Utshovঅধ্যায় 109
109.1
সুপর্ণ উবাচ
যস্মাদুত্তার্যতে পাপাদ্যস্মান্নিঃশ্রেয়সোঽশ্নুতে
তস্মাদুত্তারণফলাদুত্তরেত্যুচ্যতে বুধৈঃ
109.2
উত্তরস্য হিরণ্যস্য পরিবাপস্য গালব
মার্গঃ পশ্চিমপূর্বাভ্যাং দিগ্ভ্যাং বৈ মধ্যমঃ স্মৃতঃ
109.3
অস্যাং দিশি বরিষ্ঠায়ামুত্তরায়াং দ্বিজর্ষভ
নাসৌম্যো নাবিধেয়াত্মা নাধর্ম্যো বসতে জনঃ
109.4
অত্র নারায়ণঃ কৃষ্ণো জিষ্ণুশ্চৈব নরোত্তমঃ
বদর্যামাশ্রমপদে তথা ব্রহ্মা চ শাশ্বতঃ
109.5
অত্র বৈ হিমবত্পৃষ্ঠে নিত্যমাস্তে মহেশ্বরঃ
অত্র রাজ্যেন বিপ্রাণাং চন্দ্রমাশ্চাভ্যষিচ্যত
109.6
অত্র গঙ্গাং মহাদেবঃ পতন্তীং গগনাচ্চ্যুতাম্
প্রতিগৃহ্য দদৌ লোকে মানুষে ব্রহ্মবিত্তম
109.7
অত্র দেব্যা তপস্তপ্তং মহেশ্বরপরীপ্সয়া
অত্র কামশ্চ রোষশ্চ শৈলশ্চোমা চ সংবভুঃ
109.8
অত্র রাক্ষসয়ক্ষাণাং গন্ধর্বাণাং চ গালব
আধিপত্যেন কৈলাসে ধনদোঽপ্যভিষেচিতঃ
109.9
অত্র চৈত্ররথং রম্যমত্র বৈখানসাশ্রমঃ
অত্র মন্দাকিনী চৈব মন্দরশ্চ দ্বিজর্ষভ
109.10
অত্র সৌগন্ধিকবনং নৈরৃতৈরভিরক্ষ্যতে
শাড্বলং কদলীস্কন্ধমত্র সংতানকা নগাঃ
109.11
অত্র সংয়মনিত্যানাং সিদ্ধানাং স্বৈরচারিণাম্
বিমানান্যনুরূপাণি কামভোগ্যানি গালব
109.12
অত্র তে ঋষয়ঃ সপ্ত দেবী চারুন্ধতী তথা
অত্র তিষ্ঠতি বৈ স্বাতিরত্রাস্যা উদয়ঃ স্মৃতঃ
109.13
অত্র যজ্ঞং সমারুহ্য ধ্রুবং স্থাতা পিতামহঃ
জ্যোতীংষি চন্দ্রসূর্যৌ চ পরিবর্তন্তি নিত্যশঃ
109.14
অত্র গায়ন্তিকাদ্বারং রক্ষন্তি দ্বিজসত্তমাঃ
ধামা নাম মহাত্মানো মুনয়ঃ সত্যবাদিনঃ
109.15
ন তেষাং জ্ঞায়তে সূতির্নাকৃতির্ন তপশ্চিতম্
পরিবর্তসহস্রাণি কামভোগ্যানি গালব
109.16
যথা যথা প্রবিশতি তস্মাত্পরতরং নরঃ
তথা তথা দ্বিজশ্রেষ্ঠ প্রবিলীয়তি গালব
109.17
ন তত্কেনচিদন্যেন গতপূর্বং দ্বিজর্ষভ
ঋতে নারায়ণং দেবং নরং বা জিষ্ণুমব্যয়ম্
109.18
অত্র কৈলাসমিত্যুক্তং স্থানমৈলবিলস্য তৎ
অত্র বিদ্যুত্প্রভা নাম জজ্ঞিরেঽপ্সরসো দশ
109.19
অত্র বিষ্ণুপদং নাম ক্রমতা বিষ্ণুনা কৃতম্
ত্রিলোকবিক্রমে ব্রহ্মন্নুত্তরাং দিশমাশ্রিতম্
109.20
অত্র রাজ্ঞা মরুত্তেন যজ্ঞেনেষ্টং দ্বিজোত্তম
উশীরবীজে বিপ্রর্ষে যত্র জাম্বূনদং সরঃ
109.21
জীমূতস্যাত্র বিপ্রর্ষেরুপতস্থে মহাত্মনঃ
সাক্ষাদ্ধৈমবতঃ পুণ্যো বিমলঃ কমলাকরঃ
109.22
ব্রাহ্মণেষু চ যত্কৃত্স্নং স্বন্তং কৃত্বা ধনং মহৎ
বব্রে বনং মহর্ষিঃ স জৈমূতং তদ্বনং ততঃ
109.23
অত্র নিত্যং দিশাপালাঃ সায়ং প্রাতর্দ্বিজর্ষভ
কস্য কার্যং কিমিতি বৈ পরিক্রোশন্তি গালব
109.24
এবমেষা দ্বিজশ্রেষ্ঠ গুণৈরন্যৈর্দিগুত্তরা
উত্তরেতি পরিখ্যাতা সর্বকর্মসু চোত্তরা
109.25
এতা বিস্তরশস্তাত তব সংকীর্তিতা দিশঃ
চতস্রঃ ক্রময়োগেন কামাশাং গন্তুমিচ্ছসি
109.26
উদ্যতোঽহং দ্বিজশ্রেষ্ঠ তব দর্শয়িতুং দিশঃ
পৃথিবীং চাখিলাং ব্রহ্মংস্তস্মাদারোহ মাং দ্বিজ