Utshovঅধ্যায় 100
100.1
নারদ উবাচ
ইদং রসাতলং নাম সপ্তমং পৃথিবীতলম্
যত্রাস্তে সুরভির্মাতা গবামমৃতসংভবা
100.2
ক্ষরন্তী সততং ক্ষীরং পৃথিবীসারসংভবম্
ষণ্ণাং রসানাং সারেণ রসমেকমনুত্তমম্
100.3
অমৃতেনাভিতৃপ্তস্য সারমুদ্গিরতঃ পুরা
পিতামহস্য বদনাদুদতিষ্ঠদনিন্দিতা
100.4
যস্যাঃ ক্ষীরস্য ধারায়া নিপতন্ত্যা মহীতলে
হ্রদঃ কৃতঃ ক্ষীরনিধিঃ পবিত্রং পরমুত্তমম্
100.5
পুষ্পিতস্যেব ফেনস্য পর্যন্তমনুবেষ্টিতম্
পিবন্তো নিবসন্ত্যত্র ফেনপা মুনিসত্তমাঃ
100.6
ফেনপা নাম নাম্না তে ফেনাহারাশ্চ মাতলে
উগ্রে তপসি বর্তন্তে যেষাং বিভ্যতি দেবতাঃ
100.7
অস্যাশ্চতস্রো ধেন্বোঽন্যা দিক্ষু সর্বাসু মাতলে
নিবসন্তি দিশাপাল্যো ধারয়ন্ত্যো দিশঃ স্মৃতাঃ
100.8
পূর্বাং দিশং ধারয়তে সুরূপা নাম সৌরভী
দক্ষিণাং হংসকা নাম ধারয়ত্যপরাং দিশম্
100.9
পশ্চিমা বারুণী দিক্চ ধার্যতে বৈ সুভদ্রয়া
মহানুভাবয়া নিত্যং মাতলে বিশ্বরূপয়া
100.10
সর্বকামদুঘা নাম ধেনুর্ধারয়তে দিশম্
উত্তরাং মাতলে ধর্ম্যাং তথৈলবিলসংজ্ঞিতাম্
100.11
আসাং তু পয়সা মিশ্রং পয়ো নির্মথ্য সাগরে
মন্থানং মন্দরং কৃত্বা দেবৈরসুরসংহিতৈঃ
100.12
উদ্ধৃতা বারুণী লক্ষ্মীরমৃতং চাপি মাতলে
উচ্চৈঃশ্রবাশ্চাশ্বরাজো মণিরত্নং চ কৌস্তুভম্
100.13
সুধাহারেষু চ সুধাং স্বধাভোজিষু চ স্বধাম্
অমৃতং চামৃতাশেষু সুরভিঃ ক্ষরতে পয়ঃ
100.14
অত্র গাথা পুরা গীতা রসাতলনিবাসিভিঃ
পৌরাণী শ্রূয়তে লোকে গীয়তে যা মনীষিভিঃ
100.15
ন নাগলোকে ন স্বর্গে ন বিমানে ত্রিবিষ্টপে
পরিবাসঃ সুখস্তাদৃগ্রসাতলতলে যথা