Utshovঅধ্যায় 103
103.1
কণ্ব উবাচ
গরুডস্তত্তু শুশ্রাব যথাবৃত্তং মহাবলঃ
আয়ুঃপ্রদানং শক্রেণ কৃতং নাগস্য ভারত
103.2
পক্ষবাতেন মহতা রুদ্ধ্বা ত্রিভুবনং খগঃ
সুপর্ণঃ পরমক্রুদ্ধো বাসবং সমুপাদ্রবৎ
103.3
গরুড উবাচ
ভগবন্কিমবজ্ঞানাত্ক্ষুধাং প্রতি ভয়ে মম
কামকারবরং দত্ত্বা পুনশ্চলিতবানসি
103.4
নিসর্গাত্সর্বভূতানাং সর্বভূতেশ্বরেণ মে
আহারো বিহিতো ধাত্রা কিমর্থং বার্যতে ত্বয়া
103.5
বৃতশ্চৈষ মহানাগঃ স্থাপিতঃ সময়শ্চ মে
অনেন চ ময়া দেব ভর্তব্যঃ প্রসবো মহান্
103.6
এতস্মিংস্ত্বন্যথাভূতে নান্যং হিংসিতুমুত্সহে
ক্রীডসে কামকারেণ দেবরাজ যথেচ্ছকম্
103.7
সোঽহং প্রাণান্বিমোক্ষ্যামি তথা পরিজনো মম
যে চ ভৃত্যা মম গৃহে প্রীতিমান্ভব বাসব
103.8
এতচ্চৈবাহমর্হামি ভূয়শ্চ বলবৃত্রহন্
ত্রৈলোক্যস্যেশ্বরো যোঽহং পরভৃত্যত্বমাগতঃ
103.9
ত্বয়ি তিষ্ঠতি দেবেশ ন বিষ্ণুঃ কারণং মম
ত্রৈলোক্যরাজ রাজ্যং হি ত্বয়ি বাসব শাশ্বতম্
103.10
মমাপি দক্ষস্য সুতা জননী কশ্যপঃ পিতা
অহমপ্যুত্সহে লোকান্সমস্তান্বোঢুমঞ্জসা
103.11
অসহ্যং সর্বভূতানাং মমাপি বিপুলং বলম্
ময়াপি সুমহত্কর্ম কৃতং দৈতেয়বিগ্রহে
103.12
শ্রুতশ্রীঃ শ্রুতসেনশ্চ বিবস্বান্রোচনামুখঃ
প্রসভঃ কালকাক্ষশ্চ ময়াপি দিতিজা হতাঃ
103.13
যত্তু ধ্বজস্থানগতো যত্নাত্পরিচরাম্যহম্
বহামি চৈবানুজং তে তেন মামবমন্যসে
103.14
কোঽন্যো ভারসহো হ্যস্তি কোঽন্যোঽস্তি বলবত্তরঃ
ময়া যোঽহং বিশিষ্টঃ সন্বহামীমং সবান্ধবম্
103.15
অবজ্ঞায় তু যত্তেঽহং ভোজনাদ্ব্যপরোপিতঃ
তেন মে গৌরবং নষ্টং ত্বত্তশ্চাস্মাচ্চ বাসব
103.16
অদিত্যাং য ইমে জাতা বলবিক্রমশালিনঃ
ত্বমেষাং কিল সর্বেষাং বিশেষাদ্বলবত্তরঃ
103.17
সোঽহং পক্ষৈকদেশেন বহামি ত্বাং গতক্লমঃ
বিমৃশ ত্বং শনৈস্তাত কো ন্বত্র বলবানিতি
103.18
কণ্ব উবাচ
তস্য তদ্বচনং শ্রুত্বা খগস্যোদর্কদারুণম্
অক্ষোভ্যং ক্ষোভয়ংস্তার্ক্ষ্যমুবাচ রথচক্রভৃৎ
103.19
গরুত্মন্মন্যসেঽঽত্মানং বলবন্তং সুদুর্বলম্
অলমস্মত্সমক্ষং তে স্তোতুমাত্মানমণ্ডজ
