Utshovঅধ্যায় 92
92.1
বৈশংপায়ন উবাচ
তথা কথয়তোরেব তয়োর্বুদ্ধিমতোস্তদা
শিবা নক্ষত্রসংপন্না সা ব্যতীয়ায় শর্বরী
92.2
ধর্মার্থকাময়ুক্তাশ্চ বিচিত্রার্থপদাক্ষরাঃ
শৃণ্বতো বিবিধা বাচো বিদুরস্য মহাত্মনঃ
92.3
কথাভিরনুরূপাভিঃ কৃষ্ণস্যামিততেজসঃ
অকামস্যেব কৃষ্ণস্য সা ব্যতীয়ায় শর্বরী
92.4
ততস্তু স্বরসংপন্না বহবঃ সূতমাগধাঃ
শঙ্খদুন্দুভিনির্ঘোষৈঃ কেশবং প্রত্যবোধয়ন্
92.5
তত উত্থায় দাশার্হ ঋষভঃ সর্বসাত্বতাম্
সর্বমাবশ্যকং চক্রে প্রাতঃকার্যং জনার্দনঃ
92.6
কৃতোদকার্যজপ্যঃ স হুতাগ্নিঃ সমলংকৃতঃ
তত আদিত্যমুদ্যন্তমুপাতিষ্ঠত মাধবঃ
92.7
অথ দুর্যোধনঃ কৃষ্ণং শকুনিশ্চাপি সৌবলঃ
সংধ্যাং তিষ্ঠন্তমভ্যেত্য দাশার্হমপরাজিতম্
92.8
আচক্ষেতাং তু কৃষ্ণস্য ধৃতরাষ্ট্রং সভাগতম্
কুরূংশ্চ ভীষ্মপ্রমুখান্রাজ্ঞঃ সর্বাংশ্চ পার্থিবান্
92.9
ত্বামর্থয়ন্তে গোবিন্দ দিবি শক্রমিবামরাঃ
তাবভ্যনন্দদ্গোবিন্দঃ সাম্না পরমবল্গুনা
92.10
ততো বিমল আদিত্যে ব্রাহ্মণেভ্যো জনার্দনঃ
দদৌ হিরণ্যং বাসাংসি গাশ্চাশ্বাংশ্চ পরংতপঃ
92.11
বিসৃষ্টবন্তং রত্নানি দাশার্হমপরাজিতম্
তিষ্ঠন্তমুপসংগম্য ববন্দে সারথিস্তদা
92.12
তমুপস্থিতমাজ্ঞায় রথং দিব্যং মহামনাঃ
মহাভ্রঘননির্ঘোষং সর্বরত্নবিভূষিতম্
92.13
অগ্নিং প্রদক্ষিণং কৃত্বা ব্রাহ্মণাংশ্চ জনার্দনঃ
কৌস্তুভং মণিমামুচ্য শ্রিয়া পরময়া জ্বলন্
92.14
কুরুভিঃ সংবৃতঃ কৃষ্ণো বৃষ্ণিভিশ্চাভিরক্ষিতঃ
আতিষ্ঠত রথং শৌরিঃ সর্বয়াদবনন্দনঃ
92.15
অন্বারুরোহ দাশার্হং বিদুরঃ সর্বধর্মবিৎ
সর্বপ্রাণভৃতাং শ্রেষ্ঠং সর্বধর্মভৃতাং বরম্
92.16
ততো দুর্যোধনঃ কৃষ্ণং শকুনিশ্চাপি সৌবলঃ
দ্বিতীয়েন রথেনৈনমন্বয়াতাং পরংতপম্
92.17
সাত্যকিঃ কৃতবর্মা চ বৃষ্ণীনাং চ মহারথাঃ
পৃষ্ঠতোঽনুয়য়ুঃ কৃষ্ণং রথৈরশ্বৈর্গজৈরপি
92.18
তেষাং হেমপরিষ্কারা যুক্তাঃ পরমবাজিভিঃ
