অধ্যায় 95

95.1

বৈশংপায়ন উবাচ
জামদগ্ন্যবচঃ শ্রুত্বা কণ্বোঽপি ভগবানৃষিঃ
দুর্যোধনমিদং বাক্যমব্রবীত্কুরুসংসদি

অক্ষয়শ্চাব্যয়শ্চৈব ব্রহ্মা লোকপিতামহঃ
তথৈব ভগবন্তৌ তৌ নরনারায়ণাবৃষী

আদিত্যানাং হি সর্বেষাং বিষ্ণুরেকঃ সনাতনঃ
অজয্যশ্চাব্যয়শ্চৈব শাশ্বতঃ প্রভুরীশ্বরঃ

নিমিত্তমরণাস্ত্বন্যে চন্দ্রসূর্যৌ মহী জলম্
বায়ুরগ্নিস্তথাকাশং গ্রহাস্তারাগণাস্তথা

তে চ ক্ষয়ান্তে জগতো হিত্বা লোকত্রয়ং সদা
ক্ষয়ং গচ্ছন্তি বৈ সর্বে সৃজ্যন্তে চ পুনঃ পুনঃ

মুহূর্তমরণাস্ত্বন্যে মানুষা মৃগপক্ষিণঃ
তির্যগ্যোন্যশ্চ যে চান্যে জীবলোকচরাঃ স্মৃতাঃ

ভূয়িষ্ঠেন তু রাজানঃ শ্রিয়ং ভুক্ত্বায়ুষঃ ক্ষয়ে
মরণং প্রতিগচ্ছন্তি ভোক্তুং সুকৃতদুষ্কৃতম্

স ভবান্ধর্মপুত্রেণ শমং কর্তুমিহার্হতি
পাণ্ডবাঃ কুরবশ্চৈব পালয়ন্তু বসুংধরাম্

বলবানহমিত্যেব ন মন্তব্যং সুয়োধন
বলবন্তো হি বলিভির্দৃশ্যন্তে পুরুষর্ষভ

ন বলং বলিনাং মধ্যে বলং ভবতি কৌরব
বলবন্তো হি তে সর্বে পাণ্ডবা দেববিক্রমাঃ

অত্রাপ্যুদাহরন্তীমমিতিহাসং পুরাতনম্
মাতলের্দাতুকামস্য কন্যাং মৃগয়তো বরম্

মতস্ত্রৈলোক্যরাজস্য মাতলির্নাম সারথিঃ
তস্যৈকৈব কুলে কন্যা রূপতো লোকবিশ্রুতা

গুণকেশীতি বিখ্যাতা নাম্না সা দেবরূপিণী
শ্রিয়া চ বপুষা চৈব স্ত্রিয়োঽন্যাঃ সাতিরিচ্যতে

তস্যাঃ প্রদানসময়ং মাতলিঃ সহ ভার্যয়া
জ্ঞাত্বা বিমমৃশে রাজংস্তত্পরঃ পরিচিন্তয়ন্

ধিক্খল্বলঘুশীলানামুচ্ছ্রিতানাং যশস্বিনাম্
নরাণামৃদ্ধসত্ত্বানাং কুলে কন্যাপ্ররোহণম্

মাতুঃ কুলং পিতৃকুলং যত্র চৈব প্রদীয়তে
কুলত্রয়ং সংশয়িতং কুরুতে কন্যকা সতাম্

দেবমানুষলোকৌ দ্বৌ মানসেনৈব চক্ষুষা
অবগাহ্যৈব বিচিতৌ ন চ মে রোচতে বরঃ

ন দেবান্নৈব দিতিজান্ন গন্ধর্বান্ন মানুষান্
অরোচয়ং বরকৃতে তথৈব বহুলানৃষীন্

ভার্যয়া তু স সংমন্ত্র্য সহ রাত্রৌ সুধর্ময়া
মাতলির্নাগলোকায় চকার গমনে মতিম্

ন মে দেবমনুষ্যেষু গুণকেশ্যাঃ সমো বরঃ
রূপতো দৃশ্যতে কশ্চিন্নাগেষু ভবিতা ধ্রুবম্

ইত্যামন্ত্র্য সুধর্মাং স কৃত্বা চাভিপ্রদক্ষিণম্
কন্যাং শিরস্যুপাঘ্রায় প্রবিবেশ মহীতলম্