অধ্যায় 107

107.1

সুপর্ণ উবাচ
ইয়ং বিবস্বতা পূর্বং শ্রৌতেন বিধিনা কিল
গুরবে দক্ষিণা দত্তা দক্ষিণেত্যুচ্যতেঽথ দিক্

অত্র লোকত্রয়স্যাস্য পিতৃপক্ষঃ প্রতিষ্ঠিতঃ
অত্রোষ্মপানাং দেবানাং নিবাসঃ শ্রূয়তে দ্বিজ

অত্র বিশ্বে সদা দেবাঃ পিতৃভিঃ সার্ধমাসতে
ইজ্যমানাঃ স্ম লোকেষু সংপ্রাপ্তাস্তুল্যভাগতাম্

এতদ্দ্বিতীয়ং ধর্মস্য দ্বারমাচক্ষতে দ্বিজ
ত্রুটিশো লবশশ্চাত্র গণ্যতে কালনিশ্চয়ঃ

অত্র দেবর্ষয়ো নিত্যং পিতৃলোকর্ষয়স্তথা
তথা রাজর্ষয়ঃ সর্বে নিবসন্তি গতব্যথাঃ

অত্র ধর্মশ্চ সত্যং চ কর্ম চাত্র নিশাম্যতে
গতিরেষা দ্বিজশ্রেষ্ঠ কর্মণাত্মাবসাদিনঃ

এষা দিক্সা দ্বিজশ্রেষ্ঠ যাং সর্বঃ প্রতিপদ্যতে
বৃতা ত্বনববোধেন সুখং তেন ন গম্যতে

নৈরৃতানাং সহস্রাণি বহূন্যত্র দ্বিজর্ষভ
সৃষ্টানি প্রতিকূলানি দ্রষ্টব্যান্যকৃতাত্মভিঃ

অত্র মন্দরকুঞ্জেষু বিপ্রর্ষিসদনেষু চ
গন্ধর্বা গান্তি গাথা বৈ চিত্তবুদ্ধিহরা দ্বিজ

অত্র সামানি গাথাভিঃ শ্রুত্বা গীতানি রৈবতঃ
গতদারো গতামাত্যো গতরাজ্যো বনং গতঃ

অত্র সাবর্ণিনা চৈব যবক্রীতাত্মজেন চ
মর্যাদা স্থাপিতা ব্রহ্মন্যাং সূর্যো নাতিবর্ততে

অত্র রাক্ষসরাজেন পৌলস্ত্যেন মহাত্মনা
রাবণেন তপশ্চীর্ত্বা সুরেভ্যোঽমরতা বৃতা

অত্র বৃত্তেন বৃত্রোঽপি শক্রশত্রুত্বমীয়িবান্
অত্র সর্বাসবঃ প্রাপ্তাঃ পুনর্গচ্ছন্তি পঞ্চধা

অত্র দুষ্কৃতকর্মাণো নরাঃ পচ্যন্তি গালব
অত্র বৈতরণী নাম নদী বিতরণৈর্বৃতা
অত্র গত্বা সুখস্যান্তং দুঃখস্যান্তং প্রপদ্যতে

অত্রাবৃত্তো দিনকরঃ ক্ষরতে সুরসং পয়ঃ
কাষ্ঠাং চাসাদ্য ধানিষ্ঠাং হিমমুত্সৃজতে পুনঃ

অত্রাহং গালব পুরা ক্ষুধার্তঃ পরিচিন্তয়ন্
লব্ধবান্যুধ্যমানৌ দ্বৌ বৃহন্তৌ গজকচ্ছপৌ

অত্র শক্রধনুর্নাম সূর্যাজ্জাতো মহানৃষিঃ
বিদুর্যং কপিলং দেবং যেনাত্তাঃ সগরাত্মজাঃ

অত্র সিদ্ধাঃ শিবা নাম ব্রাহ্মণা বেদপারগাঃ
অধীত্য সখিলান্বেদানালভন্তে যমক্ষয়ম্

অত্র ভোগবতী নাম পুরী বাসুকিপালিতা
তক্ষকেণ চ নাগেন তথৈবৈরাবতেন চ

অত্র নির্যাণকালেষু তমঃ সংপ্রাপ্যতে মহৎ
অভেদ্যং ভাস্করেণাপি স্বয়ং বা কৃষ্ণবর্ত্মনা

এষ তস্যাপি তে মার্গঃ পরিতাপস্য গালব
ব্রূহি মে যদি গন্তব্যং প্রতীচীং শৃণু বা মম