অধ্যায় 110

110.1

গালব উবাচ
গরুত্মন্ভুজগেন্দ্রারে সুপর্ণ বিনতাত্মজ
নয় মাং তার্ক্ষ্য পূর্বেণ যত্র ধর্মস্য চক্ষুষী

পূর্বমেতাং দিশং গচ্ছ যা পূর্বং পরিকীর্তিতা
দৈবতানাং হি সাংনিধ্যমত্র কীর্তিতবানসি

অত্র সত্যং চ ধর্মশ্চ ত্বয়া সম্যক্প্রকীর্তিতঃ
ইচ্ছেয়ং তু সমাগন্তুং সমস্তৈর্দৈবতৈরহম্
ভূয়শ্চ তান্সুরান্দ্রষ্টুমিচ্ছেয়মরুণানুজ

নারদ উবাচ
তমাহ বিনতাসূনুরারোহস্বেতি বৈ দ্বিজম্
আরুরোহাথ স মুনির্গরুডং গালবস্তদা

গালব উবাচ
ক্রমমাণস্য তে রূপং দৃশ্যতে পন্নগাশন
ভাস্করস্যেব পূর্বাহ্ণে সহস্রাংশোর্বিবস্বতঃ

পক্ষবাতপ্রণুন্নানাং বৃক্ষাণামনুগামিনাম্
প্রস্থিতানামিব সমং পশ্যামীহ গতিং খগ

সসাগরবনামুর্বীং সশৈলবনকাননাম্
আকর্ষন্নিব চাভাসি পক্ষবাতেন খেচর

সমীননাগনক্রং চ খমিবারোপ্যতে জলম্
বায়ুনা চৈব মহতা পক্ষবাতেন চানিশম্

তুল্যরূপাননান্মত্স্যাংস্তিমিমত্স্যাংস্তিমিংগিলান্
নাগাংশ্চ নরবক্ত্রাংশ্চ পশ্যাম্যুন্মথিতানিব

মহার্ণবস্য চ রবৈঃ শ্রোত্রে মে বধিরীকৃতে
ন শৃণোমি ন পশ্যামি নাত্মনো বেদ্মি কারণম্

শনৈঃ সাধু ভবান্যাতু ব্রহ্মহত্যামনুস্মরন্
ন দৃশ্যতে রবিস্তাত ন দিশো ন চ খং খগ

তম এব তু পশ্যামি শরীরং তে ন লক্ষয়ে
মণীব জাত্যৌ পশ্যামি চক্ষুষী তেঽহমণ্ডজ

শরীরে তু ন পশ্যামি তব চৈবাত্মনশ্চ হ
পদে পদে তু পশ্যামি সলিলাদগ্নিমুত্থিতম্

স মে নির্বাপ্য সহসা চক্ষুষী শাম্যতে পুনঃ
তন্নিবর্ত মহান্কালো গচ্ছতো বিনতাত্মজ

ন মে প্রয়োজনং কিংচিদ্গমনে পন্নগাশন
সংনিবর্ত মহাবেগ ন বেগং বিষহামি তে

গুরবে সংশ্রুতানীহ শতান্যষ্টৌ হি বাজিনাম্
একতঃশ্যামকর্ণানাং শুভ্রাণাং চন্দ্রবর্চসাম্

তেষাং চৈবাপবর্গায় মার্গং পশ্যামি নাণ্ডজ
ততোঽয়ং জীবিতত্যাগে দৃষ্টো মার্গো ময়াত্মনঃ

নৈব মেঽস্তি ধনং কিংচিন্ন ধনেনান্বিতঃ সুহৃৎ
ন চার্থেনাপি মহতা শক্যমেতদ্ব্যপোহিতুম্

নারদ উবাচ
এবং বহু চ দীনং চ ব্রুবাণং গালবং তদা
প্রত্যুবাচ ব্রজন্নেব প্রহসন্বিনতাত্মজঃ

নাতিপ্রজ্ঞোঽসি বিপ্রর্ষে যোঽঽত্মানং ত্যক্তুমিচ্ছসি
ন চাপি কৃত্রিমঃ কালঃ কালো হি পরমেশ্বরঃ

কিমহং পূর্বমেবেহ ভবতা নাভিচোদিতঃ
উপায়োঽত্র মহানস্তি যেনৈতদুপপদ্যতে

তদেষ ঋষভো নাম পর্বতঃ সাগরোরসি
অত্র বিশ্রম্য ভুক্ত্বা চ নিবর্তিষ্যাব গালব