অধ্যায় 97

97.1

নারদ উবাচ
এতত্তু নাগলোকস্য নাভিস্থানে স্থিতং পুরম্
পাতালমিতি বিখ্যাতং দৈত্যদানবসেবিতম্

ইদমদ্ভিঃ সমং প্রাপ্তা যে কেচিদ্ধ্রুবজঙ্গমাঃ
প্রবিশন্তো মহানাদং নদন্তি ভয়পীডিতাঃ

অত্রাসুরোঽগ্নিঃ সততং দীপ্যতে বারিভোজনঃ
ব্যাপারেণ ধৃতাত্মানং নিবদ্ধং সমবুধ্যত

অত্রামৃতং সুরৈঃ পীত্বা নিহিতং নিহতারিভিঃ
অতঃ সোমস্য হানিশ্চ বৃদ্ধিশ্চৈব প্রদৃশ্যতে

অত্র দিব্যং হয়শিরঃ কালে পর্বণি পর্বণি
উত্তিষ্ঠতি সুবর্ণাভং বার্ভিরাপূরয়ঞ্জগৎ

যস্মাদত্র সমগ্রাস্তাঃ পতন্তি জলমূর্তয়ঃ
তস্মাত্পাতালমিত্যেতত্খ্যায়তে পুরমুত্তমম্

ঐরাবতোঽস্মাত্সলিলং গৃহীত্বা জগতো হিতঃ
মেঘেষ্বামুঞ্চতে শীতং যন্মহেন্দ্রঃ প্রবর্ষতি

অত্র নানাবিধাকারাস্তিময়ো নৈকরূপিণঃ
অপ্সু সোমপ্রভাং পীত্বা বসন্তি জলচারিণঃ

অত্র সূর্যাংশুভির্ভিন্নাঃ পাতালতলমাশ্রিতাঃ
মৃতা দিবসতঃ সূত পুনর্জীবন্তি তে নিশি

উদয়ে নিত্যশশ্চাত্র চন্দ্রমা রশ্মিভির্বৃতঃ
অমৃতং স্পৃশ্য সংস্পর্শাত্সংজীবয়তি দেহিনঃ

অত্র তেঽধর্মনিরতা বদ্ধাঃ কালেন পীডিতাঃ
দৈতেয়া নিবসন্তি স্ম বাসবেন হৃতশ্রিয়ঃ

অত্র ভূতপতির্নাম সর্বভূতমহেশ্বরঃ
ভূতয়ে সর্বভূতানামচরত্তপ উত্তমম্

অত্র গোব্রতিনো বিপ্রাঃ স্বাধ্যায়াম্নায়কর্শিতাঃ
ত্যক্তপ্রাণা জিতস্বর্গা নিবসন্তি মহর্ষয়ঃ

যত্রতত্রশয়ো নিত্যং যেনকেনচিদাশিতঃ
যেনকেনচিদাচ্ছন্নঃ স গোব্রত ইহোচ্যতে

ঐরাবতো নাগরাজো বামনঃ কুমুদোঽঞ্জনঃ
প্রসূতাঃ সুপ্রতীকস্য বংশে বারণসত্তমাঃ

পশ্য যদ্যত্র তে কশ্চিদ্রোচতে গুণতো বরঃ
বরয়িষ্যাব তং গত্বা যত্নমাস্থায় মাতলে

অণ্ডমেতজ্জলে ন্যস্তং দীপ্যমানমিব শ্রিয়া
আ প্রজানাং নিসর্গাদ্বৈ নোদ্ভিদ্যতি ন সর্পতি

নাস্য জাতিং নিসর্গং বা কথ্যমানং শৃণোমি বৈ
পিতরং মাতরং বাপি নাস্য জানাতি কশ্চন

অতঃ কিল মহানগ্নিরন্তকালে সমুত্থিতঃ
ধক্ষ্যতে মাতলে সর্বং ত্রৈলোক্যং সচরাচরম্

কণ্ব উবাচ
মাতলিস্ত্বব্রবীচ্ছ্রুত্বা নারদস্যাথ ভাষিতম্
ন মেঽত্র রোচতে কশ্চিদন্যতো ব্রজ মাচিরম্