Utshovঅধ্যায় 94
94.1
বৈশংপায়ন উবাচ
তস্মিন্নভিহিতে বাক্যে কেশবেন মহাত্মনা
স্তিমিতা হৃষ্টরোমাণ আসন্সর্বে সভাসদঃ
94.2
কঃ স্বিদুত্তরমেতস্মাদ্বক্তুমুত্সহতে পুমান্
ইতি সর্বে মনোভিস্তে চিন্তয়ন্তি স্ম পার্থিবাঃ
94.3
তথা তেষু চ সর্বেষু তূষ্ণীংভূতেষু রাজসু
জামদগ্ন্য ইদং বাক্যমব্রবীত্কুরুসংসদি
94.4
ইমামেকোপমাং রাজঞ্শৃণু সত্যামশঙ্কিতঃ
তাং শ্রুত্বা শ্রেয় আদত্স্ব যদি সাধ্বিতি মন্যসে
94.5
রাজা দম্ভোদ্ভবো নাম সার্বভৌমঃ পুরাভবৎ
অখিলাং বুভুজে সর্বাং পৃথিবীমিতি নঃ শ্রুতম্
94.6
স স্ম নিত্যং নিশাপায়ে প্রাতরুত্থায় বীর্যবান্
ব্রাহ্মণান্ক্ষত্রিয়াংশ্চৈব পৃচ্ছন্নাস্তে মহারথঃ
94.7
অস্তি কশ্চিদ্বিশিষ্টো বা মদ্বিধো বা ভবেদ্যুধি
শূদ্রো বৈশ্যঃ ক্ষত্রিয়ো বা ব্রাহ্মণো বাপি শস্ত্রভৃৎ
94.8
ইতি ব্রুবন্নন্বচরত্স রাজা পৃথিবীমিমাম্
দর্পেণ মহতা মত্তঃ কংচিদন্যমচিন্তয়ন্
94.9
তং স্ম বৈদ্যা অকৃপণা ব্রাহ্মণাঃ সর্বতোঽভয়াঃ
প্রত্যষেধন্ত রাজানং শ্লাঘমানং পুনঃ পুনঃ
94.10
প্রতিষিধ্যমানোঽপ্যসকৃত্পৃচ্ছত্যেব স বৈ দ্বিজান্
অভিমানী শ্রিয়া মত্তস্তমূচুর্ব্রাহ্মণাস্তদা
94.11
তপস্বিনো মহাত্মানো বেদব্রতসমন্বিতাঃ
উদীর্যমাণং রাজানং ক্রোধদীপ্তা দ্বিজাতয়ঃ
94.12
অনেকজননং সখ্যং যয়োঃ পুরুষসিংহয়োঃ
তয়োস্ত্বং ন সমো রাজন্ভবিতাসি কদাচন
94.13
এবমুক্তঃ স রাজা তু পুনঃ পপ্রচ্ছ তান্দ্বিজান্
ক্ব তৌ বীরৌ ক্বজন্মানৌ কিংকর্মাণৌ চ কৌ চ তৌ
94.14
ব্রাহ্মণা ঊচুঃ
নরো নারায়ণশ্চৈব তাপসাবিতি নঃ শ্রুতম্
আয়াতৌ মানুষে লোকে তাভ্যাং যুধ্যস্ব পার্থিব
94.15
শ্রূয়তে তৌ মহাত্মানৌ নরনারায়ণাবুভৌ
তপো ঘোরমনির্দেশ্যং তপ্যেতে গন্ধমাদনে
94.16
রাম উবাচ
স রাজা মহতীং সেনাং যোজয়িত্বা ষডঙ্গিনীম্
অমৃষ্যমাণঃ সংপ্রায়াদ্যত্র তাবপরাজিতৌ
94.17
স গত্বা বিষমং ঘোরং পর্বতং গন্ধমাদনম্
মৃগয়াণোঽন্বগচ্ছত্তৌ তাপসাবপরাজিতৌ
94.18
তৌ দৃষ্ট্বা ক্ষুত্পিপাসাভ্যাং কৃশৌ ধমনিসংততৌ
শীতবাতাতপৈশ্চৈব কর্শিতৌ পুরুষোত্তমৌ
অভিগম্যোপসংগৃহ্য পর্যপৃচ্ছদনাময়ম্
94.19
তমর্চিত্বা মূলফলৈরাসনেনোদকেন চ
ন্যমন্ত্রয়েতাং রাজানং কিং কার্যং ক্রিয়তামিতি
94.20
দম্ভোদ্ভব উবাচ
বাহুভ্যাং মে জিতা ভূমির্নিহতাঃ সর্বশত্রবঃ
ভবদ্ভ্যাং যুদ্ধমাকাঙ্ক্ষন্নুপয়াতোঽস্মি পর্বতম্
আতিথ্যং দীয়তামেতত্কাঙ্ক্ষিতং মে চিরং প্রতি
94.21
নরনারায়ণাবূচতুঃ
অপেতক্রোধলোভোঽয়মাশ্রমো রাজসত্তম
ন হ্যস্মিন্নাশ্রমে যুদ্ধং কুতঃ শস্ত্রং কুতোঽনৃজুঃ
অন্যত্র যুদ্ধমাকাঙ্ক্ষ্ব বহবঃ ক্ষত্রিয়াঃ ক্ষিতৌ
94.22
রাম উবাচ
উচ্যমানস্তথাপি স্ম ভূয় এবাভ্যভাষত
