Utshovঅধ্যায় 89
89.1
বৈশংপায়ন উবাচ
পৃথামামন্ত্র্য গোবিন্দঃ কৃত্বা চাপি প্রদক্ষিণম্
দুর্যোধনগৃহং শৌরিরভ্যগচ্ছদরিংদমঃ
89.2
লক্ষ্ম্যা পরময়া যুক্তং পুরংদরগৃহোপমম্
তস্য কক্ষ্যা ব্যতিক্রম্য তিস্রো দ্বাঃস্থৈরবারিতঃ
89.3
ততোঽভ্রঘনসংকাশং গিরিকূটমিবোচ্ছ্রিতম্
শ্রিয়া জ্বলন্তং প্রাসাদমারুরোহ মহায়শাঃ
89.4
তত্র রাজসহস্রৈশ্চ কুরুভিশ্চাভিসংবৃতম্
ধার্তরাষ্ট্রং মহাবাহুং দদর্শাসীনমাসনে
89.5
দুঃশাসনং চ কর্ণং চ শকুনিং চাপি সৌবলম্
দুর্যোধনসমীপে তানাসনস্থান্দদর্শ সঃ
89.6
অভ্যাগচ্ছতি দাশার্হে ধার্তরাষ্ট্রো মহায়শাঃ
উদতিষ্ঠত্সহামাত্যঃ পূজয়ন্মধুসূদনম্
89.7
সমেত্য ধার্তরাষ্ট্রেণ সহামাত্যেন কেশবঃ
রাজভিস্তত্র বার্ষ্ণেয়ঃ সমাগচ্ছদ্যথাবয়ঃ
89.8
তত্র জাম্বূনদময়ং পর্যঙ্কং সুপরিষ্কৃতম্
বিবিধাস্তরণাস্তীর্ণমভ্যুপাবিশদচ্যুতঃ
89.9
তস্মিন্গাং মধুপর্কং চ উপহৃত্য জনার্দনে
নিবেদয়ামাস তদা গৃহান্রাজ্যং চ কৌরবঃ
89.10
তত্র গোবিন্দমাসীনং প্রসন্নাদিত্যবর্চসম্
উপাসাং চক্রিরে সর্বে কুরবো রাজভিঃ সহ
89.11
ততো দুর্যোধনো রাজা বার্ষ্ণেয়ং জয়তাং বরম্
ন্যমন্ত্রয়দ্ভোজনেন নাভ্যনন্দচ্চ কেশবঃ
89.12
ততো দুর্যোধনঃ কৃষ্ণমব্রবীদ্রাজসংসদি
মৃদুপূর্বং শঠোদর্কং কর্ণমাভাষ্য কৌরবঃ
89.13
কস্মাদন্নানি পানানি বাসাংসি শয়নানি চ
ত্বদর্থমুপনীতানি নাগ্রহীস্ত্বং জনার্দন
89.14
উভয়োশ্চাদদঃ সাহ্যমুভয়োশ্চ হিতে রতঃ
সংবন্ধী দয়িতশ্চাসি ধৃতরাষ্ট্রস্য মাধব
89.15
ত্বং হি গোবিন্দ ধর্মার্থৌ বেত্থ তত্ত্বেন সর্বশঃ
তত্র কারণমিচ্ছামি শ্রোতুং চক্রগদাধর
89.16
স এবমুক্তো গোবিন্দঃ প্রত্যুবাচ মহামনাঃ
ওঘমেঘস্বনঃ কালে প্রগৃহ্য বিপুলং ভুজম্
89.17
অনম্বূকৃতমগ্রস্তমনিরস্তমসংকুলম্
রাজীবনেত্রো রাজানং হেতুমদ্বাক্যমুত্তমম্
89.18
কৃতার্থা ভুঞ্জতে দূতাঃ পূজাং গৃহ্ণন্তি চৈব হি
কৃতার্থং মাং সহামাত্যস্ত্বমর্চিষ্যসি ভারত
89.19
এবমুক্তঃ প্রত্যুবাচ ধার্তরাষ্ট্রো জনার্দনম্
ন যুক্তং ভবতাস্মাসু প্রতিপত্তুমসাংপ্রতম্
89.20
কৃতার্থং চাকৃতার্থং চ ত্বাং বয়ং মধুসূদন
যতামহে পূজয়িতুং গোবিন্দ ন চ শক্নুমঃ
89.21
ন চ তত্কারণং বিদ্মো যস্মিন্নো মধুসূদন
পূজাং কৃতাং প্রীয়মাণৈর্নামংস্থাঃ পুরুষোত্তম