103.20
ত্রৈলোক্যমপি মে কৃত্স্নমশক্তং দেহধারণে
অহমেবাত্মনাত্মানং বহামি ত্বাং চ ধারয়ে
103.21
ইমং তাবন্মমৈকং ত্বং বাহুং সব্যেতরং বহ
যদ্যেনং ধারয়স্যেকং সফলং তে বিকত্থিতম্
103.22
ততঃ স ভগবাংস্তস্য স্কন্ধে বাহুং সমাসজৎ
নিপপাত স ভারার্তো বিহ্বলো নষ্টচেতনঃ
103.23
যাবান্হি ভারঃ কৃত্স্নায়াঃ পৃথিব্যাঃ পর্বতৈঃ সহ
একস্যা দেহশাখায়াস্তাবদ্ভারমমন্যত
103.24
ন ত্বেনং পীডয়ামাস বলেন বলবত্তরঃ
ততো হি জীবিতং তস্য ন ব্যনীনশদচ্যুতঃ
103.25
বিপক্ষঃ স্রস্তকায়শ্চ বিচেতা বিহ্বলঃ খগঃ
মুমোচ পত্রাণি তদা গুরুভারপ্রপীডিতঃ
103.26
স বিষ্ণুং শিরসা পক্ষী প্রণম্য বিনতাসুতঃ
বিচেতা বিহ্বলো দীনঃ কিংচিদ্বচনমব্রবীৎ
103.27
ভগবঁল্লোকসারস্য সদৃশেন বপুষ্মতা
ভুজেন স্বৈরমুক্তেন নিষ্পিষ্টোঽস্মি মহীতলে
103.28
ক্ষন্তুমর্হসি মে দেব বিহ্বলস্যাল্পচেতসঃ
বলদাহবিদগ্ধস্য পক্ষিণো ধ্বজবাসিনঃ
103.29
ন বিজ্ঞাতং বলং দেব ময়া তে পরমং বিভো
তেন মন্যাম্যহং বীর্যমাত্মনোঽসদৃশং পরৈঃ
103.30
ততশ্চক্রে স ভগবান্প্রসাদং বৈ গরুত্মতঃ
মৈবং ভূয় ইতি স্নেহাত্তদা চৈনমুবাচ হ
103.31
তথা ত্বমপি গান্ধারে যাবত্পাণ্ডুসুতান্রণে
নাসাদয়সি তান্বীরাংস্তাবজ্জীবসি পুত্রক
103.32
ভীমঃ প্রহরতাং শ্রেষ্ঠো বায়ুপুত্রো মহাবলঃ
ধনংজয়শ্চেন্দ্রসুতো ন হন্যাতাং তু কং রণে
103.33
বিষ্ণুর্বায়ুশ্চ শক্রশ্চ ধর্মস্তৌ চাশ্বিনাবুভৌ
এতে দেবাস্ত্বয়া কেন হেতুনা শক্যমীক্ষিতুম্
103.34
তদলং তে বিরোধেন শমং গচ্ছ নৃপাত্মজ
বাসুদেবেন তীর্থেন কুলং রক্ষিতুমর্হসি
103.35
প্রত্যক্ষো হ্যস্য সর্বস্য নারদোঽয়ং মহাতপাঃ
মাহাত্ম্যং যত্তদা বিষ্ণোর্যোঽয়ং চক্রগদাধরঃ
103.36
বৈশংপায়ন উবাচ
দুর্যোধনস্তু তচ্ছ্রুত্বা নিঃশ্বসন্ভৃকুটীমুখঃ
রাধেয়মভিসংপ্রেক্ষ্য জহাস স্বনবত্তদা
103.37
কদর্থীকৃত্য তদ্বাক্যমৃষেঃ কণ্বস্য দুর্মতিঃ
ঊরুং গজকরাকারং তাডয়ন্নিদমব্রবীৎ
103.38
যথৈবেশ্বরসৃষ্টোঽস্মি যদ্ভাবি যা চ মে গতিঃ
তথা মহর্ষে বর্তামি কিং প্রলাপঃ করিষ্যতি