গচ্ছতাং ঘোষিণশ্চিত্রাশ্চারু বভ্রাজিরে রথাঃ
92.19
সংমৃষ্টসংসিক্তরজঃ প্রতিপেদে মহাপথম্
রাজর্ষিচরিতং কালে কৃষ্ণো ধীমাঞ্শ্রিয়া জ্বলন্
92.20
ততঃ প্রয়াতে দাশার্হে প্রাবাদ্যন্তৈকপুষ্করাঃ
শঙ্খাশ্চ দধ্মিরে তত্র বাদ্যান্যন্যানি যানি চ
92.21
প্রবীরাঃ সর্বলোকস্য যুবানঃ সিংহবিক্রমাঃ
পরিবার্য রথং শৌরেরগচ্ছন্ত পরংতপাঃ
92.22
ততোঽন্যে বহুসাহস্রা বিচিত্রাদ্ভুতবাসসঃ
অসিপ্রাসায়ুধধরাঃ কৃষ্ণস্যাসন্পুরঃসরাঃ
92.23
গজাঃ পরঃশতাস্তত্র বরাশ্চাশ্বাঃ সহস্রশঃ
প্রয়ান্তমন্বয়ুর্বীরং দাশার্হমপরাজিতম্
92.24
পুরং কুরূণাং সংবৃত্তং দ্রষ্টুকামং জনার্দনম্
সবৃদ্ধবালং সস্ত্রীকং রথ্যাগতমরিংদমম্
92.25
বেদিকাপাশ্রিতাভিশ্চ সমাক্রান্তান্যনেকশঃ
প্রচলন্তীব ভারেণ যোষিদ্ভির্ভবনান্যুত
92.26
সংপূজ্যমানঃ কুরুভিঃ সংশৃণ্বন্বিবিধাঃ কথাঃ
যথার্হং প্রতিসত্কুর্বন্প্রেক্ষমাণঃ শনৈর্যয়ৌ
92.27
ততঃ সভাং সমাসাদ্য কেশবস্যানুয়ায়িনঃ
সশঙ্খৈর্বেণুনির্ঘোষৈর্দিশঃ সর্বা ব্যনাদয়ন্
92.28
ততঃ সা সমিতিঃ সর্বা রাজ্ঞামমিততেজসাম্
সংপ্রাকম্পত হর্ষেণ কৃষ্ণাগমনকাঙ্ক্ষয়া
92.29
ততোঽভ্যাশগতে কৃষ্ণে সমহৃষ্যন্নরাধিপাঃ
শ্রুত্বা তং রথনির্ঘোষং পর্জন্যনিনদোপমম্
92.30
আসাদ্য তু সভাদ্বারমৃষভঃ সর্বসাত্বতাম্
অবতীর্য রথাচ্ছৌরিঃ কৈলাসশিখরোপমাৎ
92.31
নগমেঘপ্রতীকাশাং জ্বলন্তীমিব তেজসা
মহেন্দ্রসদনপ্রখ্যাং প্রবিবেশ সভাং ততঃ
92.32
পাণৌ গৃহীত্বা বিদুরং সাত্যকিং চ মহায়শাঃ
জ্যোতীংষ্যাদিত্যবদ্রাজন্কুরূন্প্রচ্ছাদয়ঞ্শ্রিয়া
92.33
অগ্রতো বাসুদেবস্য কর্ণদুর্যোধনাবুভৌ
বৃষ্ণয়ঃ কৃতবর্মা চ আসন্কৃষ্ণস্য পৃষ্ঠতঃ
92.34
ধৃতরাষ্ট্রং পুরস্কৃত্য ভীষ্মদ্রোণাদয়স্ততঃ
আসনেভ্যোঽচলন্সর্বে পূজয়ন্তো জনার্দনম্
92.35
অভ্যাগচ্ছতি দাশার্হে প্রজ্ঞাচক্ষুর্মহামনাঃ
সহৈব ভীষ্মদ্রোণাভ্যামুদতিষ্ঠন্মহায়শাঃ
