Utshovঅধ্যায় 93
93.1
বৈশংপায়ন উবাচ
তেষ্বাসীনেষু সর্বেষু তূষ্ণীংভূতেষু রাজসু
বাক্যমভ্যাদদে কৃষ্ণঃ সুদংষ্ট্রো দুন্দুভিস্বনঃ
93.2
জীমূত ইব ঘর্মান্তে সর্বাং সংশ্রাবয়ন্সভাম্
ধৃতরাষ্ট্রমভিপ্রেক্ষ্য সমভাষত মাধবঃ
93.3
কুরূণাং পাণ্ডবানাং চ শমঃ স্যাদিতি ভারত
অপ্রয়ত্নেন বীরাণামেতদ্যতিতুমাগতঃ
93.4
রাজন্নান্যত্প্রবক্তব্যং তব নিঃশ্রেয়সং বচঃ
বিদিতং হ্যেব তে সর্বং বেদিতব্যমরিংদম
93.5
ইদমদ্য কুলং শ্রেষ্ঠং সর্বরাজসু পার্থিব
শ্রুতবৃত্তোপসংপন্নং সর্বৈঃ সমুদিতং গুণৈঃ
93.6
কৃপানুকম্পা কারুণ্যমানৃশংস্যং চ ভারত
তথার্জবং ক্ষমা সত্যং কুরুষ্বেতদ্বিশিষ্যতে
93.7
তস্মিন্নেবংবিধে রাজন্কুলে মহতি তিষ্ঠতি
ত্বন্নিমিত্তং বিশেষেণ নেহ যুক্তমসাংপ্রতম্
93.8
ত্বং হি বারয়িতা শ্রেষ্ঠঃ কুরূণাং কুরুসত্তম
মিথ্যা প্রচরতাং তাত বাহ্যেষ্বাভ্যন্তরেষু চ
93.9
তে পুত্রাস্তব কৌরব্য দুর্যোধনপুরোগমাঃ
ধর্মার্থৌ পৃষ্ঠতঃ কৃত্বা প্রচরন্তি নৃশংসবৎ
93.10
অশিষ্টা গতমর্যাদা লোভেন হৃতচেতসঃ
স্বেষু বন্ধুষু মুখ্যেষু তদ্বেত্থ ভরতর্ষভ
93.11
সেয়মাপন্মহাঘোরা কুরুষ্বেব সমুত্থিতা
উপেক্ষ্যমাণা কৌরব্য পৃথিবীং ঘাতয়িষ্যতি
93.12
শক্যা চেয়ং শময়িতুং ত্বং চেদিচ্ছসি ভারত
ন দুষ্করো হ্যত্র শমো মতো মে ভরতর্ষভ
93.13
ত্বয্যধীনঃ শমো রাজন্ময়ি চৈব বিশাং পতে
পুত্রান্স্থাপয় কৌরব্য স্থাপয়িষ্যাম্যহং পরান্
93.14
আজ্ঞা তব হি রাজেন্দ্র কার্যা পুত্রৈঃ সহান্বয়ৈঃ
হিতং বলবদপ্যেষাং তিষ্ঠতাং তব শাসনে
93.15
তব চৈব হিতং রাজন্পাণ্ডবানামথো হিতম্
শমে প্রয়তমানস্য মম শাসনকাঙ্ক্ষিণাম্
93.16
স্বয়ং নিষ্কলমালক্ষ্য সংবিধত্স্ব বিশাং পতে
সহভূতাস্তু ভরতাস্তবৈব স্যুর্জনেশ্বর
93.17
ধর্মার্থয়োস্তিষ্ঠ রাজন্পাণ্ডবৈরভিরক্ষিতঃ
ন হি শক্যাস্তথাভূতা যত্নাদপি নরাধিপ
93.18
ন হি ত্বাং পাণ্ডবৈর্জেতুং রক্ষ্যমাণং মহাত্মভিঃ
ইন্দ্রোঽপি দেবৈঃ সহিতঃ প্রসহেত কুতো নৃপাঃ
93.19
যত্র ভীষ্মশ্চ দ্রোণশ্চ কৃপঃ কর্ণো বিবিংশতিঃ
অশ্বত্থামা বিকর্ণশ্চ সোমদত্তোঽথ বাহ্লিকঃ
93.20
সৈন্ধবশ্চ কলিঙ্গশ্চ কাম্বোজশ্চ সুদক্ষিণঃ
যুধিষ্ঠিরো ভীমসেনঃ সব্যসাচী যমৌ তথা
93.21
সাত্যকিশ্চ মহাতেজা যুয়ুত্সুশ্চ মহারথঃ
কো নু তান্বিপরীতাত্মা যুধ্যেত ভরতর্ষভ
93.22
লোকস্যেশ্বরতাং ভূয়ঃ শত্রুভিশ্চাপ্রধৃষ্যতাম্
