অধ্যায় 99

99.1

নারদ উবাচ
অয়ং লোকঃ সুপর্ণানাং পক্ষিণাং পন্নগাশিনাম্
বিক্রমে গমনে ভারে নৈষামস্তি পরিশ্রমঃ

বৈনতেয়সুতৈঃ সূত ষড্ভিস্ততমিদং কুলম্
সুমুখেন সুনাম্না চ সুনেত্রেণ সুবর্চসা

সুরূপপক্ষিরাজেন সুবলেন চ মাতলে
বর্ধিতানি প্রসূত্যা বৈ বিনতাকুলকর্তৃভিঃ

পক্ষিরাজাভিজাত্যানাং সহস্রাণি শতানি চ
কশ্যপস্য ততো বংশে জাতৈর্ভূতিবিবর্ধনৈঃ

সর্বে হ্যেতে শ্রিয়া যুক্তাঃ সর্বে শ্রীবত্সলক্ষণাঃ
সর্বে শ্রিয়মভীপ্সন্তো ধারয়ন্তি বলান্যুত

কর্মণা ক্ষত্রিয়াশ্চৈতে নির্ঘৃণা ভোগিভোজিনঃ
জ্ঞাতিসংক্ষয়কর্তৃত্বাদ্ব্রাহ্মণ্যং ন লভন্তি বৈ

নামানি চৈষাং বক্ষ্যামি যথা প্রাধান্যতঃ শৃণু
মাতলে শ্লাঘ্যমেতদ্ধি কুলং বিষ্ণুপরিগ্রহম্

দৈবতং বিষ্ণুরেতেষাং বিষ্ণুরেব পরায়ণম্
হৃদি চৈষাং সদা বিষ্ণুর্বিষ্ণুরেব গতিঃ সদা

সুবর্ণচূডো নাগাশী দারুণশ্চণ্ডতুণ্ডকঃ
অনলশ্চানিলশ্চৈব বিশালাক্ষোঽথ কুণ্ডলী

কাশ্যপির্ধ্বজবিষ্কম্ভো বৈনতেয়োঽথ বামনঃ
বাতবেগো দিশাচক্ষুর্নিমেষো নিমিষস্তথা

ত্রিবারঃ সপ্তবারশ্চ বাল্মীকির্দ্বীপকস্তথা
দৈত্যদ্বীপঃ সরিদ্দ্বীপঃ সারসঃ পদ্মকেসরঃ

সুমুখঃ সুখকেতুশ্চ চিত্রবর্হস্তথানঘঃ
মেঘকৃত্কুমুদো দক্ষঃ সর্পান্তঃ সোমভোজনঃ

গুরুভারঃ কপোতশ্চ সূর্যনেত্রশ্চিরান্তকঃ
বিষ্ণুধন্বা কুমারশ্চ পরিবর্হো হরিস্তথা

সুস্বরো মধুপর্কশ্চ হেমবর্ণস্তথৈব চ
মলয়ো মাতরিশ্বা চ নিশাকরদিবাকরৌ

এতে প্রদেশমাত্রেণ ময়োক্তা গরুডাত্মজাঃ
প্রাধান্যতোঽথ যশসা কীর্তিতাঃ প্রাণতশ্চ তে

যদ্যত্র ন রুচিঃ কাচিদেহি গচ্ছাব মাতলে
তং নয়িষ্যামি দেশং ত্বাং রুচিং যত্রোপলপ্স্যসে