.5
ये ते बाल्यात्प्रभृत्येव गुरुशुश्रूषणे रताः
परस्परस्य सुहृदः संमताः समचेतसः
Ye te balyatprabhrityeva gurushushrushane ratah
Parasparasya suhridah sammatah samachetasah
88.6
निकृत्या भ्रंशिता राज्याज्जनार्हा निर्जनं गताः
विनीतक्रोधहर्षाश्च ब्रह्मण्याः सत्यवादिनः
Nikritya bhranshita rajyajjanarha nirjanam gatah
Vinitakrodhaharshashcha brahmanyah satyavadinah
88.7
त्यक्त्वा प्रियसुखे पार्था रुदन्तीमपहाय माम्
अहार्षुश्च वनं यान्तः समूलं हृदयं मम
Tyaktva priyasukhe partha rudantimapahaya mam
Aharshushcha vanam yantah samulam hridayam mama
88.8
अतदर्हा महात्मानः कथं केशव पाण्डवाः
ऊषुर्महावने तात सिंहव्याघ्रगजाकुले
Atadarha mahatmanah katham keshava pandavah
Ushurmahavane tata sinhavyaghragajakule
88.9
बाला विहीनाः पित्रा ते मया सततलालिताः
अपश्यन्तः स्वपितरौ कथमूषुर्महावने
Bala vihinah pitra te maya satatalalitah
Apashyantah svapitarau kathamushurmahavane
88.10
शङ्खदुन्दुभिनिर्घोषैर्मृदङ्गैर्वैणवैरपि
पाण्डवाः समबोध्यन्त बाल्यात्प्रभृति केशव
Shankhadundubhinirghoshairmridangairvainavairapi
Pandavah samabodhyanta balyatprabhriti keshava
88.11
ये स्म वारणशब्देन हयानां हेषितेन च
रथनेमिनिनादैश्च व्यबोध्यन्त सदा गृहे
Ye sma varanashabdena hayanam heshitena cha
Rathanemininadaishcha vyabodhyanta sada grihe
88.12
शङ्खभेरीनिनादेन वेणुवीणानुनादिना
पुण्याहघोषमिश्रेण पूज्यमाना द्विजातिभिः
Shankhabherininadena venuvinanunadina
Punyahaghoshamishrena pujyamana dvijatibhih
88.13
वस्त्रै रत्नैरलंकारैः पूजयन्तो द्विजन्मनः
गीर्भिर्मङ्गलयुक्ताभिर्ब्राह्मणानां महात्मनाम्
Vastrai ratnairalankaraih pujayanto dvijanmanah
Girbhirmangalayuktabhirbrahmananam mahatmanam
88.14
अर्चितैरर्चनार्हैश्च स्तुवद्भिरभिनन्दिताः
प्रासादाग्रेष्वबोध्यन्त राङ्कवाजिनशायिनः
Architairarchanarhaishcha stuvadbhirabhinanditah
Prasadagreshvabodhyanta rankavajinashayinah
88.15
ते नूनं निनदं श्रुत्वा श्वापदानां महावने
न स्मोपयान्ति निद्रां वै अतदर्हा जनार्दन
Te nunam ninadam shrutva shvapadanam mahavane
Na smopayanti nidram vai atadarha janardana
88.16
भेरीमृदङ्गनिनदैः शङ्खवैणवनिस्वनैः
स्त्रीणां गीतनिनादैश्च मधुरैर्मधुसूदन
Bherimridanganinadaih shankhavainavanisvanaih
Strinam gitaninadaishcha madhurairmadhusudana
88.17
बन्दिमागधसूतैश्च स्तुवद्भिर्बोधिताः कथम्
महावने व्यबोध्यन्त श्वापदानां रुतेन ते
Bandimagadhasutaishcha stuvadbhirbodhitah katham
Mahavane vyabodhyanta shvapadanam rutena te
88.18
