UtshovChapter 99
99.1
नारद उवाच
अयं लोकः सुपर्णानां पक्षिणां पन्नगाशिनाम्
विक्रमे गमने भारे नैषामस्ति परिश्रमः
Narada uvacha
Ayam lokah suparnanam pakshinam pannagashinam
Vikrame gamane bhare naishamasti parishramah
99.2
वैनतेयसुतैः सूत षड्भिस्ततमिदं कुलम्
सुमुखेन सुनाम्ना च सुनेत्रेण सुवर्चसा
Vainateyasutaih suta shadbhistatamidam kulam
Sumukhena sunamna cha sunetrena suvarchasa
99.3
सुरूपपक्षिराजेन सुबलेन च मातले
वर्धितानि प्रसूत्या वै विनताकुलकर्तृभिः
Surupapakshirajena subalena cha matale
Vardhitani prasutya vai vinatakulakartribhih
99.4
पक्षिराजाभिजात्यानां सहस्राणि शतानि च
कश्यपस्य ततो वंशे जातैर्भूतिविवर्धनैः
Pakshirajabhijatyanam sahasrani shatani cha
Kashyapasya tato vanshe jatairbhutivivardhanaih
99.5
सर्वे ह्येते श्रिया युक्ताः सर्वे श्रीवत्सलक्षणाः
सर्वे श्रियमभीप्सन्तो धारयन्ति बलान्युत
Sarve hyete shriya yuktah sarve shrivatsalakshanah
Sarve shriyamabhipsanto dharayanti balanyuta
99.6
कर्मणा क्षत्रियाश्चैते निर्घृणा भोगिभोजिनः
ज्ञातिसंक्षयकर्तृत्वाद्ब्राह्मण्यं न लभन्ति वै
Karmana kshatriyashchaite nirghrina bhogibhojinah
Gyatisankshayakartritvadbrahmanyam na labhanti vai
99.7
नामानि चैषां वक्ष्यामि यथा प्राधान्यतः शृणु
मातले श्लाघ्यमेतद्धि कुलं विष्णुपरिग्रहम्
Namani chaisham vakshyami yatha pradhanyatah shrinu
Matale shlaghyametaddhi kulam vishnuparigraham
99.8
दैवतं विष्णुरेतेषां विष्णुरेव परायणम्
हृदि चैषां सदा विष्णुर्विष्णुरेव गतिः सदा
Daivatam vishnuretesham vishnureva parayanam
Hridi chaisham sada vishnurvishnureva gatih sada
99.9
सुवर्णचूडो नागाशी दारुणश्चण्डतुण्डकः
अनलश्चानिलश्चैव विशालाक्षोऽथ कुण्डली
Suvarnachudo nagashi darunashchandatundakah
Analashchanilashchaiva vishalakshotha kundali
99.10
काश्यपिर्ध्वजविष्कम्भो वैनतेयोऽथ वामनः
वातवेगो दिशाचक्षुर्निमेषो निमिषस्तथा
Kashyapirdhvajavishkambho vainateyotha vamanah
Vatavego dishachakshurnimesho nimishastatha
99.11
त्रिवारः सप्तवारश्च वाल्मीकिर्द्वीपकस्तथा
दैत्यद्वीपः सरिद्द्वीपः सारसः पद्मकेसरः
Trivarah saptavarashcha valmikirdvipakastatha
Daityadvipah sariddvipah sarasah padmakesarah
99.12
सुमुखः सुखकेतुश्च चित्रबर्हस्तथानघः
मेघकृत्कुमुदो दक्षः सर्पान्तः सोमभोजनः
Sumukhah sukhaketushcha chitrabarhastathanaghah
Meghakritkumudo dakshah sarpantah somabhojanah
99.13
गुरुभारः कपोतश्च सूर्यनेत्रश्चिरान्तकः
विष्णुधन्वा कुमारश्च परिबर्हो हरिस्तथा
Gurubharah kapotashcha suryanetrashchirantakah
Vishnudhanva kumarashcha paribarho haristatha
99.14
सुस्वरो मधुपर्कश्च हेमवर्णस्तथैव च
मलयो मातरिश्वा च निशाकरदिवाकरौ
Susvaro madhuparkashcha hemavarnastathaiva cha
Malayo matarishva cha nishakaradivakarau
99.15
एते प्रदेशमात्रेण मयोक्ता गरुडात्मजाः
प्राधान्यतोऽथ यशसा कीर्तिताः प्राणतश्च ते
Ete pradeshamatrena mayokta garudatmajah
Pradhanyatotha yashasa kirtitah pranatashcha te
99.16
यद्यत्र न रुचिः काचिदेहि गच्छाव मातले
तं नयिष्यामि देशं त्वां रुचिं यत्रोपलप्स्यसे
Yadyatra na ruchih kachidehi gachchhava matale
Tam nayishyami desham tvam ruchim yatropalapsyase