অধ্যায় 108

108.1

সুপর্ণ উবাচ
ইয়ং দিগ্দয়িতা রাজ্ঞো বরুণস্য তু গোপতেঃ
সদা সলিলরাজস্য প্রতিষ্ঠা চাদিরেব চ

অত্র পশ্চাদহঃ সূর্যো বিসর্জয়তি ভাঃ স্বয়ম্
পশ্চিমেত্যভিবিখ্যাতা দিগিয়ং দ্বিজসত্তম

যাদসামত্র রাজ্যেন সলিলস্য চ গুপ্তয়ে
কশ্যপো ভগবান্দেবো বরুণং স্মাভ্যষেচয়ৎ

অত্র পীত্বা সমস্তান্বৈ বরুণস্য রসাংস্তু ষট্
জায়তে তরুণঃ সোমঃ শুক্লস্যাদৌ তমিস্রহা

অত্র পশ্চাত্কৃতা দৈত্যা বায়ুনা সংয়তাস্তদা
নিঃশ্বসন্তো মহানাগৈরর্দিতাঃ সুষুপুর্দ্বিজ

অত্র সূর্যং প্রণয়িনং প্রতিগৃহ্ণাতি পর্বতঃ
অস্তো নাম যতঃ সংধ্যা পশ্চিমা প্রতিসর্পতি

অতো রাত্রিশ্চ নিদ্রা চ নির্গতা দিবসক্ষয়ে
জায়তে জীবলোকস্য হর্তুমর্ধমিবায়ুষঃ

অত্র দেবীং দিতিং সুপ্তামাত্মপ্রসবধারিণীম্
বিগর্ভামকরোচ্ছক্রো যত্র জাতো মরুদ্গণঃ

অত্র মূলং হিমবতো মন্দরং যাতি শাশ্বতম্
অপি বর্ষসহস্রেণ ন চাস্যান্তোঽধিগম্যতে

অত্র কাঞ্চনশৈলস্য কাঞ্চনাম্বুবহস্য চ
উদধেস্তীরমাসাদ্য সুরভিঃ ক্ষরতে পয়ঃ

অত্র মধ্যে সমুদ্রস্য কবন্ধঃ প্রতিদৃশ্যতে
স্বর্ভানোঃ সূর্যকল্পস্য সোমসূর্যৌ জিঘাংসতঃ

সুবর্ণশিরসোঽপ্যত্র হরিরোম্ণঃ প্রগায়তঃ
অদৃশ্যস্যাপ্রমেয়স্য শ্রূয়তে বিপুলো ধ্বনিঃ

অত্র ধ্বজবতী নাম কুমারী হরিমেধসঃ
আকাশে তিষ্ঠ তিষ্ঠেতি তস্থৌ সূর্যস্য শাসনাৎ

অত্র বায়ুস্তথা বহ্নিরাপঃ খং চৈব গালব
আহ্নিকং চৈব নৈশং চ দুঃখস্পর্শং বিমুঞ্চতি
অতঃ প্রভৃতি সূর্যস্য তির্যগাবর্ততে গতিঃ

অত্র জ্যোতীংষি সর্বাণি বিশন্ত্যাদিত্যমণ্ডলম্
অষ্টাবিংশতিরাত্রং চ চঙ্ক্রম্য সহ ভানুনা
নিষ্পতন্তি পুনঃ সূর্যাত্সোমসংয়োগয়োগতঃ

অত্র নিত্যং স্রবন্তীনাং প্রভবঃ সাগরোদয়ঃ
অত্র লোকত্রয়স্যাপস্তিষ্ঠন্তি বরুণাশ্রয়াঃ

অত্র পন্নগরাজস্যাপ্যনন্তস্য নিবেশনম্
অনাদিনিধনস্যাত্র বিষ্ণোঃ স্থানমনুত্তমম্

অত্রানলসখস্যাপি পবনস্য নিবেশনম্
মহর্ষেঃ কশ্যপস্যাত্র মারীচস্য নিবেশনম্

এষ তে পশ্চিমো মার্গো দিগ্দ্বারেণ প্রকীর্তিতঃ
ব্রূহি গালব গচ্ছাবো বুদ্ধিঃ কা দ্বিজসত্তম