ह्रीमान्सत्यधृतिर्दान्तो भूतानामनुकम्पिता
कामद्वेषौ वशे कृत्वा सतां वर्त्मानुवर्तते
Hrimansatyadhritirdanto bhutanamanukampita
Kamadveshau vashe kritva satam vartmanuvartate
88.19
अम्बरीषस्य मान्धातुर्ययातेर्नहुषस्य च
भरतस्य दिलीपस्य शिबेरौशीनरस्य च
Ambarishasya mandhaturyayaternahushasya cha
Bharatasya dilipasya shiberaushinarasya cha
88.20
राजर्षीणां पुराणानां धुरं धत्ते दुरुद्वहाम्
शीलवृत्तोपसंपन्नो धर्मज्ञः सत्यसंगरः
Rajarshinam purananam dhuram dhatte durudvaham
Shilavrittopasampanno dharmagyah satyasangarah
88.21
राजा सर्वगुणोपेतस्त्रैलोक्यस्यापि यो भवेत्
अजातशत्रुर्धर्मात्मा शुद्धजाम्बूनदप्रभः
Raja sarvagunopetastrailokyasyapi yo bhavet
Ajatashatrurdharmatma shuddhajambunadaprabhah
88.22
श्रेष्ठः कुरुषु सर्वेषु धर्मतः श्रुतवृत्ततः
प्रियदर्शनो दीर्घभुजः कथं कृष्ण युधिष्ठिरः
Shreshthah kurushu sarveshu dharmatah shrutavrittatah
Priyadarshano dirghabhujah katham krishna yudhishthirah
88.23
यः स नागायुतप्राणो वातरंहा वृकोदरः
अमर्षी पाण्डवो नित्यं प्रियो भ्रातुः प्रियंकरः
Yah sa nagayutaprano vataranha vrikodarah
Amarshi pandavo nityam priyo bhratuh priyankarah
88.24
कीचकस्य च सज्ञातेर्यो हन्ता मधुसूदन
शूरः क्रोधवशानां च हिडिम्बस्य बकस्य च
Kichakasya cha sagyateryo hanta madhusudana
Shurah krodhavashanam cha hidimbasya bakasya cha
88.25
पराक्रमे शक्रसमो वायुवेगसमो जवे
महेश्वरसमः क्रोधे भीमः प्रहरतां वरः
Parakrame shakrasamo vayuvegasamo jave
Maheshvarasamah krodhe bhimah praharatam varah
88.26
क्रोधं बलममर्षं च यो निधाय परंतपः
जितात्मा पाण्डवोऽमर्षी भ्रातुस्तिष्ठति शासने
Krodham balamamarsham cha yo nidhaya parantapah
Jitatma pandavomarshi bhratustishthati shasane
88.27
तेजोराशिं महात्मानं बलौघममितौजसम्
भीमं प्रदर्शनेनापि भीमसेनं जनार्दन
तं ममाचक्ष्व वार्ष्णेय कथमद्य वृकोदरः
Tejorashim mahatmanam balaughamamitaujasam
Bhimam pradarshanenapi bhimasenam janardana
Tam mamachakshva varshneya kathamadya vrikodarah
88.28
आस्ते परिघबाहुः स मध्यमः पाण्डवोऽच्युत
अर्जुनेनार्जुनो यः स कृष्ण बाहुसहस्रिणा
द्विबाहुः स्पर्धते नित्यमतीतेनापि केशव
Aste parighabahuh sa madhyamah pandavochyuta
Arjunenarjuno yah sa krishna bahusahasrina
Dvibahuh spardhate nityamatitenapi keshava
88.29
क्षिपत्येकेन वेगेन पञ्च बाणशतानि यः
इष्वस्त्रे सदृशो राज्ञः कार्तवीर्यस्य पाण्डवः
Kshipatyekena vegena pancha banashatani yah
Ishvastre sadrisho ragyah kartaviryasya pandavah
88.30
तेजसादित्यसदृशो महर्षिप्रतिमो दमे
