UtshovChapter 97
97.1
नारद उवाच
एतत्तु नागलोकस्य नाभिस्थाने स्थितं पुरम्
पातालमिति विख्यातं दैत्यदानवसेवितम्
Narada uvacha
Etattu nagalokasya nabhisthane sthitam puram
Patalamiti vikhyatam daityadanavasevitam
97.2
इदमद्भिः समं प्राप्ता ये केचिद्ध्रुवजङ्गमाः
प्रविशन्तो महानादं नदन्ति भयपीडिताः
Idamadbhih samam prapta ye kechiddhruvajangamah
Pravishanto mahanadam nadanti bhayapiditah
97.3
अत्रासुरोऽग्निः सततं दीप्यते वारिभोजनः
व्यापारेण धृतात्मानं निबद्धं समबुध्यत
Atrasurognih satatam dipyate varibhojanah
Vyaparena dhritatmanam nibaddham samabudhyata
97.4
अत्रामृतं सुरैः पीत्वा निहितं निहतारिभिः
अतः सोमस्य हानिश्च वृद्धिश्चैव प्रदृश्यते
Atramritam suraih pitva nihitam nihataribhih
Atah somasya hanishcha vriddhishchaiva pradrishyate
97.5
अत्र दिव्यं हयशिरः काले पर्वणि पर्वणि
उत्तिष्ठति सुवर्णाभं वार्भिरापूरयञ्जगत्
Atra divyam hayashirah kale parvani parvani
Uttishthati suvarnabham varbhirapurayanjagat
97.6
यस्मादत्र समग्रास्ताः पतन्ति जलमूर्तयः
तस्मात्पातालमित्येतत्ख्यायते पुरमुत्तमम्
Yasmadatra samagrastah patanti jalamurtayah
Tasmatpatalamityetatkhyayate puramuttamam
97.7
ऐरावतोऽस्मात्सलिलं गृहीत्वा जगतो हितः
मेघेष्वामुञ्चते शीतं यन्महेन्द्रः प्रवर्षति
Airavatosmatsalilam grihitva jagato hitah
Megheshvamunchate shitam yanmahendrah pravarshati
97.8
अत्र नानाविधाकारास्तिमयो नैकरूपिणः
अप्सु सोमप्रभां पीत्वा वसन्ति जलचारिणः
Atra nanavidhakarastimayo naikarupinah
Apsu somaprabham pitva vasanti jalacharinah
97.9
अत्र सूर्यांशुभिर्भिन्नाः पातालतलमाश्रिताः
मृता दिवसतः सूत पुनर्जीवन्ति ते निशि
Atra suryanshubhirbhinnah patalatalamashritah
Mrita divasatah suta punarjivanti te nishi
97.10
उदये नित्यशश्चात्र चन्द्रमा रश्मिभिर्वृतः
अमृतं स्पृश्य संस्पर्शात्संजीवयति देहिनः
Udaye nityashashchatra chandrama rashmibhirvritah
Amritam sprishya sansparshatsanjivayati dehinah
97.11
अत्र तेऽधर्मनिरता बद्धाः कालेन पीडिताः
दैतेया निवसन्ति स्म वासवेन हृतश्रियः
Atra tedharmanirata baddhah kalena piditah
Daiteya nivasanti sma vasavena hritashriyah
97.12
अत्र भूतपतिर्नाम सर्वभूतमहेश्वरः
भूतये सर्वभूतानामचरत्तप उत्तमम्
Atra bhutapatirnama sarvabhutamaheshvarah
Bhutaye sarvabhutanamacharattapa uttamam
97.13
अत्र गोव्रतिनो विप्राः स्वाध्यायाम्नायकर्शिताः
त्यक्तप्राणा जितस्वर्गा निवसन्ति महर्षयः
Atra govratino viprah svadhyayamnayakarshitah
Tyaktaprana jitasvarga nivasanti maharshayah
97.14
यत्रतत्रशयो नित्यं येनकेनचिदाशितः
येनकेनचिदाच्छन्नः स गोव्रत इहोच्यते
Yatratatrashayo nityam yenakenachidashitah
Yenakenachidachchhannah sa govrata ihochyate
97.15
ऐरावतो नागराजो वामनः कुमुदोऽञ्जनः
प्रसूताः सुप्रतीकस्य वंशे वारणसत्तमाः
Airavato nagarajo vamanah kumudonjanah
Prasutah supratikasya vanshe varanasattamah
97.16
पश्य यद्यत्र ते कश्चिद्रोचते गुणतो वरः
वरयिष्याव तं गत्वा यत्नमास्थाय मातले
Pashya yadyatra te kashchidrochate gunato varah
Varayishyava tam gatva yatnamasthaya matale
97.17
अण्डमेतज्जले न्यस्तं दीप्यमानमिव श्रिया
आ प्रजानां निसर्गाद्वै नोद्भिद्यति न सर्पति
Andametajjale nyastam dipyamanamiva shriya
A prajanam nisargadvai nodbhidyati na sarpati
97.18
नास्य जातिं निसर्गं वा कथ्यमानं शृणोमि वै
पितरं मातरं वापि नास्य जानाति कश्चन
Nasya jatim nisargam va kathyamanam shrinomi vai
Pitaram mataram vapi nasya janati kashchana
97.19
अतः किल महानग्निरन्तकाले समुत्थितः
धक्ष्यते मातले सर्वं त्रैलोक्यं सचराचरम्
Atah kila mahanagnirantakale samutthitah
Dhakshyate matale sarvam trailokyam sacharacharam
97.20
कण्व उवाच
मातलिस्त्वब्रवीच्छ्रुत्वा नारदस्याथ भाषितम्
न मेऽत्र रोचते कश्चिदन्यतो व्रज माचिरम्
Kanva uvacha
Matalistvabravichchhrutva naradasyatha bhashitam
Na metra rochate kashchidanyato vraja machiram