প্রাপ্স্যসি ত্বমমিত্রঘ্ন সহিতঃ কুরুপাণ্ডবৈঃ
93.23
তস্য তে পৃথিবীপালাস্ত্বত্সমাঃ পৃথিবীপতে
শ্রেয়াংসশ্চৈব রাজানঃ সংধাস্যন্তে পরংতপ
93.24
স ত্বং পুত্রৈশ্চ পৌত্রৈশ্চ ভ্রাতৃভিঃ পিতৃভিস্তথা
সুহৃদ্ভিঃ সর্বতো গুপ্তঃ সুখং শক্ষ্যসি জীবিতুম্
93.25
এতানেব পুরোধায় সত্কৃত্য চ যথা পুরা
অখিলাং ভোক্ষ্যসে সর্বাং পৃথিবীং পৃথিবীপতে
93.26
এতৈর্হি সহিতঃ সর্বৈঃ পাণ্ডবৈঃ স্বৈশ্চ ভারত
অন্যান্বিজেষ্যসে শত্রূনেষ স্বার্থস্তবাখিলঃ
93.27
তৈরেবোপার্জিতাং ভূমিং ভোক্ষ্যসে চ পরংতপ
যদি সংপত্স্যসে পুত্রৈঃ সহামাত্যৈর্নরাধিপ
93.28
সংয়ুগে বৈ মহারাজ দৃশ্যতে সুমহান্ক্ষয়ঃ
ক্ষয়ে চোভয়তো রাজন্কং ধর্মমনুপশ্যসি
93.29
পাণ্ডবৈর্নিহতৈঃ সংখ্যে পুত্রৈর্বাপি মহাবলৈঃ
যদ্বিন্দেথাঃ সুখং রাজংস্তদ্ব্রূহি ভরতর্ষভ
93.30
শূরাশ্চ হি কৃতাস্ত্রাশ্চ সর্বে যুদ্ধাভিকাঙ্ক্ষিণঃ
পাণ্ডবাস্তাবকাশ্চৈব তান্রক্ষ মহতো ভয়াৎ
93.31
ন পশ্যেম কুরূন্সর্বান্পাণ্ডবাংশ্চৈব সংয়ুগে
ক্ষীণানুভয়তঃ শূরান্রথেভ্যো রথিভির্হতান্
93.32
সমবেতাঃ পৃথিব্যাং হি রাজানো রাজসত্তম
অমর্ষবশমাপন্না নাশয়েয়ুরিমাঃ প্রজাঃ
93.33
ত্রাহি রাজন্নিমং লোকং ন নশ্যেয়ুরিমাঃ প্রজাঃ
ত্বয়ি প্রকৃতিমাপন্নে শেষং স্যাত্কুরুনন্দন
93.34
শুক্লা বদান্যা হ্রীমন্ত আর্যাঃ পুণ্যাভিজাতয়ঃ
অন্যোন্যসচিবা রাজংস্তান্পাহি মহতো ভয়াৎ
93.35
শিবেনেমে ভূমিপালাঃ সমাগম্য পরস্পরম্
সহ ভুক্ত্বা চ পীত্বা চ প্রতিয়ান্তু যথাগৃহম্
93.36
সুবাসসঃ স্রগ্বিণশ্চ সত্কৃত্য ভরতর্ষভ
অমর্ষাংশ্চ নিরাকৃত্য বৈরাণি চ পরংতপ
93.37
হার্দং যত্পাণ্ডবেষ্বাসীত্প্রাপ্তেঽস্মিন্নায়ুষঃ ক্ষয়ে
তদেব তে ভবত্বদ্য শশ্বচ্চ ভরতর্ষভ
93.38
বালা বিহীনাঃ পিত্রা তে ত্বয়ৈব পরিবর্ধিতাঃ
তান্পালয় যথান্যায়ং পুত্রাংশ্চ ভরতর্ষভ
93.39
ভবতৈব হি রক্ষ্যাস্তে ব্যসনেষু বিশেষতঃ
মা তে ধর্মস্তথৈবার্থো নশ্যেত ভরতর্ষভ
93.40
আহুস্ত্বাং পাণ্ডবা রাজন্নভিবাদ্য প্রসাদ্য চ
ভবতঃ শাসনাদ্দুঃখমনুভূতং সহানুগৈঃ
93.41
দ্বাদশেমানি বর্ষাণি বনে নির্ব্যুষিতানি নঃ
ত্রয়োদশং তথাজ্ঞাতৈঃ সজনে পরিবত্সরম্
93.42
স্থাতা নঃ সময়ে তস্মিন্পিতেতি কৃতনিশ্চয়াঃ
নাহাস্ম সময়ং তাত তচ্চ নো ব্রাহ্মণা বিদুঃ
93.43
তস্মিন্নঃ সময়ে তিষ্ঠ স্থিতানাং ভরতর্ষভ