क्षमया पृथिवीतुल्यो महेन्द्रसमविक्रमः
Tejasadityasadrisho maharshipratimo dame
Kshamaya prithivitulyo mahendrasamavikramah
88.31
आधिराज्यं महद्दीप्तं प्रथितं मधुसूदन
आहृतं येन वीर्येण कुरूणां सर्वराजसु
Adhirajyam mahaddiptam prathitam madhusudana
Ahritam yena viryena kurunam sarvarajasu
88.32
यस्य बाहुबलं घोरं कौरवाः पर्युपासते
स सर्वरथिनां श्रेष्ठः पाण्डवः सत्यविक्रमः
Yasya bahubalam ghoram kauravah paryupasate
Sa sarvarathinam shreshthah pandavah satyavikramah
88.33
योऽपाश्रयः पाण्डवानां देवानामिव वासवः
स ते भ्राता सखा चैव कथमद्य धनंजयः
Yopashrayah pandavanam devanamiva vasavah
Sa te bhrata sakha chaiva kathamadya dhananjayah
88.34
दयावान्सर्वभूतेषु ह्रीनिषेधो महास्त्रवित्
मृदुश्च सुकुमारश्च धार्मिकश्च प्रियश्च मे
Dayavansarvabhuteshu hrinishedho mahastravit
Mridushcha sukumarashcha dharmikashcha priyashcha me
88.35
सहदेवो महेष्वासः शूरः समितिशोभनः
भ्रातॄणां कृष्ण शुश्रूषुर्धर्मार्थकुशलो युवा
Sahadevo maheshvasah shurah samitishobhanah
Bhratrinam krishna shushrushurdharmarthakushalo yuva
88.36
सदैव सहदेवस्य भ्रातरो मधुसूदन
वृत्तं कल्याणवृत्तस्य पूजयन्ति महात्मनः
Sadaiva sahadevasya bhrataro madhusudana
Vrittam kalyanavrittasya pujayanti mahatmanah
88.37
ज्येष्ठापचायिनं वीरं सहदेवं युधां पतिम्
शुश्रूषुं मम वार्ष्णेय माद्रीपुत्रं प्रचक्ष्व मे
Jyeshthapachayinam viram sahadevam yudham patim
Shushrushum mama varshneya madriputram prachakshva me
88.38
सुकुमारो युवा शूरो दर्शनीयश्च पाण्डवः
भ्रातॄणां कृष्ण सर्वेषां प्रियः प्राणो बहिश्चरः
Sukumaro yuva shuro darshaniyashcha pandavah
Bhratrinam krishna sarvesham priyah prano bahishcharah
88.39
चित्रयोधी च नकुलो महेष्वासो महाबलः
कच्चित्स कुशली कृष्ण वत्सो मम सुखैधितः
Chitrayodhi cha nakulo maheshvaso mahabalah
Kachchitsa kushali krishna vatso mama sukhaidhitah
88.40
सुखोचितमदुःखार्हं सुकुमारं महारथम्
अपि जातु महाबाहो पश्येयं नकुलं पुनः
Sukhochitamaduhkharham sukumaram maharatham
Api jatu mahabaho pashyeyam nakulam punah
88.41
पक्ष्मसंपातजे काले नकुलेन विनाकृता
न लभामि सुखं वीर साद्य जीवामि पश्य माम्
Pakshmasampataje kale nakulena vinakrita
Na labhami sukham vira sadya jivami pashya mam
88.42
सर्वैः पुत्रैः प्रियतमा द्रौपदी मे जनार्दन
कुलीना शीलसंपन्ना सर्वैः समुदिता गुणैः
Sarvaih putraih priyatama draupadi me janardana
Kulina shilasampanna sarvaih samudita gunaih
88.43
पुत्रलोकात्पतिलोकान्वृण्वाना सत्यवादिनी
