Utshovঅধ্যায় 96
96.1
কণ্ব উবাচ
মাতলিস্তু ব্রজন্মার্গে নারদেন মহর্ষিণা
বরুণং গচ্ছতা দ্রষ্টুং সমাগচ্ছদ্যদৃচ্ছয়া
96.2
নারদোঽথাব্রবীদেনং ক্ব ভবান্গন্তুমুদ্যতঃ
স্বেন বা সূত কার্যেণ শাসনাদ্বা শতক্রতোঃ
96.3
মাতলির্নারদেনৈবং সংপৃষ্টঃ পথি গচ্ছতা
যথাবত্সর্বমাচষ্ট স্বকার্যং বরুণং প্রতি
96.4
তমুবাচাথ স মুনির্গচ্ছাবঃ সহিতাবিতি
সলিলেশদিদৃক্ষার্থমহমপ্যুদ্যতো দিবঃ
96.5
অহং তে সর্বমাখ্যাস্যে দর্শয়ন্বসুধাতলম্
দৃষ্ট্বা তত্র বরং কংচিদ্রোচয়িষ্যাব মাতলে
96.6
অবগাহ্য ততো ভূমিমুভৌ মাতলিনারদৌ
দদৃশাতে মহাত্মানৌ লোকপালমপাং পতিম্
96.7
তত্র দেবর্ষিসদৃশীং পূজাং প্রাপ স নারদঃ
মহেন্দ্রসদৃশীং চৈব মাতলিঃ প্রত্যপদ্যত
96.8
তাবুভৌ প্রীতমনসৌ কার্যবত্তাং নিবেদ্য হ
বরুণেনাভ্যনুজ্ঞাতৌ নাগলোকং বিচেরতুঃ
96.9
নারদঃ সর্বভূতানামন্তর্ভূমিনিবাসিনাম্
জানংশ্চকার ব্যাখ্যানং যন্তুঃ সর্বমশেষতঃ
96.10
নারদ উবাচ
দৃষ্টস্তে বরুণস্তাত পুত্রপৌত্রসমাবৃতঃ
পশ্যোদকপতেঃ স্থানং সর্বতোভদ্রমৃদ্ধিমৎ
96.11
এষ পুত্রো মহাপ্রাজ্ঞো বরুণস্যেহ গোপতেঃ
এষ তং শীলবৃত্তেন শৌচেন চ বিশিষ্যতে
96.12
এষোঽস্য পুত্রোঽভিমতঃ পুষ্করঃ পুষ্করেক্ষণঃ
রূপবান্দর্শনীয়শ্চ সোমপুত্র্যা বৃতঃ পতিঃ
96.13
জ্যোত্স্নাকালীতি যামাহুর্দ্বিতীয়াং রূপতঃ শ্রিয়ম্
আদিত্যস্যৈব গোঃ পুত্রো জ্যেষ্ঠঃ পুত্রঃ কৃতঃ স্মৃতঃ
96.14
ভবনং পশ্য বারুণ্যা যদেতত্সর্বকাঞ্চনম্
যাং প্রাপ্য সুরতাং প্রাপ্তাঃ সুরাঃ সুরপতেঃ সখে
96.15
এতানি হৃতরাজ্যানাং দৈতেয়ানাং স্ম মাতলে
দীপ্যমানানি দৃশ্যন্তে সর্বপ্রহরণান্যুত
96.16
অক্ষয়াণি কিলৈতানি বিবর্তন্তে স্ম মাতলে
অনুভাবপ্রয়ুক্তানি সুরৈরবজিতানি হ
96.17
অত্র রাক্ষসজাত্যশ্চ ভূতজাত্যশ্চ মাতলে
দিব্যপ্রহরণাশ্চাসন্পূর্বদৈবতনির্মিতাঃ
96.18
অগ্নিরেষ মহার্চিষ্মাঞ্জাগর্তি বরুণহ্রদে
বৈষ্ণবং চক্রমাবিদ্ধং বিধূমেন হবিষ্মতা
96.19
এষ গাণ্ডীময়শ্চাপো লোকসংহারসংভৃতঃ
রক্ষ্যতে দৈবতৈর্নিত্যং যতস্তদ্গাণ্ডিবং ধনুঃ
96.20
এষ কৃত্যে সমুত্পন্নে তত্তদ্ধারয়তে বলম্
সহস্রশতসংখ্যেন প্রাণেন সততং ধ্রুবম্
96.21
অশাস্যানপি শাস্ত্যেষ রক্ষোবন্ধুষু রাজসু
সৃষ্টঃ প্রথমজো দণ্ডো ব্রহ্মণা ব্রহ্মবাদিনা
96.22
এতচ্ছত্রং নরেন্দ্রাণাং মহচ্ছক্রেণ ভাষিতম্
পুত্রাঃ সলিলরাজস্য ধারয়ন্তি মহোদয়ম্
96.23
এতত্সলিলরাজস্য ছত্রং ছত্রগৃহে স্থিতম্
সর্বতঃ সলিলং শীতং জীমূত ইব বর্ষতি
96.24
এতচ্ছত্রাত্পরিভ্রষ্টং সলিলং সোমনির্মলম্
তমসা মূর্ছিতং যাতি যেন নার্ছতি দর্শনম্
96.25
বহূন্যদ্ভুতরূপাণি দ্রষ্টব্যানীহ মাতলে
তব কার্যোপরোধস্তু তস্মাদ্গচ্ছাব মাচিরম্