অধ্যায় 91

91.1

ভগবানুবাচ
যথা ব্রূয়ান্মহাপ্রাজ্ঞো যথা ব্রূয়াদ্বিচক্ষণঃ
যথা বাচ্যস্ত্বদ্বিধেন সুহৃদা মদ্বিধঃ সুহৃৎ

ধর্মার্থয়ুক্তং তথ্যং চ যথা ত্বয্যুপপদ্যতে
তথা বচনমুক্তোঽস্মি ত্বয়ৈতত্পিতৃমাতৃবৎ

সত্যং প্রাপ্তং চ যুক্তং চাপ্যেবমেব যথাত্থ মাম্
শৃণুষ্বাগমনে হেতুং বিদুরাবহিতো ভব

দৌরাত্ম্যং ধার্তরাষ্ট্রস্য ক্ষত্রিয়াণাং চ বৈরিতাম্
সর্বমেতদহং জানন্ক্ষত্তঃ প্রাপ্তোঽদ্য কৌরবান্

পর্যস্তাং পৃথিবীং সর্বাং সাশ্বাং সরথকুঞ্জরাম্
যো মোচয়েন্মৃত্যুপাশাত্প্রাপ্নুয়াদ্ধর্মমুত্তমম্

ধর্মকার্যং যতঞ্শক্ত্যা ন চেচ্ছক্নোতি মানবঃ
প্রাপ্তো ভবতি তত্পুণ্যমত্র মে নাস্তি সংশয়ঃ

মনসা চিন্তয়ন্পাপং কর্মণা নাভিরোচয়ন্
ন প্রাপ্নোতি ফলং তস্য এবং ধর্মবিদো বিদুঃ

সোঽহং যতিষ্যে প্রশমং ক্ষত্তঃ কর্তুমমায়য়া
কুরূণাং সৃঞ্জয়ানাং চ সংগ্রামে বিনশিষ্যতাম্

সেয়মাপন্মহাঘোরা কুরুষ্বেব সমুত্থিতা
কর্ণদুর্যোধনকৃতা সর্বে হ্যেতে তদন্বয়াঃ

ব্যসনৈঃ ক্লিশ্যমানং হি যো মিত্রং নাভিপদ্যতে
অনুনীয় যথাশক্তি তং নৃশংসং বিদুর্বুধাঃ

আ কেশগ্রহণান্মিত্রমকার্যাত্সংনিবর্তয়ন্
অবাচ্যঃ কস্যচিদ্ভবতি কৃতয়ত্নো যথাবলম্

তত্সমর্থং শুভং বাক্যং ধর্মার্থসহিতং হিতম্
ধার্তরাষ্ট্রঃ সহামাত্যো গ্রহীতুং বিদুরার্হতি

হিতং হি ধার্তরাষ্ট্রাণাং পাণ্ডবানাং তথৈব চ
পৃথিব্যাং ক্ষত্রিয়াণাং চ যতিষ্যেঽহমমায়য়া

হিতে প্রয়তমানং মাং শঙ্কেদ্দুর্যোধনো যদি
হৃদয়স্য চ মে প্রীতিরানৃণ্যং চ ভবিষ্যতি

জ্ঞাতীনাং হি মিথো ভেদে যন্মিত্রং নাভিপদ্যতে
সর্বয়ত্নেন মধ্যস্থং ন তন্মিত্রং বিদুর্বুধাঃ

ন মাং ব্রূয়ুরধর্মজ্ঞা মূঢা অসুহৃদস্তথা
শক্তো নাবারয়ত্কৃষ্ণঃ সংরব্ধান্কুরুপাণ্ডবান্

উভয়োঃ সাধয়ন্নর্থমহমাগত ইত্যুত
তত্র যত্নমহং কৃত্বা গচ্ছেয়ং নৃষ্ববাচ্যতাম্

মম ধর্মার্থয়ুক্তং হি শ্রুত্বা বাক্যমনাময়ম্
ন চেদাদাস্যতে বালো দিষ্টস্য বশমেষ্যতি

অহাপয়ন্পাণ্ডবার্থং যথাব;চ্ছমং কুরূণাং যদি চাচরেয়ম্
পুণ্যং চ মে স্যাচ্চরিতং মহার্থং; মুচ্যেরংশ্চ কুরবো মৃত্যুপাশাৎ

অপি বাচং ভাষমাণস্য কাব্যাং; ধর্মারামামর্থবতীমহিংস্রাম্
অবেক্ষেরন্ধার্তরাষ্ট্রাঃ সমর্থাং; মাং চ প্রাপ্তং কুরবঃ পূজয়েয়ুঃ

ন চাপি মম পর্যাপ্তাঃ সহিতাঃ সর্বপার্থিবাঃ
ক্রুদ্ধস্য প্রমুখে স্থাতুং সিংহস্যেবেতরে মৃগাঃ

বৈশংপায়ন উবাচ
ইত্যেবমুক্ত্বা বচনং বৃষ্ণীনামৃষভস্তদা
শয়নে সুখসংস্পর্শে শিশ্যে যদুসুখাবহঃ