Utshovঅধ্যায় 104
104.1
জনমেজয় উবাচ
অনর্থে জাতনির্বন্ধং পরার্থে লোভমোহিতম্
অনার্যকেষ্বভিরতং মরণে কৃতনিশ্চয়ম্
104.2
জ্ঞাতীনাং দুঃখকর্তারং বন্ধূনাং শোকবর্ধনম্
সুহৃদাং ক্লেশদাতারং দ্বিষতাং হর্ষবর্ধনম্
104.3
কথং নৈনং বিমার্গস্থং বারয়ন্তীহ বান্ধবাঃ
সৌহৃদাদ্বা সুহৃত্স্নিগ্ধো ভগবান্বা পিতামহঃ
104.4
বৈশংপায়ন উবাচ
উক্তং ভগবতা বাক্যমুক্তং ভীষ্মেণ যত্ক্ষমম্
উক্তং বহুবিধং চৈব নারদেনাপি তচ্ছৃণু
104.5
নারদ উবাচ
দুর্লভো বৈ সুহৃচ্ছ্রোতা দুর্লভশ্চ হিতঃ সুহৃৎ
তিষ্ঠতে হি সুহৃদ্যত্র ন বন্ধুস্তত্র তিষ্ঠতি
104.6
শ্রোতব্যমপি পশ্যামি সুহৃদাং কুরুনন্দন
ন কর্তব্যশ্চ নির্বন্ধো নির্বন্ধো হি সুদারুণঃ
104.7
অত্রাপ্যুদাহরন্তীমমিতিহাসং পুরাতনম্
যথা নির্বন্ধতঃ প্রাপ্তো গালবেন পরাজয়ঃ
104.8
বিশ্বামিত্রং তপস্যন্তং ধর্মো জিজ্ঞাসয়া পুরা
অভ্যগচ্ছত্স্বয়ং ভূত্বা বসিষ্ঠো ভগবানৃষিঃ
104.9
সপ্তর্ষীণামন্যতমং বেষমাস্থায় ভারত
বুভুক্ষুঃ ক্ষুধিতো রাজন্নাশ্রমং কৌশিকস্য হ
104.10
বিশ্বামিত্রোঽথ সংভ্রান্তঃ শ্রপয়ামাস বৈ চরুম্
পরমান্নস্য যত্নেন ন চ স প্রত্যপালয়ৎ
104.11
অন্নং তেন যদা ভুক্তমন্যৈর্দত্তং তপস্বিভিঃ
অথ গৃহ্যান্নমত্যুষ্ণং বিশ্বামিত্রোঽভ্যুপাগমৎ
104.12
ভুক্তং মে তিষ্ঠ তাবত্ত্বমিত্যুক্ত্বা ভগবান্যয়ৌ
বিশ্বামিত্রস্ততো রাজন্স্থিত এব মহাদ্যুতিঃ
104.13
ভক্তং প্রগৃহ্য মূর্ধ্না তদ্বাহুভ্যাং পার্শ্বতোঽগমৎ
স্থিতঃ স্থাণুরিবাভ্যাশে নিশ্চেষ্টো মারুতাশনঃ
104.14
তস্য শুশ্রূষণে যত্নমকরোদ্গালবো মুনিঃ
গৌরবাদ্বহুমানাচ্চ হার্দেন প্রিয়কাম্যয়া
104.15
অথ বর্ষশতে পূর্ণে ধর্মঃ পুনরুপাগমৎ
বাসিষ্ঠং বেষমাস্থায় কৌশিকং ভোজনেপ্সয়া
104.16
স দৃষ্ট্বা শিরসা ভক্তং ধ্রিয়মাণং মহর্ষিণা
তিষ্ঠতা বায়ুভক্ষেণ বিশ্বামিত্রেণ ধীমতা
104.17
প্রতিগৃহ্য ততো ধর্মস্তথৈবোষ্ণং তথা নবম্
ভুক্ত্বা প্রীতোঽস্মি বিপ্রর্ষে তমুক্ত্বা স মুনির্গতঃ
104.18
ক্ষত্রভাবাদপগতো ব্রাহ্মণত্বমুপাগতঃ
ধর্মস্য বচনাত্প্রীতো বিশ্বামিত্রস্তদাভবৎ
104.19
বিশ্বামিত্রস্তু শিষ্যস্য গালবস্য তপস্বিনঃ
শুশ্রূষয়া চ ভক্ত্যা চ প্রীতিমানিত্যুবাচ তম্
অনুজ্ঞাতো ময়া বত্স যথেষ্টং গচ্ছ গালব
104.20
ইত্যুক্তঃ প্রত্যুবাচেদং গালবো মুনিসত্তমম্
প্রীতো মধুরয়া বাচা বিশ্বামিত্রং মহাদ্যুতিম্
104.21
দক্ষিণাং কাং প্রয়চ্ছামি ভবতে গুরুকর্মণি
দক্ষিণাভিরুপেতং হি কর্ম সিধ্যতি মানবম্
104.22
দক্ষিণানাং হি সৃষ্টানামপবর্গেণ ভুজ্যতে
স্বর্গে ক্রতুফলং সদ্ভির্দক্ষিণা শান্তিরুচ্যতে
কিমাহরামি গুর্বর্থং ব্রবীতু ভগবানিতি
104.23
জানমানস্তু ভগবাঞ্জিতঃ শুশ্রূষণেন চ
বিশ্বামিত্রস্তমসকৃদ্গচ্ছ গচ্ছেত্যচোদয়ৎ
104.24
অসকৃদ্গচ্ছ গচ্ছেতি বিশ্বামিত্রেণ ভাষিতঃ
কিং দদানীতি বহুশো গালবঃ প্রত্যভাষত
104.25
নির্বন্ধতস্তু বহুশো গালবস্য তপস্বিনঃ
কিংচিদাগতসংরম্ভো বিশ্বামিত্রোঽব্রবীদিদম্
104.26
একতঃশ্যামকর্ণানাং শতান্যষ্টৌ দদস্ব মে
হয়ানাং চন্দ্রশুভ্রাণাং গচ্ছ গালব মাচিরম্