Utshovঅধ্যায় 102
102.1
নারদ উবাচ
সূতোঽয়ং মাতলির্নাম শক্রস্য দয়িতঃ সুহৃৎ
শুচিঃ শীলগুণোপেতস্তেজস্বী বীর্যবান্বলী
102.2
শক্রস্যায়ং সখা চৈব মন্ত্রী সারথিরেব চ
অল্পান্তরপ্রভাবশ্চ বাসবেন রণে রণে
102.3
অয়ং হরিসহস্রেণ যুক্তং জৈত্রং রথোত্তমম্
দেবাসুরেষু যুদ্ধেষু মনসৈব নিয়চ্ছতি
102.4
অনেন বিজিতানশ্বৈর্দোর্ভ্যাং জয়তি বাসবঃ
অনেন প্রহৃতে পূর্বং বলভিত্প্রহরত্যুত
102.5
অস্য কন্যা বরারোহা রূপেণাসদৃশী ভুবি
সত্ত্বশীলগুণোপেতা গুণকেশীতি বিশ্রুতা
102.6
তস্যাস্য যত্নাচ্চরতস্ত্রৈলোক্যমমরদ্যুতে
সুমুখো ভবতঃ পৌত্রো রোচতে দুহিতুঃ পতিঃ
102.7
যদি তে রোচতে সৌম্য ভুজগোত্তম মাচিরম্
ক্রিয়তামার্যক ক্ষিপ্রং বুদ্ধিঃ কন্যাপ্রতিগ্রহে
102.8
যথা বিষ্ণুকুলে লক্ষ্মীর্যথা স্বাহা বিভাবসোঃ
কুলে তব তথৈবাস্তু গুণকেশী সুমধ্যমা
102.9
পৌত্রস্যার্থে ভবাংস্তস্মাদ্গুণকেশীং প্রতীচ্ছতু
সদৃশীং প্রতিরূপস্য বাসবস্য শচীমিব
102.10
পিতৃহীনমপি হ্যেনং গুণতো বরয়ামহে
বহুমানাচ্চ ভবতস্তথৈবৈরাবতস্য চ
সুমুখস্য গুণৈশ্চৈব শীলশৌচদমাদিভিঃ
102.11
অভিগম্য স্বয়ং কন্যাময়ং দাতুং সমুদ্যতঃ
মাতলেস্তস্য সংমানং কর্তুমর্হো ভবানপি
102.12
কণ্ব উবাচ
স তু দীনঃ প্রহৃষ্টশ্চ প্রাহ নারদমার্যকঃ
ব্রিয়মাণে তথা পৌত্রে পুত্রে চ নিধনং গতে
102.13
ন মে নৈতদ্বহুমতং দেবর্ষে বচনং তব
সখা শক্রস্য সংয়ুক্তঃ কস্যায়ং নেপ্সিতো ভবেৎ
102.14
কারণস্য তু দৌর্বল্যাচ্চিন্তয়ামি মহামুনে
অস্য দেহকরস্তাত মম পুত্রো মহাদ্যুতে
ভক্ষিতো বৈনতেয়েন দুঃখার্তাস্তেন বৈ বয়ম্
102.15
পুনরেব চ তেনোক্তং বৈনতেয়েন গচ্ছতা
মাসেনান্যেন সুমুখং ভক্ষয়িষ্য ইতি প্রভো
102.16
ধ্রুবং তথা তদ্ভবিতা জানীমস্তস্য নিশ্চয়ম্
তেন হর্ষঃ প্রনষ্টো মে সুপর্ণবচনেন বৈ
102.17
মাতলিস্ত্বব্রবীদেনং বুদ্ধিরত্র কৃতা ময়া
জামাতৃভাবেন বৃতঃ সুমুখস্তব পুত্রজঃ
102.18
সোঽয়ং ময়া চ সহিতো নারদেন চ পন্নগঃ
ত্রিলোকেশং সুরপতিং গত্বা পশ্যতু বাসবম্
102.19
শেষেণৈবাস্য কার্যেণ প্রজ্ঞাস্যাম্যহমায়ুষঃ
সুপর্ণস্য বিঘাতে চ প্রয়তিষ্যামি সত্তম
102.20
সুমুখশ্চ ময়া সার্ধং দেবেশমভিগচ্ছতু
কার্যসংসাধনার্থায় স্বস্তি তেঽস্তু ভুজংগম
102.21
ততস্তে সুমুখং গৃহ্য সর্ব এব মহৌজসঃ
দদৃশুঃ শক্রমাসীনং দেবরাজং মহাদ্যুতিম্
102.22
সংগত্যা তত্র ভগবান্বিষ্ণুরাসীচ্চতুর্ভুজঃ
ততস্তত্সর্বমাচখ্যৌ নারদো মাতলিং প্রতি
102.23
ততঃ পুরংদরং বিষ্ণুরুবাচ ভুবনেশ্বরম্
অমৃতং দীয়তামস্মৈ ক্রিয়তামমরৈঃ সমঃ
102.24
মাতলির্নারদশ্চৈব সুমুখশ্চৈব বাসব
লভন্তাং ভবতঃ কামাত্কামমেতং যথেপ্সিতম্
102.25
পুরংদরোঽথ সংচিন্ত্য বৈনতেয়পরাক্রমম্
বিষ্ণুমেবাব্রবীদেনং ভবানেব দদাত্বিতি
102.26
বিষ্ণুরুবাচ
ঈশস্ত্বমসি লোকানাং চরাণামচরাশ্চ যে
ত্বয়া দত্তমদত্তং কঃ কর্তুমুত্সহতে বিভো
102.27
কণ্ব উবাচ
প্রাদাচ্ছক্রস্ততস্তস্মৈ পন্নগায়ায়ুরুত্তমম্
ন ত্বেনমমৃতপ্রাশং চকার বলবৃত্রহা
102.28
লব্ধ্বা বরং তু সুমুখঃ সুমুখঃ সংবভূব হ
কৃতদারো যথাকামং জগাম চ গৃহান্প্রতি
102.29
নারদস্ত্বার্যকশ্চৈব কৃতকার্যৌ মুদা যুতৌ
প্রতিজগ্মতুরভ্যর্চ্য দেবরাজং মহাদ্যুতিম্