UtshovChapter 110
110.1
गालव उवाच
गरुत्मन्भुजगेन्द्रारे सुपर्ण विनतात्मज
नय मां तार्क्ष्य पूर्वेण यत्र धर्मस्य चक्षुषी
Galava uvacha
Garutmanbhujagendrare suparna vinatatmaja
Naya mam tarkshya purvena yatra dharmasya chakshushi
110.2
पूर्वमेतां दिशं गच्छ या पूर्वं परिकीर्तिता
दैवतानां हि सांनिध्यमत्र कीर्तितवानसि
Purvametam disham gachchha ya purvam parikirtita
Daivatanam hi sannidhyamatra kirtitavanasi
110.3
अत्र सत्यं च धर्मश्च त्वया सम्यक्प्रकीर्तितः
इच्छेयं तु समागन्तुं समस्तैर्दैवतैरहम्
भूयश्च तान्सुरान्द्रष्टुमिच्छेयमरुणानुज
Atra satyam cha dharmashcha tvaya samyakprakirtitah
Ichchheyam tu samagantum samastairdaivatairaham
Bhuyashcha tansurandrashtumichchheyamarunanuja
110.4
नारद उवाच
तमाह विनतासूनुरारोहस्वेति वै द्विजम्
आरुरोहाथ स मुनिर्गरुडं गालवस्तदा
Narada uvacha
Tamaha vinatasunurarohasveti vai dvijam
Arurohatha sa munirgarudam galavastada
110.5
गालव उवाच
क्रममाणस्य ते रूपं दृश्यते पन्नगाशन
भास्करस्येव पूर्वाह्णे सहस्रांशोर्विवस्वतः
Galava uvacha
Kramamanasya te rupam drishyate pannagashana
Bhaskarasyeva purvahne sahasranshorvivasvatah
110.6
पक्षवातप्रणुन्नानां वृक्षाणामनुगामिनाम्
प्रस्थितानामिव समं पश्यामीह गतिं खग
Pakshavatapranunnanam vrikshanamanugaminam
Prasthitanamiva samam pashyamiha gatim khaga
110.7
ससागरवनामुर्वीं सशैलवनकाननाम्
आकर्षन्निव चाभासि पक्षवातेन खेचर
Sasagaravanamurvim sashailavanakananam
Akarshanniva chabhasi pakshavatena khechara
110.8
समीननागनक्रं च खमिवारोप्यते जलम्
वायुना चैव महता पक्षवातेन चानिशम्
Saminanaganakram cha khamivaropyate jalam
Vayuna chaiva mahata pakshavatena chanisham
110.9
तुल्यरूपाननान्मत्स्यांस्तिमिमत्स्यांस्तिमिंगिलान्
नागांश्च नरवक्त्रांश्च पश्याम्युन्मथितानिव
Tulyarupanananmatsyanstimimatsyanstimingilan
Naganshcha naravaktranshcha pashyamyunmathitaniva
110.10
महार्णवस्य च रवैः श्रोत्रे मे बधिरीकृते
न शृणोमि न पश्यामि नात्मनो वेद्मि कारणम्
Maharnavasya cha ravaih shrotre me badhirikrite
Na shrinomi na pashyami natmano vedmi karanam
110.11
शनैः साधु भवान्यातु ब्रह्महत्यामनुस्मरन्
न दृश्यते रविस्तात न दिशो न च खं खग
Shanaih sadhu bhavanyatu brahmahatyamanusmaran
Na drishyate ravistata na disho na cha kham khaga
110.12
तम एव तु पश्यामि शरीरं ते न लक्षये
मणीव जात्यौ पश्यामि चक्षुषी तेऽहमण्डज
Tama eva tu pashyami shariram te na lakshaye
Maniva jatyau pashyami chakshushi tehamandaja
110.13
शरीरे तु न पश्यामि तव चैवात्मनश्च ह
पदे पदे तु पश्यामि सलिलादग्निमुत्थितम्
Sharire tu na pashyami tava chaivatmanashcha ha
Pade pade tu pashyami saliladagnimutthitam
110.14
स मे निर्वाप्य सहसा चक्षुषी शाम्यते पुनः
तन्निवर्त महान्कालो गच्छतो विनतात्मज
Sa me nirvapya sahasa chakshushi shamyate punah
Tannivarta mahankalo gachchhato vinatatmaja
110.15
न मे प्रयोजनं किंचिद्गमने पन्नगाशन
संनिवर्त महावेग न वेगं विषहामि ते
Na me prayojanam kinchidgamane pannagashana
Sannivarta mahavega na vegam vishahami te
110.16
गुरवे संश्रुतानीह शतान्यष्टौ हि वाजिनाम्
एकतःश्यामकर्णानां शुभ्राणां चन्द्रवर्चसाम्
Gurave sanshrutaniha shatanyashtau hi vajinam
Ekatahshyamakarnanam shubhranam chandravarchasam
110.17
तेषां चैवापवर्गाय मार्गं पश्यामि नाण्डज
ततोऽयं जीवितत्यागे दृष्टो मार्गो मयात्मनः
Tesham chaivapavargaya margam pashyami nandaja
Tatoyam jivitatyage drishto margo mayatmanah
110.18
नैव मेऽस्ति धनं किंचिन्न धनेनान्वितः सुहृत्
न चार्थेनापि महता शक्यमेतद्व्यपोहितुम्
Naiva mesti dhanam kinchinna dhanenanvitah suhrit
Na charthenapi mahata shakyametadvyapohitum
110.19
नारद उवाच
एवं बहु च दीनं च ब्रुवाणं गालवं तदा
प्रत्युवाच व्रजन्नेव प्रहसन्विनतात्मजः
Narada uvacha
Evam bahu cha dinam cha bruvanam galavam tada
Pratyuvacha vrajanneva prahasanvinatatmajah
110.20
नातिप्रज्ञोऽसि विप्रर्षे योऽऽत्मानं त्यक्तुमिच्छसि
न चापि कृत्रिमः कालः कालो हि परमेश्वरः
Natipragyosi viprarshe yotmanam tyaktumichchhasi
Na chapi kritrimah kalah kalo hi parameshvarah
110.21
किमहं पूर्वमेवेह भवता नाभिचोदितः
उपायोऽत्र महानस्ति येनैतदुपपद्यते
Kimaham purvameveha bhavata nabhichoditah
Upayotra mahanasti yenaitadupapadyate
110.22
तदेष ऋषभो नाम पर्वतः सागरोरसि
अत्र विश्रम्य भुक्त्वा च निवर्तिष्याव गालव
Tadesha rishabho nama parvatah sagarorasi
Atra vishramya bhuktva cha nivartishyava galava