89.22
বৈরং নো নাস্তি ভবতা গোবিন্দ ন চ বিগ্রহঃ
স ভবান্প্রসমীক্ষ্যৈতন্নেদৃশং বক্তুমর্হতি
89.23
এবমুক্তঃ প্রত্যুবাচ ধার্তরাষ্ট্রং জনার্দনঃ
অভিবীক্ষ্য সহামাত্যং দাশার্হঃ প্রহসন্নিব
89.24
নাহং কামান্ন সংরম্ভান্ন দ্বেষান্নার্থকারণাৎ
ন হেতুবাদাল্লোভাদ্বা ধর্মং জহ্যাং কথংচন
89.25
সংপ্রীতিভোজ্যান্যন্নানি আপদ্ভোজ্যানি বা পুনঃ
ন চ সংপ্রীয়সে রাজন্ন চাপ্যাপদ্গতা বয়ম্
89.26
অকস্মাদ্দ্বিষসে রাজঞ্জন্মপ্রভৃতি পাণ্ডবান্
প্রিয়ানুবর্তিনো ভ্রাতৄন্সর্বৈঃ সমুদিতান্গুণৈঃ
89.27
অকস্মাচ্চৈব পার্থানাং দ্বেষণং নোপপদ্যতে
ধর্মে স্থিতাঃ পাণ্ডবেয়াঃ কস্তান্কিং বক্তুমর্হতি
89.28
যস্তান্দ্বেষ্টি স মাং দ্বেষ্টি যস্তাননু স মামনু
ঐকাত্ম্যং মাং গতং বিদ্ধি পাণ্ডবৈর্ধর্মচারিভিঃ
89.29
কামক্রোধানুবর্তী হি যো মোহাদ্বিরুরুত্সতে
গুণবন্তং চ যো দ্বেষ্টি তমাহুঃ পুরুষাধমম্
89.30
যঃ কল্যাণগুণাঞ্জ্ঞাতীন্মোহাল্লোভাদ্দিদৃক্ষতে
সোঽজিতাত্মাজিতক্রোধো ন চিরং তিষ্ঠতি শ্রিয়ম্
89.31
অথ যো গুণসংপন্নান্হৃদয়স্যাপ্রিয়ানপি
প্রিয়েণ কুরুতে বশ্যাংশ্চিরং যশসি তিষ্ঠতি
89.32
সর্বমেতদভোক্তব্যমন্নং দুষ্টাভিসংহিতম্
ক্ষত্তুরেকস্য ভোক্তব্যমিতি মে ধীয়তে মতিঃ
89.33
এবমুক্ত্বা মহাবাহুর্দুর্যোধনমমর্ষণম্
নিশ্চক্রাম ততঃ শুভ্রাদ্ধার্তরাষ্ট্রনিবেশনাৎ
89.34
নির্যায় চ মহাবাহুর্বাসুদেবো মহামনাঃ
নিবেশায় যয়ৌ বেশ্ম বিদুরস্য মহাত্মনঃ
89.35
তমভ্যগচ্ছদ্দ্রোণশ্চ কৃপো ভীষ্মোঽথ বাহ্লিকঃ
কুরবশ্চ মহাবাহুং বিদুরস্য গৃহে স্থিতম্
89.36
তেঽভিগম্যাব্রুবংস্তত্র কুরবো মধুসূদনম্
নিবেদয়ামো বার্ষ্ণেয় সরত্নাংস্তে গৃহান্বয়ম্
89.37
তানুবাচ মহাতেজাঃ কৌরবান্মধুসূদনঃ
সর্বে ভবন্তো গচ্ছন্তু সর্বা মেঽপচিতিঃ কৃতা
89.38
যাতেষু কুরুষু ক্ষত্তা দাশার্হমপরাজিতম্
অভ্যর্চয়ামাস তদা সর্বকামৈঃ প্রয়ত্নবান্
89.39
ততঃ ক্ষত্তান্নপানানি শুচীনি গুণবন্তি চ
উপাহরদনেকানি কেশবায় মহাত্মনে
89.40
তৈর্তর্পয়িত্বা প্রথমং ব্রাহ্মণান্মধুসূদনঃ
বেদবিদ্ভ্যো দদৌ কৃষ্ণঃ পরমদ্রবিণান্যপি
89.41
ততোঽনুয়ায়িভিঃ সার্ধং মরুদ্ভিরিব বাসবঃ
বিদুরান্নানি বুভুজে শুচীনি গুণবন্তি চ