Utshovঅধ্যায় 101
101.1
নারদ উবাচ
ইয়ং ভোগবতী নাম পুরী বাসুকিপালিতা
যাদৃশী দেবরাজস্য পুরীবর্যামরাবতী
101.2
এষ শেষঃ স্থিতো নাগো যেনেয়ং ধার্যতে সদা
তপসা লোকমুখ্যেন প্রভাবমহতা মহী
101.3
শ্বেতোচ্চয়নিভাকারো নানাবিধবিভূষণঃ
সহস্রং ধারয়ন্মূর্ধ্নাং জ্বালাজিহ্বো মহাবলঃ
101.4
ইহ নানাবিধাকারা নানাবিধবিভূষণাঃ
সুরসায়াঃ সুতা নাগা নিবসন্তি গতব্যথাঃ
101.5
মণিস্বস্তিকচক্রাঙ্কাঃ কমণ্ডলুকলক্ষণাঃ
সহস্রসংখ্যা বলিনঃ সর্বে রৌদ্রাঃ স্বভাবতঃ
101.6
সহস্রশিরসঃ কেচিত্কেচিত্পঞ্চশতাননাঃ
শতশীর্ষাস্তথা কেচিত্কেচিত্ত্রিশিরসোঽপি চ
101.7
দ্বিপঞ্চশিরসঃ কেচিত্কেচিত্সপ্তমুখাস্তথা
মহাভোগা মহাকায়াঃ পর্বতাভোগভোগিনঃ
101.8
বহূনীহ সহস্রাণি প্রয়ুতান্যর্বুদানি চ
নাগানামেকবংশানাং যথাশ্রেষ্ঠাংস্তু মে শৃণু
101.9
বাসুকিস্তক্ষকশ্চৈব কর্কোটকধনংজয়ৌ
কালীয়ো নহুষশ্চৈব কম্বলাশ্বতরাবুভৌ
101.10
বাহ্যকুণ্ডো মণির্নাগস্তথৈবাপূরণঃ খগঃ
বামনশ্চৈলপত্রশ্চ কুকুরঃ কুকুণস্তথা
101.11
আর্যকো নন্দকশ্চৈব তথা কলশপোতকৌ
কৈলাসকঃ পিঞ্জরকো নাগশ্চৈরাবতস্তথা
101.12
সুমনোমুখো দধিমুখঃ শঙ্খো নন্দোপনন্দকৌ
আপ্তঃ কোটনকশ্চৈব শিখী নিষ্ঠূরিকস্তথা
101.13
তিত্তিরির্হস্তিভদ্রশ্চ কুমুদো মাল্যপিণ্ডকঃ
দ্বৌ পদ্মৌ পুণ্ডরীকশ্চ পুষ্পো মুদ্গরপর্ণকঃ
101.14
করবীরঃ পীঠরকঃ সংবৃত্তো বৃত্ত এব চ
পিণ্ডারো বিল্বপত্রশ্চ মূষিকাদঃ শিরীষকঃ
101.15
দিলীপঃ শঙ্খশীর্ষশ্চ জ্যোতিষ্কোঽথাপরাজিতঃ
কৌরব্যো ধৃতরাষ্ট্রশ্চ কুমারঃ কুশকস্তথা
101.16
বিরজা ধারণশ্চৈব সুবাহুর্মুখরো জয়ঃ
বধিরান্ধৌ বিকুণ্ডশ্চ বিরসঃ সুরসস্তথা
101.17
এতে চান্যে চ বহবঃ কশ্যপস্যাত্মজাঃ স্মৃতাঃ
মাতলে পশ্য যদ্যত্র কশ্চিত্তে রোচতে বরঃ
101.18
কণ্ব উবাচ
মাতলিস্ত্বেকমব্যগ্রঃ সততং সংনিরীক্ষ্য বৈ
পপ্রচ্ছ নারদং তত্র প্রীতিমানিব চাভবৎ
101.19
স্থিতো য এষ পুরতঃ কৌরব্যস্যার্যকস্য চ
দ্যুতিমান্দর্শনীয়শ্চ কস্যৈষ কুলনন্দনঃ
101.20
কঃ পিতা জননী চাস্য কতমস্যৈষ ভোগিনঃ
বংশস্য কস্যৈষ মহান্কেতুভূত ইব স্থিতঃ
101.21
প্রণিধানেন ধৈর্যেণ রূপেণ বয়সা চ মে
মনঃ প্রবিষ্টো দেবর্ষে গুণকেশ্যাঃ পতির্বরঃ
101.22
মাতলিং প্রীতিমনসং দৃষ্ট্বা সুমুখদর্শনাৎ
নিবেদয়ামাস তদা মাহাত্ম্যং জন্ম কর্ম চ
101.23
ঐরাবতকুলে জাতঃ সুমুখো নাম নাগরাট্
আর্যকস্য মতঃ পৌত্রো দৌহিত্রো বামনস্য চ
101.24
এতস্য হি পিতা নাগশ্চিকুরো নাম মাতলে
নচিরাদ্বৈনতেয়েন পঞ্চত্বমুপপাদিতঃ
101.25
ততোঽব্রবীত্প্রীতমনা মাতলির্নারদং বচঃ
এষ মে রুচিতস্তাত জামাতা ভুজগোত্তমঃ
101.26
ক্রিয়তামত্র যত্নো হি প্রীতিমানস্ম্যনেন বৈ
অস্য নাগপতের্দাতুং প্রিয়াং দুহিতরং মুনে