পুনঃ পুনঃ ক্ষম্যমাণঃ সান্ত্ব্যমানশ্চ ভারত
দম্ভোদ্ভবো যুদ্ধমিচ্ছন্নাহ্বয়ত্যেব তাপসৌ
94.23
ততো নরস্ত্বিষীকাণাং মুষ্টিমাদায় কৌরব
অব্রবীদেহি যুধ্যস্ব যুদ্ধকামুক ক্ষত্রিয়
94.24
সর্বশস্ত্রাণি চাদত্স্ব যোজয়স্ব চ বাহিনীম্
অহং হি তে বিনেষ্যামি যুদ্ধশ্রদ্ধামিতঃ পরম্
94.25
দম্ভোদ্ভব উবাচ
যদ্যেতদস্ত্রমস্মাসু যুক্তং তাপস মন্যসে
এতেনাপি ত্বয়া যোত্স্যে যুদ্ধার্থী হ্যহমাগতঃ
94.26
রাম উবাচ
ইত্যুক্ত্বা শরবর্ষেণ সর্বতঃ সমবাকিরৎ
দম্ভোদ্ভবস্তাপসং তং জিঘাংসুঃ সহসৈনিকঃ
94.27
তস্য তানস্যতো ঘোরানিষূন্পরতনুচ্ছিদঃ
কদর্থীকৃত্য স মুনিরিষীকাভিরপানুদৎ
94.28
ততোঽস্মৈ প্রাসৃজদ্ঘোরমৈষীকমপরাজিতঃ
অস্ত্রমপ্রতিসংধেয়ং তদদ্ভুতমিবাভবৎ
94.29
তেষামক্ষীণি কর্ণাংশ্চ নস্তকাংশ্চৈব মায়য়া
নিমিত্তবেধী স মুনিরিষীকাভিঃ সমর্পয়ৎ
94.30
স দৃষ্ট্বা শ্বেতমাকাশমিষীকাভিঃ সমাচিতম্
পাদয়োর্ন্যপতদ্রাজা স্বস্তি মেঽস্ত্বিতি চাব্রবীৎ
94.31
তমব্রবীন্নরো রাজঞ্শরণ্যঃ শরণৈষিণাম্
ব্রহ্মণ্যো ভব ধর্মাত্মা মা চ স্মৈবং পুনঃ কৃথাঃ
94.32
মা চ দর্পসমাবিষ্টঃ ক্ষেপ্সীঃ কাংশ্চিত্কদাচন
অল্পীয়াংসং বিশিষ্টং বা তত্তে রাজন্পরং হিতম্
94.33
কৃতপ্রজ্ঞো বীতলোভো নিরহংকার আত্মবান্
দান্তঃ ক্ষান্তো মৃদুঃ ক্ষেমঃ প্রজাঃ পালয় পার্থিব
94.34
অনুজ্ঞাতঃ স্বস্তি গচ্ছ মৈবং ভূয়ঃ সমাচরেঃ
কুশলং ব্রাহ্মণান্পৃচ্ছেরাবয়োর্বচনাদ্ভৃশম্
94.35
ততো রাজা তয়োঃ পাদাবভিবাদ্য মহাত্মনোঃ
প্রত্যাজগাম স্বপুরং ধর্মং চৈবাচিনোদ্ভৃশম্
94.36
সুমহচ্চাপি তত্কর্ম যন্নরেণ কৃতং পুরা
ততো গুণৈঃ সুবহুভিঃ শ্রেষ্ঠো নারায়ণোঽভবৎ
94.37
তস্মাদ্যাবদ্ধনুঃশ্রেষ্ঠে গাণ্ডীবেঽস্ত্রং ন যুজ্যতে
তাবত্ত্বং মানমুত্সৃজ্য গচ্ছ রাজন্ধনংজয়ম্
94.38
কাকুদীকং শুকং নাকমক্ষিসংতর্জনং তথা
সংতানং নর্তনং ঘোরমাস্যমোদকমষ্টমম্
94.39
এতৈর্বিদ্ধাঃ সর্ব এব মরণং যান্তি মানবাঃ
উন্মত্তাশ্চ বিচেষ্টন্তে নষ্টসংজ্ঞা বিচেতসঃ
94.40
স্বপন্তে চ প্লবন্তে চ ছর্দয়ন্তি চ মানবাঃ
মূত্রয়ন্তে চ সততং রুদন্তি চ হসন্তি চ
94.41
অসংখ্যেয়া গুণাঃ পার্থে তদ্বিশিষ্টো জনার্দনঃ
ত্বমেব ভূয়ো জানাসি কুন্তীপুত্রং ধনংজয়ম্
94.42
নরনারায়ণৌ যৌ তৌ তাবেবার্জুনকেশবৌ
বিজানীহি মহারাজ প্রবীরৌ পুরুষর্ষভৌ
94.43
যদ্যেতদেবং জানাসি ন চ মামতিশঙ্কসে
আর্যাং মতিং সমাস্থায় শাম্য ভারত পাণ্ডবৈঃ
94.44
অথ চেন্মন্যসে শ্রেয়ো ন মে ভেদো ভবেদিতি
প্রশাম্য ভরতশ্রেষ্ঠ মা চ যুদ্ধে মনঃ কৃথাঃ
94.45
ভবতাং চ কুরুশ্রেষ্ঠ কুলং বহুমতং ভুবি
তত্তথৈবাস্তু ভদ্রং তে স্বার্থমেবানুচিন্তয়