प्रियान्पुत्रान्परित्यज्य पाण्डवानन्वपद्यत
Putralokatpatilokanvrinvana satyavadini
Priyanputranparityajya pandavananvapadyata
88.44
महाभिजनसंपन्ना सर्वकामैः सुपूजिता
ईश्वरी सर्वकल्याणी द्रौपदी कथमच्युत
Mahabhijanasampanna sarvakamaih supujita
Ishvari sarvakalyani draupadi kathamachyuta
88.45
पतिभिः पञ्चभिः शूरैरग्निकल्पैः प्रहारिभिः
उपपन्ना महेष्वासैर्द्रौपदी दुःखभागिनी
Patibhih panchabhih shurairagnikalpaih praharibhih
Upapanna maheshvasairdraupadi duhkhabhagini
88.46
चतुर्दशमिमं वर्षं यन्नापश्यमरिंदम
पुत्राधिभिः परिद्यूनां द्रौपदीं सत्यवादिनीम्
Chaturdashamimam varsham yannapashyamarindama
Putradhibhih paridyunam draupadim satyavadinim
88.47
न नूनं कर्मभिः पुण्यैरश्नुते पुरुषः सुखम्
द्रौपदी चेत्तथावृत्ता नाश्नुते सुखमव्ययम्
Na nunam karmabhih punyairashnute purushah sukham
Draupadi chettathavritta nashnute sukhamavyayam
88.48
न प्रियो मम कृष्णाय बीभत्सुर्न युधिष्ठिरः
भीमसेनो यमौ वापि यदपश्यं सभागताम्
Na priyo mama krishnaya bibhatsurna yudhishthirah
Bhimaseno yamau vapi yadapashyam sabhagatam
88.49
न मे दुःखतरं किंचिद्भूतपूर्वं ततोऽधिकम्
यद्द्रौपदीं निवातस्थां श्वशुराणां समीपगाम्
Na me duhkhataram kinchidbhutapurvam tatodhikam
Yaddraupadim nivatastham shvashuranam samipagam
88.50
आनायितामनार्येण क्रोधलोभानुवर्तिना
सर्वे प्रैक्षन्त कुरव एकवस्त्रां सभागताम्
Anayitamanaryena krodhalobhanuvartina
Sarve praikshanta kurava ekavastram sabhagatam
88.51
तत्रैव धृतराष्ट्रश्च महाराजश्च बाह्लिकः
कृपश्च सोमदत्तश्च निर्विण्णाः कुरवस्तथा
Tatraiva dhritarashtrashcha maharajashcha bahlikah
Kripashcha somadattashcha nirvinnah kuravastatha
88.52
तस्यां संसदि सर्वस्यां क्षत्तारं पूजयाम्यहम्
वृत्तेन हि भवत्यार्यो न धनेन न विद्यया
Tasyam sansadi sarvasyam kshattaram pujayamyaham
Vrittena hi bhavatyaryo na dhanena na vidyaya
88.53
तस्य कृष्ण महाबुद्धेर्गम्भीरस्य महात्मनः
क्षत्तुः शीलमलंकारो लोकान्विष्टभ्य तिष्ठति
Tasya krishna mahabuddhergambhirasya mahatmanah
Kshattuh shilamalankaro lokanvishtabhya tishthati
88.54
सा शोकार्ता च हृष्टा च दृष्ट्वा गोविन्दमागतम्
नानाविधानि दुःखानि सर्वाण्येवान्वकीर्तयत्
Sa shokarta cha hrishta cha drishtva govindamagatam
Nanavidhani duhkhani sarvanyevanvakirtayat
88.55
पूर्वैराचरितं यत्तत्कुराजभिररिंदम
अक्षद्यूतं मृगवधः कच्चिदेषां सुखावहम्
Purvairacharitam yattatkurajabhirarindama
Akshadyutam mrigavadhah kachchidesham sukhavaham
88.56