নিত্যং সংক্লেশিতা রাজন্স্বরাজ্যাংশং লভেমহি
93.44
ত্বং ধর্মমর্থং যুঞ্জানঃ সম্যঙ্নস্ত্রাতুমর্হসি
গুরুত্বং ভবতি প্রেক্ষ্য বহূন্ক্লেশাংস্তিতিক্ষ্মহে
93.45
স ভবান্মাতৃপিতৃবদস্মাসু প্রতিপদ্যতাম্
গুরোর্গরীয়সী বৃত্তির্যা চ শিষ্যস্য ভারত
93.46
পিত্রা স্থাপয়িতব্যা হি বয়মুত্পথমাস্থিতাঃ
সংস্থাপয় পথিষ্বস্মাংস্তিষ্ঠ রাজন্স্ববর্ত্মনি
93.47
আহুশ্চেমাং পরিষদং পুত্রাস্তে ভরতর্ষভ
ধর্মজ্ঞেষু সভাসত্সু নেহ যুক্তমসাংপ্রতম্
93.48
যত্র ধর্মো হ্যধর্মেণ সত্যং যত্রানৃতেন চ
হন্যতে প্রেক্ষমাণানাং হতাস্তত্র সভাসদঃ
93.49
বিদ্ধো ধর্মো হ্যধর্মেণ সভাং যত্র প্রপদ্যতে
ন চাস্য শল্যং কৃন্তন্তি বিদ্ধাস্তত্র সভাসদঃ
ধর্ম এতানারুজতি যথা নদ্যনুকূলজান্
93.50
যে ধর্মমনুপশ্যন্তস্তূষ্ণীং ধ্যায়ন্ত আসতে
তে সত্যমাহুর্ধর্মং চ ন্যায্যং চ ভরতর্ষভ
93.51
শক্যং কিমন্যদ্বক্তুং তে দানাদন্যজ্জনেশ্বর
ব্রুবন্তু বা মহীপালাঃ সভায়াং যে সমাসতে
ধর্মার্থৌ সংপ্রধার্যৈব যদি সত্যং ব্রবীম্যহম্
93.52
প্রমুঞ্চেমান্মৃত্যুপাশাত্ক্ষত্রিয়ান্ক্ষত্রিয়র্ষভ
প্রশাম্য ভরতশ্রেষ্ঠ মা মন্যুবশমন্বগাঃ
93.53
পিত্র্যং তেভ্যঃ প্রদায়াংশং পাণ্ডবেভ্যো যথোচিতম্
ততঃ সপুত্রঃ সিদ্ধার্থো ভুঙ্ক্ষ্ব ভোগান্পরংতপ
93.54
অজাতশত্রুং জানীষে স্থিতং ধর্মে সতাং সদা
সপুত্রে ত্বয়ি বৃত্তিং চ বর্ততে যাং নরাধিপ
93.55
দাহিতশ্চ নিরস্তশ্চ ত্বামেবোপাশ্রিতঃ পুনঃ
ইন্দ্রপ্রস্থং ত্বয়ৈবাসৌ সপুত্রেণ বিবাসিতঃ
93.56
স তত্র নিবসন্সর্বান্বশমানীয় পার্থিবান্
ত্বন্মুখানকরোদ্রাজন্ন চ ত্বামত্যবর্তত
93.57
তস্যৈবং বর্তমানস্য সৌবলেন জিহীর্ষতা
রাষ্ট্রাণি ধনধান্যং চ প্রয়ুক্তঃ পরমোপধিঃ
93.58
স তামবস্থাং সংপ্রাপ্য কৃষ্ণাং প্রেক্ষ্য সভাগতাম্
ক্ষত্রধর্মাদমেয়াত্মা নাকম্পত যুধিষ্ঠিরঃ
93.59
অহং তু তব তেষাং চ শ্রেয় ইচ্ছামি ভারত
ধর্মাদর্থাত্সুখাচ্চৈব মা রাজন্নীনশঃ প্রজাঃ
93.60
অনর্থমর্থং মন্বানা অর্থং বানর্থমাত্মনঃ
লোভেঽতিপ্রসৃতান্পুত্রান্নিগৃহ্ণীষ্ব বিশাং পতে
93.61
স্থিতাঃ শুশ্রূষিতুং পার্থাঃ স্থিতা যোদ্ধুমরিংদমাঃ
যত্তে পথ্যতমং রাজংস্তস্মিংস্তিষ্ঠ পরংতপ
93.62
তদ্বাক্যং পার্থিবাঃ সর্বে হৃদয়ৈঃ সমপূজয়ন্
ন তত্র কশ্চিদ্বক্তুং হি বাচং প্রাক্রামদগ্রতঃ