92.36
উত্তিষ্ঠতি মহারাজে ধৃতরাষ্ট্রে জনেশ্বরে
তানি রাজসহস্রাণি সমুত্তস্থুঃ সমন্ততঃ
92.37
আসনং সর্বতোভদ্রং জাম্বূনদপরিষ্কৃতম্
কৃষ্ণার্থে কল্পিতং তত্র ধৃতরাষ্ট্রস্য শাসনাৎ
92.38
স্ময়মানস্তু রাজানং ভীষ্মদ্রোণৌ চ মাধবঃ
অভ্যভাষত ধর্মাত্মা রাজ্ঞশ্চান্যান্যথাবয়ঃ
92.39
তত্র কেশবমানর্চুঃ সম্যগভ্যাগতং সভাম্
রাজানঃ পার্থিবাঃ সর্বে কুরবশ্চ জনার্দনম্
92.40
তত্র তিষ্ঠন্স দাশার্হো রাজমধ্যে পরংতপঃ
অপশ্যদন্তরিক্ষস্থানৃষীন্পরপুরংজয়ঃ
92.41
ততস্তানভিসংপ্রেক্ষ্য নারদপ্রমুখানৃষীন্
অভ্যভাষত দাশার্হো ভীষ্মং শাংতনবং শনৈঃ
92.42
পার্থিবীং সমিতিং দ্রষ্টুমৃষয়োঽভ্যাগতা নৃপ
নিমন্ত্র্যন্তামাসনৈশ্চ সত্কারেণ চ ভূয়সা
92.43
নৈতেষ্বনুপবিষ্টেষু শক্যং কেনচিদাসিতুম্
পূজা প্রয়ুজ্যতামাশু মুনীনাং ভাবিতাত্মনাম্
92.44
ঋষীঞ্শাংতনবো দৃষ্ট্বা সভাদ্বারমুপস্থিতান্
ত্বরমাণস্ততো ভৃত্যানাসনানীত্যচোদয়ৎ
92.45
আসনান্যথ মৃষ্টানি মহান্তি বিপুলানি চ
মণিকাঞ্চনচিত্রাণি সমাজহ্রুস্ততস্ততঃ
92.46
তেষু তত্রোপবিষ্টেষু গৃহীতার্ঘেষু ভারত
নিষসাদাসনে কৃষ্ণো রাজানশ্চ যথাসনম্
92.47
দুঃশাসনঃ সাত্যকয়ে দদাবাসনমুত্তমম্
বিবিংশতির্দদৌ পীঠং কাঞ্চনং কৃতবর্মণে
92.48
অবিদূরেঽথ কৃষ্ণস্য কর্ণদুর্যোধনাবুভৌ
একাসনে মহাত্মানৌ নিষীদতুরমর্ষণৌ
92.49
গান্ধাররাজঃ শকুনির্গান্ধারৈরভিরক্ষিতঃ
নিষসাদাসনে রাজা সহপুত্রো বিশাং পতে
92.50
বিদুরো মণিপীঠে তু শুক্লস্পর্ধ্যাজিনোত্তরে
সংস্পৃশন্নাসনং শৌরের্মহামতিরুপাবিশৎ
92.51
চিরস্য দৃষ্ট্বা দাশার্হং রাজানঃ সর্বপার্থিবাঃ
অমৃতস্যেব নাতৃপ্যন্প্রেক্ষমাণা জনার্দনম্
92.52
অতসীপুষ্পসংকাশঃ পীতবাসা জনার্দনঃ
ব্যভ্রাজত সভামধ্যে হেম্নীবোপহিতো মণিঃ
92.53
ততস্তূষ্ণীং সর্বমাসীদ্গোবিন্দগতমানসম্
ন তত্র কশ্চিত্কিংচিদ্ধি ব্যাজহার পুমান্ক্বচিৎ