तन्मां दहति यत्कृष्णा सभायां कुरुसंनिधौ
धार्तराष्ट्रैः परिक्लिष्टा यथा नकुशलं तथा
Tanmam dahati yatkrishna sabhayam kurusannidhau
Dhartarashtraih pariklishta yatha nakushalam tatha
88.57
निर्वासनं च नगरात्प्रव्रज्या च परंतप
नानाविधानां दुःखानामावासोऽस्मि जनार्दन
अज्ञातचर्या बालानामवरोधश्च केशव
Nirvasanam cha nagaratpravrajya cha parantapa
Nanavidhanam duhkhanamavasosmi janardana
Agyatacharya balanamavarodhashcha keshava
88.58
न स्म क्लेशतमं मे स्यात्पुत्रैः सह परंतप
दुर्योधनेन निकृता वर्षमद्य चतुर्दशम्
Na sma kleshatamam me syatputraih saha parantapa
Duryodhanena nikrita varshamadya chaturdasham
88.59
दुःखादपि सुखं न स्याद्यदि पुण्यफलक्षयः
न मे विशेषो जात्वासीद्धार्तराष्ट्रेषु पाण्डवैः
Duhkhadapi sukham na syadyadi punyaphalakshayah
Na me vishesho jatvasiddhartarashtreshu pandavaih
88.60
तेन सत्येन कृष्ण त्वां हतामित्रं श्रिया वृतम्
अस्माद्विमुक्तं संग्रामात्पश्येयं पाण्डवैः सह
नैव शक्याः पराजेतुं सत्त्वं ह्येषां तथागतम्
Tena satyena krishna tvam hatamitram shriya vritam
Asmadvimuktam sangramatpashyeyam pandavaih saha
Naiva shakyah parajetum sattvam hyesham tathagatam
88.61
पितरं त्वेव गर्हेयं नात्मानं न सुयोधनम्
येनाहं कुन्तिभोजाय धनं धूर्तैरिवार्पिता
Pitaram tveva garheyam natmanam na suyodhanam
Yenaham kuntibhojaya dhanam dhurtairivarpita
88.62
बालां मामार्यकस्तुभ्यं क्रीडन्तीं कन्दुहस्तकाम्
अददात्कुन्तिभोजाय सखा सख्ये महात्मने
Balam mamaryakastubhyam kridantim kanduhastakam
Adadatkuntibhojaya sakha sakhye mahatmane
88.63
साहं पित्रा च निकृता श्वशुरैश्च परंतप
अत्यन्तदुःखिता कृष्ण किं जीवितफलं मम
Saham pitra cha nikrita shvashuraishcha parantapa
Atyantaduhkhita krishna kim jivitaphalam mama
88.64
यन्मा वागब्रवीन्नक्तं सूतके सव्यसाचिनः
पुत्रस्ते पृथिवीं जेता यशश्चास्य दिवं स्पृशेत्
Yanma vagabravinnaktam sutake savyasachinah
Putraste prithivim jeta yashashchasya divam sprishet
88.65
हत्वा कुरून्ग्रामजन्ये राज्यं प्राप्य धनंजयः
भ्रातृभिः सह कौन्तेयस्त्रीन्मेधानाहरिष्यति
Hatva kurungramajanye rajyam prapya dhananjayah
Bhratribhih saha kaunteyastrinmedhanaharishyati
88.66
नाहं तामभ्यसूयामि नमो धर्माय वेधसे
कृष्णाय महते नित्यं धर्मो धारयति प्रजाः
Naham tamabhyasuyami namo dharmaya vedhase
Krishnaya mahate nityam dharmo dharayati prajah
88.67
धर्मश्चेदस्ति वार्ष्णेय तथा सत्यं भविष्यति
त्वं चापि तत्तथा कृष्ण सर्वं संपादयिष्यसि
Dharmashchedasti varshneya tatha satyam bhavishyati
