Utshovঅধ্যায় 105
105.1
নারদ উবাচ
এবমুক্তস্তদা তেন বিশ্বামিত্রেণ ধীমতা
নাস্তে ন শেতে নাহারং কুরুতে গালবস্তদা
105.2
ত্বগস্থিভূতো হরিণশ্চিন্তাশোকপরায়ণঃ
শোচমানোঽতিমাত্রং স দহ্যমানশ্চ মন্যুনা
105.3
কুতঃ পুষ্টানি মিত্রাণি কুতোঽর্থাঃ সংচয়ঃ কুতঃ
হয়ানাং চন্দ্রশুভ্রাণাং শতান্যষ্টৌ কুতো মম
105.4
কুতো মে ভোজনশ্রদ্ধা সুখশ্রদ্ধা কুতশ্চ মে
শ্রদ্ধা মে জীবিতস্যাপি ছিন্না কিং জীবিতেন মে
105.5
অহং পারং সমুদ্রস্য পৃথিব্যা বা পরং পরাৎ
গত্বাত্মানং বিমুঞ্চামি কিং ফলং জীবিতেন মে
105.6
অধনস্যাকৃতার্থস্য ত্যক্তস্য বিবিধৈঃ ফলৈঃ
ঋণং ধারয়মাণস্য কুতঃ সুখমনীহয়া
105.7
সুহৃদাং হি ধনং ভুক্ত্বা কৃত্বা প্রণয়মীপ্সিতম্
প্রতিকর্তুমশক্তস্য জীবিতান্মরণং বরম্
105.8
প্রতিশ্রুত্য করিষ্যেতি কর্তব্যং তদকুর্বতঃ
মিথ্যাবচনদগ্ধস্য ইষ্টাপূর্তং প্রণশ্যতি
105.9
ন রূপমনৃতস্যাস্তি নানৃতস্যাস্তি সংততিঃ
নানৃতস্যাধিপত্যং চ কুত এব গতিঃ শুভা
105.10
কুতঃ কৃতঘ্নস্য যশঃ কুতঃ স্থানং কুতঃ সুখম্
অশ্রদ্ধেয়ঃ কৃতঘ্নো হি কৃতঘ্নে নাস্তি নিষ্কৃতিঃ
105.11
ন জীবত্যধনঃ পাপঃ কুতঃ পাপস্য তন্ত্রণম্
পাপো ধ্রুবমবাপ্নোতি বিনাশং নাশয়ন্কৃতম্
105.12
সোঽহং পাপঃ কৃতঘ্নশ্চ কৃপণশ্চানৃতোঽপি চ
গুরোর্যঃ কৃতকার্যঃ সংস্তত্করোমি ন ভাষিতম্
সোঽহং প্রাণান্বিমোক্ষ্যামি কৃত্বা যত্নমনুত্তমম্
105.13
অর্থনা ন ময়া কাচিত্কৃতপূর্বা দিবৌকসাম্
মানয়ন্তি চ মাং সর্বে ত্রিদশা যজ্ঞসংস্তরে
105.14
অহং তু বিবুধশ্রেষ্ঠং দেবং ত্রিভুবনেশ্বরম্
বিষ্ণুং গচ্ছাম্যহং কৃষ্ণং গতিং গতিমতাং বরম্
105.15
ভোগা যস্মাত্প্রতিষ্ঠন্তে ব্যাপ্য সর্বান্সুরাসুরান্
প্রয়তো দ্রষ্টুমিচ্ছামি মহায়োগিনমব্যয়ম্
105.16
এবমুক্তে সখা তস্য গরুডো বিনতাত্মজঃ
দর্শয়ামাস তং প্রাহ সংহৃষ্টঃ প্রিয়কাম্যয়া
105.17
সুহৃদ্ভবান্মম মতঃ সুহৃদাং চ মতঃ সুহৃৎ
ঈপ্সিতেনাভিলাষেণ যোক্তব্যো বিভবে সতি
105.18
বিভবশ্চাস্তি মে বিপ্র বাসবাবরজো দ্বিজ
পূর্বমুক্তস্ত্বদর্থং চ কৃতঃ কামশ্চ তেন মে
105.19
স ভবানেতু গচ্ছাব নয়িষ্যে ত্বাং যথাসুখম্
দেশং পারং পৃথিব্যা বা গচ্ছ গালব মাচিরম্