UtshovChapter 98
98.1
नारद उवाच
हिरण्यपुरमित्येतत्ख्यातं पुरवरं महत्
दैत्यानां दानवानां च मायाशतविचारिणाम्
Narada uvacha
Hiranyapuramityetatkhyatam puravaram mahat
Daityanam danavanam cha mayashatavicharinam
98.2
अनल्पेन प्रयत्नेन निर्मितं विश्वकर्मणा
मयेन मनसा सृष्टं पातालतलमाश्रितम्
Analpena prayatnena nirmitam vishvakarmana
Mayena manasa srishtam patalatalamashritam
98.3
अत्र मायासहस्राणि विकुर्वाणा महौजसः
दानवा निवसन्ति स्म शूरा दत्तवराः पुरा
Atra mayasahasrani vikurvana mahaujasah
Danava nivasanti sma shura dattavarah pura
98.4
नैते शक्रेण नान्येन वरुणेन यमेन वा
शक्यन्ते वशमानेतुं तथैव धनदेन च
Naite shakrena nanyena varunena yamena va
Shakyante vashamanetum tathaiva dhanadena cha
98.5
असुराः कालखञ्जाश्च तथा विष्णुपदोद्भवाः
नैरृता यातुधानाश्च ब्रह्मवेदोद्भवाश्च ये
Asurah kalakhanjashcha tatha vishnupadodbhavah
Nairrita yatudhanashcha brahmavedodbhavashcha ye
98.6
दंष्ट्रिणो भीमरूपाश्च निवसन्त्यात्मरक्षिणः
मायावीर्योपसंपन्ना निवसन्त्यात्मरक्षिणः
Danshtrino bhimarupashcha nivasantyatmarakshinah
Mayaviryopasampanna nivasantyatmarakshinah
98.7
निवातकवचा नाम दानवा युद्धदुर्मदाः
जानासि च यथा शक्रो नैताञ्शक्नोति बाधितुम्
Nivatakavacha nama danava yuddhadurmadah
Janasi cha yatha shakro naitanshaknoti badhitum
98.8
बहुशो मातले त्वं च तव पुत्रश्च गोमुखः
निर्भग्नो देवराजश्च सहपुत्रः शचीपतिः
Bahusho matale tvam cha tava putrashcha gomukhah
Nirbhagno devarajashcha sahaputrah shachipatih
98.9
पश्य वेश्मानि रौक्माणि मातले राजतानि च
कर्मणा विधियुक्तेन युक्तान्युपगतानि च
Pashya veshmani raukmani matale rajatani cha
Karmana vidhiyuktena yuktanyupagatani cha
98.10
वैडूर्यहरितानीव प्रवालरुचिराणि च
अर्कस्फटिकशुभ्राणि वज्रसारोज्ज्वलानि च
Vaiduryaharitaniva pravalaruchirani cha
Arkasphatikashubhrani vajrasarojjvalani cha
98.11
पार्थिवानीव चाभान्ति पुनर्नगमयानि च
शैलानीव च दृश्यन्ते तारकाणीव चाप्युत
Parthivaniva chabhanti punarnagamayani cha
Shailaniva cha drishyante tarakaniva chapyuta
98.12
सूर्यरूपाणि चाभान्ति दीप्ताग्निसदृशानि च
मणिजालविचित्राणि प्रांशूनि निबिडानि च
Suryarupani chabhanti diptagnisadrishani cha
Manijalavichitrani pranshuni nibidani cha
98.13
नैतानि शक्यं निर्देष्टुं रूपतो द्रव्यतस्तथा
गुणतश्चैव सिद्धानि प्रमाणगुणवन्ति च
Naitani shakyam nirdeshtum rupato dravyatastatha
Gunatashchaiva siddhani pramanagunavanti cha
98.14
आक्रीडान्पश्य दैत्यानां तथैव शयनान्युत
रत्नवन्ति महार्हाणि भाजनान्यासनानि च
Akridanpashya daityanam tathaiva shayananyuta
Ratnavanti maharhani bhajananyasanani cha
98.15
जलदाभांस्तथा शैलांस्तोयप्रस्रवणान्वितान्
कामपुष्पफलांश्चैव पादपान्कामचारिणः
Jaladabhanstatha shailanstoyaprasravananvitan
Kamapushpaphalanshchaiva padapankamacharinah
98.16
मातले कश्चिदत्रापि रुचितस्ते वरो भवेत्
अथ वान्यां दिशं भूमेर्गच्छाव यदि मन्यसे
Matale kashchidatrapi ruchitaste varo bhavet
Atha vanyam disham bhumergachchhava yadi manyase
98.17
कण्व उवाच
मातलिस्त्वब्रवीदेनं भाषमाणं तथाविधम्
देवर्षे नैव मे कार्यं विप्रियं त्रिदिवौकसाम्
Kanva uvacha
Matalistvabravidenam bhashamanam tathavidham
Devarshe naiva me karyam vipriyam tridivaukasam
98.18
नित्यानुषक्तवैरा हि भ्रातरो देवदानवाः
अरिपक्षेण संबन्धं रोचयिष्याम्यहं कथम्
Nityanushaktavaira hi bhrataro devadanavah
Aripakshena sambandham rochayishyamyaham katham
98.19
अन्यत्र साधु गच्छावो द्रष्टुं नार्हामि दानवान्
जानामि तु तथात्मानं दित्सात्मकमलं यथा
Anyatra sadhu gachchhavo drashtum narhami danavan
Janami tu tathatmanam ditsatmakamalam yatha