Tvam chapi tattatha krishna sarvam sampadayishyasi
88.68
न मां माधव वैधव्यं नार्थनाशो न वैरिता
तथा शोकाय भवति यथा पुत्रैर्विनाभवः
Na mam madhava vaidhavyam narthanasho na vairita
Tatha shokaya bhavati yatha putrairvinabhavah
88.69
याहं गाण्डीवधन्वानं सर्वशस्त्रभृतां वरम्
धनंजयं न पश्यामि का शान्तिर्हृदयस्य मे
Yaham gandivadhanvanam sarvashastrabhritam varam
Dhananjayam na pashyami ka shantirhridayasya me
88.70
इदं चतुर्दशं वर्षं यन्नापश्यं युधिष्ठिरम्
धनंजयं च गोविन्द यमौ तं च वृकोदरम्
Idam chaturdasham varsham yannapashyam yudhishthiram
Dhananjayam cha govinda yamau tam cha vrikodaram
88.71
जीवनाशं प्रनष्टानां श्राद्धं कुर्वन्ति मानवाः
अर्थतस्ते मम मृतास्तेषां चाहं जनार्दन
Jivanasham pranashtanam shraddham kurvanti manavah
Arthataste mama mritastesham chaham janardana
88.72
ब्रूया माधव राजानं धर्मात्मानं युधिष्ठिरम्
भूयांस्ते हीयते धर्मो मा पुत्रक वृथा कृथाः
Bruya madhava rajanam dharmatmanam yudhishthiram
Bhuyanste hiyate dharmo ma putraka vritha krithah
88.73
पराश्रया वासुदेव या जीवामि धिगस्तु माम्
वृत्तेः कृपणलब्धाया अप्रतिष्ठैव ज्यायसी
Parashraya vasudeva ya jivami dhigastu mam
Vritteh kripanalabdhaya apratishthaiva jyayasi
88.74
अथो धनंजयं ब्रूया नित्योद्युक्तं वृकोदरम्
यदर्थं क्षत्रिया सूते तस्य कालोऽयमागतः
Atho dhananjayam bruya nityodyuktam vrikodaram
Yadartham kshatriya sute tasya kaloyamagatah
88.75
अस्मिंश्चेदागते काले कालो वोऽतिक्रमिष्यति
लोकसंभाविताः सन्तः सुनृशंसं करिष्यथ
Asminshchedagate kale kalo votikramishyati
Lokasambhavitah santah sunrishansam karishyatha
88.76
नृशंसेन च वो युक्तांस्त्यजेयं शाश्वतीः समाः
काले हि समनुप्राप्ते त्यक्तव्यमपि जीवितम्
Nrishansena cha vo yuktanstyajeyam shashvatih samah
Kale hi samanuprapte tyaktavyamapi jivitam
88.77
माद्रीपुत्रौ च वक्तव्यौ क्षत्रधर्मरतौ सदा
विक्रमेणार्जितान्भोगान्वृणीतं जीवितादपि
Madriputrau cha vaktavyau kshatradharmaratau sada
Vikramenarjitanbhoganvrinitam jivitadapi
88.78
विक्रमाधिगता ह्यर्थाः क्षत्रधर्मेण जीवतः
मनो मनुष्यस्य सदा प्रीणन्ति पुरुषोत्तम
Vikramadhigata hyarthah kshatradharmena jivatah
Mano manushyasya sada prinanti purushottama
88.79
गत्वा ब्रूहि महाबाहो सर्वशस्त्रभृतां वरम्
अर्जुनं पाण्डवं वीरं द्रौपद्याः पदवीं चर
Gatva bruhi mahabaho sarvashastrabhritam varam
Arjunam pandavam viram draupadyah padavim chara
88.80
विदितौ हि तवात्यन्तं क्रुद्धाविव यथान्तकौ
