অধ্যায় 106

106.1

সুপর্ণ উবাচ
অনুশিষ্টোঽস্মি দেবেন গালবাজ্ঞাতয়োনিনা
ব্রূহি কামনুসংয়ামি দ্রষ্টুং প্রথমতো দিশম্

পূর্বাং বা দক্ষিণাং বাহমথ বা পশ্চিমাং দিশম্
উত্তরাং বা দ্বিজশ্রেষ্ঠ কুতো গচ্ছামি গালব

যস্যামুদয়তে পূর্বং সর্বলোকপ্রভাবনঃ
সবিতা যত্র সংধ্যায়াং সাধ্যানাং বর্ততে তপঃ

যস্যাং পূর্বং মতির্জাতা যয়া ব্যাপ্তমিদং জগৎ
চক্ষুষী যত্র ধর্মস্য যত্র চৈষ প্রতিষ্ঠিতঃ

হুতং যতোমুখৈর্হব্যং সর্পতে সর্বতোদিশম্
এতদ্দ্বারং দ্বিজশ্রেষ্ঠ দিবসস্য তথাধ্বনঃ

যত্র পূর্বং প্রসূতা বৈ দাক্ষায়ণ্যঃ প্রজাঃ স্ত্রিয়ঃ
যস্যাং দিশি প্রবৃদ্ধাশ্চ কশ্যপস্যাত্মসংভবাঃ

যতোমূলা সুরাণাং শ্রীর্যত্র শক্রোঽভ্যষিচ্যত
সুররাজ্যেন বিপ্রর্ষে দেবৈশ্চাত্র তপশ্চিতম্

এতস্মাত্কারণাদ্ব্রহ্মন্পূর্বেত্যেষা দিগুচ্যতে
যস্মাত্পূর্বতরে কালে পূর্বমেষাবৃতা সুরৈঃ

অত এব চ পূর্বেষাং পূর্বামাশামবেক্ষতাম্
পূর্বকার্যাণি কার্যাণি দৈবানি সুখমীপ্সতা

অত্র বেদাঞ্জগৌ পূর্বং ভগবাঁল্লোকভাবনঃ
অত্রৈবোক্তা সবিত্রাসীত্সাবিত্রী ব্রহ্মবাদিষু

অত্র দত্তানি সূর্যেণ যজূংষি দ্বিজসত্তম
অত্র লব্ধবরৈঃ সোমঃ সুরৈঃ ক্রতুষু পীয়তে

অত্র তৃপ্তা হুতবহাঃ স্বাং যোনিমুপভুঞ্জতে
অত্র পাতালমাশ্রিত্য বরুণঃ শ্রিয়মাপ চ

অত্র পূর্বং বসিষ্ঠস্য পৌরাণস্য দ্বিজর্ষভ
সূতিশ্চৈব প্রতিষ্ঠা চ নিধনং চ প্রকাশতে

ওংকারস্যাত্র জায়ন্তে সূতয়ো দশতীর্দশ
পিবন্তি মুনয়ো যত্র হবির্ধানে স্ম সোমপাঃ

প্রোক্ষিতা যত্র বহবো বরাহাদ্যা মৃগা বনে
শক্রেণ যত্র ভাগার্থে দৈবতেষু প্রকল্পিতাঃ

অত্রাহিতাঃ কৃতঘ্নাশ্চ মানুষাশ্চাসুরাশ্চ যে
উদয়ংস্তান্হি সর্বান্বৈ ক্রোধাদ্ধন্তি বিভাবসুঃ

এতদ্দ্বারং ত্রিলোকস্য স্বর্গস্য চ সুখস্য চ
এষ পূর্বো দিশাভাগো বিশাবৈনং যদীচ্ছসি

প্রিয়ং কার্যং হি মে তস্য যস্যাস্মি বচনে স্থিতঃ
ব্রূহি গালব যাস্যামি শৃণু চাপ্যপরাং দিশম্