Utshovঅধ্যায় 90
90.1
বৈশংপায়ন উবাচ
তং ভুক্তবন্তমাশ্বস্তং নিশায়াং বিদুরোঽব্রবীৎ
নেদং সম্যগ্ব্যবসিতং কেশবাগমনং তব
90.2
অর্থধর্মাতিগো মূঢঃ সংরম্ভী চ জনার্দন
মানঘ্নো মানকামশ্চ বৃদ্ধানাং শাসনাতিগঃ
90.3
ধর্মশাস্ত্রাতিগো মন্দো দুরাত্মা প্রগ্রহং গতঃ
অনেয়ঃ শ্রেয়সাং পাপো ধার্তরাষ্ট্রো জনার্দন
90.4
কামাত্মা প্রাজ্ঞমানী চ মিত্রধ্রুক্সর্বশঙ্কিতঃ
অকর্তা চাকৃতজ্ঞশ্চ ত্যক্তধর্মঃ প্রিয়ানৃতঃ
90.5
এতৈশ্চান্যৈশ্চ বহুভির্দোষৈরেষ সমন্বিতঃ
ত্বয়োচ্যমানঃ শ্রেয়োঽপি সংরম্ভান্ন গ্রহীষ্যতি
90.6
সেনাসমুদয়ং দৃষ্ট্বা পার্থিবং মধুসূদন
কৃতার্থং মন্যতে বাল আত্মানমবিচক্ষণঃ
90.7
একঃ কর্ণঃ পরাঞ্জেতুং সমর্থ ইতি নিশ্চিতম্
ধার্তরাষ্ট্রস্য দুর্বুদ্ধেঃ স শমং নোপয়াস্যতি
90.8
ভীষ্মে দ্রোণে কৃপে কর্ণে দ্রোণপুত্রে জয়দ্রথে
ভূয়সীং বর্ততে বৃত্তিং ন শমে কুরুতে মনঃ
90.9
নিশ্চিতং ধার্তরাষ্ট্রাণাং সকর্ণানাং জনার্দন
ভীষ্মদ্রোণকৃপান্পার্থা ন শক্তাঃ প্রতিবীক্ষিতুম্
90.10
সংবিচ্চ ধার্তরাষ্ট্রাণাং সর্বেষামেব কেশব
শমে প্রয়তমানস্য তব সৌভ্রাত্রকাঙ্ক্ষিণঃ
90.11
ন পাণ্ডবানামস্মাভিঃ প্রতিদেয়ং যথোচিতম্
ইতি ব্যবসিতাস্তেষু বচনং স্যান্নিরর্থকম্
90.12
যত্র সূক্তং দুরুক্তং চ সমং স্যান্মধুসূদন
ন তত্র প্রলপেত্প্রাজ্ঞো বধিরেষ্বিব গায়নঃ
90.13
অবিজানত্সু মূঢেষু নির্মর্যাদেষু মাধব
ন ত্বং বাক্যং ব্রুবন্যুক্তশ্চাণ্ডালেষু দ্বিজো যথা
90.14
সোঽয়ং বলস্থো মূঢশ্চ ন করিষ্যতি তে বচঃ
তস্মিন্নিরর্থকং বাক্যমুক্তং সংপত্স্যতে তব
90.15
তেষাং সমুপবিষ্টানাং সর্বেষাং পাপচেতসাম্
তব মধ্যাবতরণং মম কৃষ্ণ ন রোচতে
90.16
দুর্বুদ্ধীনামশিষ্টানাং বহূনাং পাপচেতসাম্
প্রতীপং বচনং মধ্যে তব কৃষ্ণ ন রোচতে
90.17
অনুপাসিতবৃদ্ধত্বাচ্ছ্রিয়া মোহাচ্চ দর্পিতঃ
বয়োদর্পাদমর্ষাচ্চ ন তে শ্রেয়ো গ্রহীষ্যতি
90.18
বলং বলবদপ্যস্য যদি বক্ষ্যসি মাধব
ত্বয্যস্য মহতী শঙ্কা ন করিষ্যতি তে বচঃ
90.19
নেদমদ্য যুধা শক্যমিন্দ্রেণাপি সহামরৈঃ
ইতি ব্যবসিতাঃ সর্বে ধার্তরাষ্ট্রা জনার্দন
90.20
তেষ্বেবমুপপন্নেষু কামক্রোধানুবর্তিষু
সমর্থমপি তে বাক্যমসমর্থং ভবিষ্যতি
90.21
মধ্যে তিষ্ঠন্হস্ত্যনীকস্য মন্দো; রথাশ্বয়ুক্তস্য বলস্য মূঢঃ
দুর্যোধনো মন্যতে বীতমন্যুঃ; কৃত্স্না ময়েয়ং পৃথিবী জিতেতি
90.22
আশংসতে ধৃতরাষ্ট্রস্য পুত্রো; মহারাজ্যমসপত্নং পৃথিব্যাম্
তস্মিঞ্শমঃ কেবলো নোপলভ্যো; বদ্ধং সন্তমাগতং মন্যতেঽর্থম্
90.23
পর্যস্তেয়ং পৃথিবী কালপক্বা; দুর্যোধনার্থে পাণ্ডবান্যোদ্ধুকামাঃ
সমাগতাঃ সর্বয়োধাঃ পৃথিব্যাং; রাজানশ্চ ক্ষিতিপালৈঃ সমেতাঃ
90.24
সর্বে চৈতে কৃতবৈরাঃ পুরস্তা;ত্ত্বয়া রাজানো হৃতসারাশ্চ কৃষ্ণ
তবোদ্বেগাত্সংশ্রিতা ধার্তরাষ্ট্রা;ন্সুসংহতাঃ সহ কর্ণেন বীরাঃ
90.25
ত্যক্তাত্মানঃ সহ দুর্যোধনেন; সৃষ্টা যোদ্ধুং পাণ্ডবান্সর্বয়োধাঃ
তেষাং মধ্যে প্রবিশেথা যদি ত্বং; ন তন্মতং মম দাশার্হ বীর
90.26
তেষাং সমুপবিষ্টানাং বহূনাং দুষ্টচেতসাম্
কথং মধ্যং প্রপদ্যেথাঃ শত্রূণাং শত্রুকর্শন
90.27
সর্বথা ত্বং মহাবাহো দেবৈরপি দুরুত্সহঃ
প্রভাবং পৌরুষং বুদ্ধিং জানামি তব শত্রুহন্
90.28
যা মে প্রীতিঃ পাণ্ডবেষু ভূয়ঃ সা ত্বয়ি মাধব
প্রেম্ণা চ বহুমানাচ্চ সৌহৃদাচ্চ ব্রবীম্যহম্