भीमार्जुनौ नयेतां हि देवानपि परां गतिम्
Viditau hi tavatyantam kruddhaviva yathantakau
Bhimarjunau nayetam hi devanapi param gatim
88.81
तयोश्चैतदवज्ञानं यत्सा कृष्णा सभां गता
दुःशासनश्च कर्णश्च परुषाण्यभ्यभाषताम्
Tayoshchaitadavagyanam yatsa krishna sabham gata
Duhshasanashcha karnashcha parushanyabhyabhashatam
88.82
दुर्योधनो भीमसेनमभ्यगच्छन्मनस्विनम्
पश्यतां कुरुमुख्यानां तस्य द्रक्ष्यति यत्फलम्
Duryodhano bhimasenamabhyagachchhanmanasvinam
Pashyatam kurumukhyanam tasya drakshyati yatphalam
88.83
न हि वैरं समासाद्य प्रशाम्यति वृकोदरः
सुचिरादपि भीमस्य न हि वैरं प्रशाम्यति
यावदन्तं न नयति शात्रवाञ्शत्रुकर्शनः
Na hi vairam samasadya prashamyati vrikodarah
Suchiradapi bhimasya na hi vairam prashamyati
Yavadantam na nayati shatravanshatrukarshanah
88.84
न दुःखं राज्यहरणं न च द्यूते पराजयः
प्रव्राजनं च पुत्राणां न मे तद्दुःखकारणम्
Na duhkham rajyaharanam na cha dyute parajayah
Pravrajanam cha putranam na me tadduhkhakaranam
88.85
यत्तु सा बृहती श्यामा एकवस्त्रा सभां गता
अशृणोत्परुषा वाचस्ततो दुःखतरं नु किम्
Yattu sa brihati shyama ekavastra sabham gata
Ashrinotparusha vachastato duhkhataram nu kim
88.86
स्त्रीधर्मिणी वरारोहा क्षत्रधर्मरता सदा
नाध्यगच्छत्तथा नाथं कृष्णा नाथवती सती
Stridharmini vararoha kshatradharmarata sada
Nadhyagachchhattatha natham krishna nathavati sati
88.87
यस्या मम सपुत्रायास्त्वं नाथो मधुसूदन
रामश्च बलिनां श्रेष्ठः प्रद्युम्नश्च महारथः
Yasya mama saputrayastvam natho madhusudana
Ramashcha balinam shreshthah pradyumnashcha maharathah
88.88
साहमेवंविधं दुःखं सहेऽद्य पुरुषोत्तम
भीमे जीवति दुर्धर्षे विजये चापलायिनि
Sahamevanvidham duhkham sahedya purushottama
Bhime jivati durdharshe vijaye chapalayini
88.89
तत आश्वासयामास पुत्राधिभिरभिप्लुताम्
पितृष्वसारं शोचन्तीं शौरिः पार्थसखः पृथाम्
Tata ashvasayamasa putradhibhirabhiplutam
Pitrishvasaram shochantim shaurih parthasakhah pritham
88.90
का नु सीमन्तिनी त्वादृग्लोकेष्वस्ति पितृष्वसः
शूरस्य राज्ञो दुहिता आजमीढकुलं गता
Ka nu simantini tvadriglokeshvasti pitrishvasah
Shurasya ragyo duhita ajamidhakulam gata
88.91
महाकुलीना भवती ह्रदाद्ध्रदमिवागता
ईश्वरी सर्वकल्याणी भर्त्रा परमपूजिता
Mahakulina bhavati hradaddhradamivagata
Ishvari sarvakalyani bhartra paramapujita
88.92
वीरसूर्वीरपत्नी च सर्वैः समुदिता गुणैः
सुखदुःखे महाप्राज्ञे त्वादृशी सोढुमर्हति
Virasurvirapatni cha sarvaih samudita gunaih
Sukhaduhkhe mahapragye tvadrishi sodhumarhati
88.93
निद्रातन्द्री क्रोधहर्षौ क्षुत्पिपासे हिमातपौ
एतानि पार्था निर्जित्य नित्यं वीराः सुखे रताः
Nidratandri krodhaharshau kshutpipase himatapau
Etani partha nirjitya nityam virah sukhe ratah
88.94
त्यक्तग्राम्यसुखाः पार्था नित्यं वीरसुखप्रियाः
न ते स्वल्पेन तुष्येयुर्महोत्साहा महाबलाः
Tyaktagramyasukhah partha nityam virasukhapriyah
Na te svalpena tushyeyurmahotsaha mahabalah
88.95
अन्तं धीरा निषेवन्ते मध्यं ग्राम्यसुखप्रियाः
उत्तमांश्च परिक्लेशान्भोगांश्चातीव मानुषान्
Antam dhira nishevante madhyam gramyasukhapriyah
Uttamanshcha parikleshanbhoganshchativa manushan
88.96
अन्तेषु रेमिरे धीरा न ते मध्येषु रेमिरे
अन्तप्राप्तिं सुखामाहुर्दुःखमन्तरमन्तयोः
Anteshu remire dhira na te madhyeshu remire
Antapraptim sukhamahurduhkhamantaramantayoh
88.97
अभिवादयन्ति भवतीं पाण्डवाः सह कृष्णया
आत्मानं च कुशलिनं निवेद्याहुरनामयम्
Abhivadayanti bhavatim pandavah saha krishnaya
Atmanam cha kushalinam nivedyahuranamayam
88.98
अरोगान्सर्वसिद्धार्थान्क्षिप्रं द्रक्ष्यसि पाण्डवान्
ईश्वरान्सर्वलोकस्य हतामित्राञ्श्रिया वृतान्
Arogansarvasiddharthankshipram drakshyasi pandavan
Ishvaransarvalokasya hatamitranshriya vritan
88.99
एवमाश्वासिता कुन्ती प्रत्युवाच जनार्दनम्
पुत्राधिभिरभिध्वस्ता निगृह्याबुद्धिजं तमः
Evamashvasita kunti pratyuvacha janardanam
Putradhibhirabhidhvasta nigrihyabuddhijam tamah
88.100
यद्यत्तेषां महाबाहो पथ्यं स्यान्मधुसूदन
यथा यथा त्वं मन्येथाः कुर्याः कृष्ण तथा तथा
Yadyattesham mahabaho pathyam syanmadhusudana
Yatha yatha tvam manyethah kuryah krishna tatha tatha
88.101
अविलोपेन धर्मस्य अनिकृत्या परंतप
प्रभावज्ञास्मि ते कृष्ण सत्यस्याभिजनस्य च
Avilopena dharmasya anikritya parantapa
Prabhavagyasmi te krishna satyasyabhijanasya cha
88.102
व्यवस्थायां च मित्रेषु बुद्धिविक्रमयोस्तथा
त्वमेव नः कुले धर्मस्त्वं सत्यं त्वं तपो महत्
Vyavasthayam cha mitreshu buddhivikramayostatha
Tvameva nah kule dharmastvam satyam tvam tapo mahat
88.103
त्वं त्राता त्वं महद्ब्रह्म त्वयि सर्वं प्रतिष्ठितम्
यथैवात्थ तथैवैतत्त्वयि सत्यं भविष्यति
Tvam trata tvam mahadbrahma tvayi sarvam pratishthitam
Yathaivattha tathaivaitattvayi satyam bhavishyati
88.104
तामामन्त्र्य च गोविन्दः कृत्वा चाभिप्रदक्षिणम्
प्रातिष्ठत महाबाहुर्दुर्योधनगृहान्प्रति
Tamamantrya cha govindah kritva chabhipradakshinam
Pratishthata mahabahurduryodhanagrihanprati